ត្រីសេក ឬត្រីប៉ារ៉ាហ្គាយ មានលក្ខណៈ ពិសេស២បែប ដែលប្លែក និងកម្រនឹងមានត្រីណាដូច នៅកម្ពុជា
ភ្នំពេញ៖ លោក ម៉ម សុខដារ៉ា ប្រធានមជ្ឈមណ្ឌលស្រាវជ្រាវ និងអភិវឌ្ឍន៍វារី វប្បកម្មសមុទ្រ នៃរដ្ឋបាលជលផល បាន បញ្ជាក់ឲ្យដឹងនៅថ្ងៃទី២៣មិថុនានេះថា៖. ត្រីសេក ឬត្រីប៉ារ៉ាហ្គាយ គឺជាប្រភេទត្រីសមុទ្រមួយប្រភេទ ដែលមានលក្ខណៈពិសេសពីធម្មជាតិចំនួន២ ដែលកម្រនឹងត្រីណាផ្សេង ទៀត អាចធ្វើដូចបានឡើយ គឺការផលិតខ្សាច់នៅបាតសមុទ្រ និងការដូរភេទរបស់ ពួកវា។
លោក ម៉ម សុខដារ៉ា បានបញ្ជាក់ថា៖ ពពួកត្រីសេកនេះ គឺជាពពួកត្រី ដែលចូលចិត្តរស់នៅតាមបាតសមុទ្រដែលមានថ្មប៉ប្រ៉ះទឹក ផ្កាថ្ម និងតំបន់ដែលមានស្មៅ ឬសារ៉ាយសមុទ្រ ហើយដែលពពួកត្រីនេះ គឺជាប្រភេទត្រីដែលមានប្រយោជន៍ណាស់ សម្រាប់សមុទ្រ គឺអាចសម្អាតខ្សាច់នៅបាតសមុទ្រ តាមរយៈការសម្អាតពពួកបាក់តេរី វត្ថុគ្មានប្រយោជន៍អ្វីផ្សេងៗទៀតដែលធ្វើឱ្យកខ្វក់ដីខ្សាច់ ព្រមទាំងឧស្ម័នពុលមួយចំនួននៅក្នុងខ្សាច់ផងដែរ នៅពេលដែលត្រីសេកលាក់ខ្លួននៅបាតខ្សាច់។ ម្យ៉ាងវិញទៀតពពួកត្រីសេកនេះ គឺមានសមត្ថភាពអាចផលិតខ្សាច់ ក្នុង១ឆ្នាំ អាចបានរង្វង់៧០០ផោន ឬស្មើនឹងជាង៣០០គីឡូក្រាម តាមរយៈការស៊ីសារ៉ាយ ប្លង់តុង និងផ្កាថ្មដែលងាប់នៅបាតសមុទ្រ ដែលទាំងអស់នេះហើយគឺជាសមត្ថភាពនៃការផលិតខ្សាច់របស់ត្រីសេក ដោយការលេបផ្កាថ្មកំទេចកំទី និងសារ៉ាយជាដើម ហើយបន្ទាប់មកបញ្ចេញវត្ថុអ្វីដែលនៅសល់ជាទម្រង់ខ្សាច់ ហើយដើម្បីបំពេញការងាររបស់ខ្លួននេះ ត្រីសេកប្រើថ្គាមដូចចំពុះដ៏ខ្លាំងរបស់វា និងធ្មេញខាងក្រោយដ៏រឹងមាំ ។
ដោយឡែកចំពោះការប្តូរភេទ និងបន្តពូជរបស់ត្រីសេកវិញ លោក ម៉ម សុខដារ៉ា បាន បញ្ជាក់ថា៖ ពពួកត្រីសេក គឺនៅពេលកើតកូន គឺកូនត្រីមានភេទជាឈ្មោលទាំងអស់ ដូចពពួកត្រីខ្លះ (ត្រីឆ្ពុង និងត្រីតុកកែ ខណៈត្រីតុកកែ គឺកើតមកញីទាំងអស់ ប៉ុន្តែបានដូរភេទជាឈ្មោលទាំងអស់វិញនៅពេលគ្រប់លក្ខខណ្ឌសមស្រប) ហើយនៅពេលដែលត្រីសេកនេះ មានអាយុក្នុងរង្វង់ពី៣ឆ្នាំ ទៅ៥ឆ្នាំ គឺនៅពេលដែលពួកវាមានលក្ខខណ្ឌសមស្របសម្រាប់មជ្ឈដ្ឋានខាងក្រៅហើយ ពួកវាក៏ប្តូរភេទទៅតាមធម្មជាតិរបស់វា