អភិបាលខេត្តនាំយកទេយ្យវត្ថុនិងទៀនព្រះវស្សាប្រគេនព្រះសង្ឃនៅតាមបណ្តាវត្តចំនួន៣៥វត្តក្នុងស្រុកល្វាឯម
កណ្ដាល៖កាលពីថ្ងៃទី៨ ខែកក្កដា ឆ្នាំ២០២០ លោក នុត ពុធដារ៉ា អភិបាលរងខេត្តកណ្តាល តំណាងលោកអភិបាលខេត្តកណ្តាល រួចជាមួយលោកលោកស្រីប្រធានមន្ទីរ លោកអភិបាលស្រុក មន្ត្រីរាជការឃុំ ស្រុក បាននាំយកទេយ្យវត្ថុ និងទៀនវស្សា ទៅប្រគេនព្រះសង្ឃតាមបណ្តាវត្ត ចំនួន ៣៥វត្ត ក្នុងស្រុកល្វាឯម។ពិធីនេះបានប្រព្រឹត្តទៅនៅវត្តពោធិ៍មាស ឃុំពាមឧកញ៉ាអុង ស្រុកល្វាឯម ខេត្តកណ្តាល។
ក្នុងឱកាសនោះលោកអភិបាលរងខេត្តកណ្ដាលបានលើកឡើងថា៖ទេយ្យវត្ថុ និងទៀនព្រះវស្សា ដែលលោកនាំយកមកនេះប្រគេនព្រះសង្ឃ គង់ចាំព្រះវស្សា នៅតាមបណ្តាវត្ត ៣៥វត្ត ក្នុងស្រុកល្វាឯមដែលកំពុងចូលព្រះវស្សា រយៈពេល ៣ខែ តាមពុទ្ធានុញ្ញាត។
ជាមួយគ្នានេះដែរ លោកនុត ពុធដារ៉ា អភិបាលរងខេត្តបានណែនាំដល់អភិបាលស្រុកប្រធានក្រុមប្រឹក្សាស្រុកលោកមេឃុំមេភូមិ បន្តផ្សព្វផ្សាយបញ្ហានៃការឆ្លងរាលដាលជំងឺកូវីដ-១៩ ឲ្យបានជាប្រចាំដល់ប្រជាពលដ្ឋក្នុងមូលដ្ឋាន ដើម្បីឲ្យពួកគេបានយល់ដឹង និងមានមូលដ្ឋានគ្រប់គ្រាន់ ក្នុងការការពារខ្លួន ក្រុមគ្រួសារ និងអ្នកដទៃនៅក្នុងសហគមន៍ផងដែរ ។លោកអភិបាលរងក៏បានសូមបិណ្ឌបាត្រចៅអធិការវត្តទាំងអស់សុំកុំជួបជុំបែបសាសនាធំឬមនុស្សច្រើនពេកល្មមបានហើយការពារការឆ្លងរាលដាលដោយជំងឺកូវីដ៕
