មន្ត្រីក្រសួងបរិស្ថានចំនួន៤០រូប ទទួលបាន គោលនយោបាយកិច្ចគាំពារមន្ត្រីរាជការក្រសួងបរិស្ថាន
ភ្នំពេញ៖ ក្នុងរយៈពេល១ខែនេះ គណៈកម្មការ សាខា សមាគមនារីកម្ពុជាដើម្បីសន្តិភាព និងអភិវឌ្ឍន៍ក្រសួងបរិស្ថាន បានប្រគល់ថវិកាសរុបចំនួន១៦៣. ៩០០.០០០រៀល(មួយរយហុកសិបបីលានប្រាំបួនរយ ពាន់រៀលគត់) ឧបត្ថម្ភដល់មន្ត្រីរាជការ ចំនួន៤០រូបមក ពីទីស្តីការក្រសួង និងមន្ទីរបរិស្ថានចំនួន១៥មន្ទីរ តាម រយៈក្រុមការងារទទួលបន្ទុករួមការងារស្ត្រី យុវជន យេនឌ័រ និងកុមារក្នុងវិស័យបរិស្ថាននៅថ្នាក់ ខេត្ត ដែលបានធ្វើការប្រគល់ផ្ទាល់នូវថវិកាឧបត្ថម្ភ ជូនមន្ត្រីក្នុងមន្ទីរសាមីរបស់ខ្លួន ដោយក្នុងនោះរួមមានមន្ត្រីសម្រាលបុត្រចំនួន១១រូប មន្ត្រីរៀបអាពាហ៍ពិពាហ៍ចំនួន២១រូប មន្ត្រីទទួលមរណៈភាពចំនួន០១រូប និងមន្ត្រីមានជំងឺ និងជួបគ្រោះថ្នាក់ក្នុងពេលបំពេញ ការងារចំនួន០៧រូប។
នេះបើតាមការបញ្ជាក់ឲ្យដឹងពីលោកស្រី កាន់ រតនៈឧប្បល ប្រធានមន្ទីរកិច្ចការនារីរាជធានីភ្នំពេញ កាលពីថ្ងៃទី២៨ កក្កដា ឆ្នាំ២០២០ថា៖ កិច្ចការមនុស្សធម៏បែបនេះយើងបានដំណើការជូនទៅដល់ មន្ទីរទាំង១៥រួមមានមន្ទីរ បរិស្ថាន រាជធានីភ្នំពេញ សៀមរាប បាត់ដំបង ព្រះវិហារ ពោធិ៍សាត់ ត្បូងឃ្មុំ កំពង់ឆ្នាំង រតនគិរី កោះកុង តាកែវ បន្ទាយមានជ័យ កំពង់ធំ មណ្ឌលគិរី កំពត និងប៉ៃលិន។
លោកស្រីបានបន្ដថា៖ គោលនយោបាយគាំពារមន្ត្រីរាជការក្រសួងបរិស្ថាន មានគោលការណ៍ជួយឧបត្ថម្ភដល់មន្ត្រីរៀបអាពាហ៍ពិពាហ៍ មន្ត្រីនារីសម្រាលបុត្រ មន្ត្រីទទួលមរណៈភាព មន្ត្រីមានជំងឺ និងជួបគ្រោះថ្នាក់ក្នុងពេលបំពេញការងារ មន្ត្រីមានជីវភាពខ្វះខាត
និវត្តន៍ជន ការផ្តល់អាហារូករណ៍ដល់មន្ត្រី និងកូនមន្ត្រីមានជីវភាពខ្វះខាត និងចូលរួមឧបត្ថម្ភគាំទ្រសកម្មភាព សង្គមជាច្រើនទៀត៕