ទៅជាញីវិញទាំងអស់ ដូច្នេះក្នុងមួយជីវិតរបស់ត្រីសេកនេះ គឺមានភេទចំនួនពីរ គឺនៅពេលនៅតូច ភេទឈ្មោល និងពេលធំឡើង ភេទញីវិញ។ ចំពោះការបន្តពូជរបស់ត្រីសេកវិញ ខ្ញុំសូមបញ្ជាក់ផងដែរថា មានអ្នកខ្លះគាត់ឆ្ងល់ថា កាលពីតូចឈ្មោលទាំងអស់ ដល់ធំឡើងញីទាំងអស់ តើការបន្តពូជរបស់ត្រីសេកយ៉ាងដូចម្តេច? ចំពោះចម្ងល់នេះ ខ្ញុំសូមជម្រាបជូនថា ត្រីសេកឈ្មោលពេញវ័យគឺអាចបន្តពូជបាននៅអាយុ០២ឆ្នាំឡើងទៅ ដូច្នេះមុនពេលដែលត្រីឈ្មោលដូរភេទទៅជាញី គឺវាអាចបន្តពូជជាមួយត្រីញីដែលមានអាយុប្រហែល៥ឆ្នាំ ដែលជាអាយុអាចបន្តពូជបាន បន្ទាប់ពីបានផ្លាស់ប្តូរភេទរួចហើយជាធម្មតា ។
ទាក់ទិននឹងការងារអភិរក្ស និងបញ្ហាប្រឈម របស់ត្រីសេកវិញ លោក ម៉ម សុខដារ៉ា បានសំណូមពរដល់ប្រជានេសាទទាំងអស់នៅសមុទ្រ សូមចូលរួមថែរក្សាធនធានធម្មជាតិ ក៏ដូចជាជីវចម្រុះរបស់ត្រី និងការបន្តនិរន្តរភាពស្បៀង ដោយការមិនប្រើឧបករណ៍ហាមឃាត់ សម្រាប់ធ្វើការនេសាទ ដូចជាការប្រើមងធំ បោកគ្រាប់បែក ការបំផ្លាញផ្កាថ្ម ឬការប្រើប្រាស់ថ្នាំពុល។ល។ ដោយសារត្រីសេកចូលចិត្តរស់នៅតាមផ្កាថ្ម ថ្មប៉ប្រះទឹក ការអូសអួនធម្មតាគឺមិនអាចទៅដល់ជម្រកត្រីសេកបានទេ លើកលែងតែការនេសាទដោយប្រើឧបករណ៍ខុសច្បាប់ ។ ម្យ៉ាងវិញទៀត ត្រីសេក គឺជាប្រភេទត្រីលម្អសមុទ្រប៉ុណ្ណោះ ពុំសមស្របសម្រាប់ការនេសាទជាអាជីវកម្ម ឬលក់ដូរនោះដែរ។
យោងតាមការស្រាវជ្រាវ ត្រីសេក ឬត្រីប៉ារ៉ាហ្គាយ ដែលមានឈ្មោះវិទ្យាសាស្ត្រ Scaridae មានច្រើនប្រភេទណាស់ គឺប្រហែលជា៨០ពួក ដោយចែកចេញ ប្រមាណជាង ៥០០ប្រភេទទៀត ដោយមានប្រវែងដងខ្លួនប្រមាណពី ៥០សង់ទីម៉ែត្រ ទៅ១០០សង់ទីម៉ែត្រ ហើយមានពណ៌ចម្រុះផ្សេងៗគ្នា នៅតាមតំបន់ ចំណែកឯការផ្តល់ឈ្មោះថាត្រីសេកនេះ គឺយោងទៅលើមាត់របស់ត្រីនេះ ដែលមើលទៅដូចជាជំពុះរបស់សត្វសេក។
បើតាមអ្នកប្រមូលទិញត្រី ការនេសាទត្រីសេកនៅកម្ពុជា ពុំមានជាលក្ខណៈអាជីវកម្មធំដុំណាមួយនោះទេ ព្រោះត្រីនេះកម្រគេ នេសាទបានណាស់ ហើយក៏មិនសូវមានអ្នកនិយមបរិភោគដែរ ដោយសារសាច់វាជ្រាយៗ ធ្វើឱ្យវាមិនមានតម្លៃនៅលើទីផ្សារ ដោយមួយគីឡូលក់បានរង្វង់ពី២.០០០ ទៅ ៥.០០០ រៀលប៉ុណ្ណោះ៕ សំរិត
