អនុសាខាកាកបាទក្រហមកម្ពុជា ខណ្ឌមានជ័យ ផ្តល់អំណោយដល់កូនភ្លោះ ៣នាក់
ភ្នំពេញ៖ កូនភ្លោះ ៣នាក់ នៅភូមិទ្រា១ សង្កាត់ស្ទឹងមានជ័យទី១ ខណ្ឌមានជ័យ ត្រូវបានយកចិត្តទុកដាក់ពីសំណាក់ លោក ឌី រ័ត្នខេមរុណ ប្រធានអនុសាខាកាកបាទក្រហមកម្ពុជា ខណ្ឌមានជ័យ ។
នៅព្រឹកថ្ងៃព្រហស្បតិ៍ ១២កើត ខែ អាសាឍ ឆ្នាំ ជូត ទោស័ក ព.ស ២៥៦៤ ត្រូវនិងថ្ងៃទី ០២ ខែ កក្កដា ឆ្នាំ ២០២០ នេះ លោក ឌី រ័ត្នខេមរុណ អភិបាលរង ខណ្ឌមានជ័យ និងជាប្រធានគណៈកម្មាធិការអនុសាខាកាកបាទក្រហមកម្ពុជា ខណ្ឌមានជ័យ បានចុះសួរសុខទុក្ខ និងនាំយកអំណោយមនុស្សធម៌ អនុសាខាកាកបាទក្រហមកម្ពុជា ខណ្ឌមានជ័យ ជូនដល់គ្រួសារកូនភ្លោះ ៣នាក់ នៅផ្ទះលេខ ១៩E ក្រុម៣ ភូមិទ្រា១ សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ ។
កូនភ្លោះទាំង ៣នាក់នេះ មានឪពុកឈ្មោះ អ៊ុយ តាំងការ អាយុ ៤១ឆ្នាំ និងម្តាយឈ្មោះ ហែម មរកត អាយុ ៣៦ឆ្នាំ ហើយកូនភ្លោះទាំង ៣នាក់
ទី១ ឈ្មោះ ទឺ ស័ក្កតាំង ភេទ ប្រុស
ទី២ ឈ្មោះ ទឺ ស័ក្កទុង ភេទ ប្រុស
ទី៣ ឈ្មោះ ទឺ ស័ក្កទន់ ភេទ ប្រុស ។
នាឱកាសនោះផងដែរ លោក ឌី រ័ត្នខេមរុណ ប្រធានអនុសាខា បានពាំនាំនូវការផ្តាំផ្ញើរសាកសួរសុខទុក្ខពីសំណាក់ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលតែងតែយកចិត្តទុកដាក់គិតគូរយ៉ាងហ្មត់ចត់ចំពោះសុខទុក្ខរបស់បងប្អូនប្រជាពលរដ្ឋ ពិសេសគឺសុខទុក្ខអ្នកដែលសម្រាលបានកូនភ្លោះ ៣នាក់ ។ មិនតែប៉ុណ្ណោះ សម្តេចទាំងទ្វេ បានចាត់ទុកកូនភ្លោះ ៣នាក់នេះ ជាចៅរបស់ សម្តេចផងដែរ ។
ជាមួយគ្នានេះដែរ លោក ឌី រ័ត្នខេមរុណ ប្រធានអនុសាខា ណែនាំឲ្យក្រុមគ្រួសារកូនភ្លោះទាំង៣នាក់នេះ ត្រូវថែរក្សាសុខភាពឲ្យបានល្អ និងរក្សាអនាម័យអោយបានខ្ជាប់ខ្ជួនជាប្រចាំ ក្នុងកាលៈទេសៈនៃការរាតត្បាតនៃជំងឺកូវីដ-១៩ នាពេលបច្ចុប្បន្ននេះ ។
អំណោយរបស់អនុសាខា ដែលនាំមកចែកជូននាពេលនេះរួមមាន អង្ករចំនួន ៣០គីឡូក្រាម , មី ១ កេស , ទឹកក្រូច ១ កេស , ត្រី ខ ១ យួរ , ទឹកសុទ្ធ ១ កេស រួមទាំងថវិកាចំនួន ១០០,០០០ រៀល ៕
