អត្តពលិកសូហ្វតិន្នីស៦៨នាក់ ចូលរួមការប្រកួតជើងឯកថ្នាក់ជាតិ និងពានរង្វាន់សម្ដេចក្រឡាហោម ស ខេងឆ្នាំនេះ
ភ្នំពេញ៖សហព័ន្ធកីឡាសូហ្វតិន្នីសកម្ពុជានាព្រឹកថ្ងៃទី១៥ ខែមិថុនា ឆ្នាំ២០២០បានបើកការប្រកួតកីឡាសូហ្វតិន្នីសជ្រើសរើសជើងឯកដណ្តើមជើងឯកថ្នាក់ជាតិលើកទី៤ ២០២០ និងការប្រកួតកីឡាសូហ្វតិន្នីសពានរង្វាន់សម្ដេចក្រឡាហោម ស ខេង លើកទី៧ ឆ្នាំ២០២០នៅក្នុងបរិវេណទីលានសូហ្វតិន្នីសកម្ពុជា។
ចំពោះព្រឹត្តិការណ៍ខាងលើកនេះនឹងប្រព្រឹត្តិចាប់ពីថ្ងៃទី១៥រហូតដល់ថ្ងៃទី១៩ ខែមិថុនា ឆ្នាំ២០២០ ដែលមានរយៈពេល៥ថ្ងៃ។ ដោយមានកីឡាករ-កីឡាការិនីចំនួន៦៨នាក់ដែលមកពីសមាគម-ក្លិបកីឡាសូហ្វតិន្នីសចំនួន៦ក្នុងនោះខេត្តចំនួន២ ក្រសួង២ អគ្គស្នងការមួយ និងក្លិបមួយ។
សមាគម-ក្លិបកីឡាសូហ្វតិន្នីសចំនួន៦រួមមានក្រសួងមហាផ្ទៃមានកីឡាករ-កីឡាការិនីចំនួន១២នាក់ ក្រសួងការពារជាតិមានកីឡាករ-កីឡាការិនីចំនួន៧នាក់ អគ្គស្នងការនគរបាលជាតិមហាផ្ទៃមានកីឡាករ-កីឡាការិនីចំនួន១២នាក់ ខេត្តកំពង់ស្ពឺមានកីឡាករ-កីឡាការិនីចំនួន១៥នាក់ ខេត្តកំពង់ឆ្នាំងមានកីឡាករ-កីឡាការិនីចំនួន១៥នាក់ និងក្លិបអង្គការមិត្តសម្លាញ់មានកីឡាករ-កីឡាការិនីចំនួន៧នាក់៕
