ប្រសាសន៍ផ្តាំផ្ញើរបស់អភិបាលខេត្តព្រះសីហនុ ដើម្បីជាមូលដ្ឋានក្នុងការចាប់ផ្តើមអនុវត្តការងារ ប្រធានក្រុមប្រឹក្សាឃុំថ្មី មាន ៩ចំណុច
ព្រះសីហនុ ៖ ប្រសាសន៍ផ្តាំផ្ញើរបស់ ឯកឧត្តម គួច ចំរើន អភិបាលខេត្តព្រះសីហនុ ដើម្បីជាមូលដ្ឋានក្នុងការចាប់ផ្តើមអនុវត្តការងារ ប្រធានក្រុមប្រឹក្សាឃុំថ្មី មាន ៩ចំណុចសំខាន់ៗដូចខាងក្រោម៖
១.ប្រធានក្រុមប្រឹក្សាឃុំថ្មី ត្រូវមានស្វ័យភាពក្នុងការដឹកនាំ គ្រប់គ្រងការអភិវឌ្ឍ មូលដ្ឋានក៏ពិតមែន តែក្រុមប្រឹក្សាឃុំ ក៏ជាផ្នែកមួយនៃអំណាចប្រតិបត្តិរបស់រដ្ឋមានន័យថា ក្រុមប្រឹក្សាឃុំ ត្រូវអនុវត្តតាមរដ្ឋធម្មនុញ្ញ ច្បាប់ និងលិខិតបទដ្ឋាននានាដែលមានជាធរមាន ជាពិសេស ច្បាប់ស្ដីពីការគ្រប់គ្រងរដ្ឋបាលឃុំ-សង្កាត់ ។ ទន្ទឹមនោះ ប្រធានក្រុមប្រឹក្សាឃុំថ្មី ត្រូវបន្តនិរន្តរភាពការងារគ្រប់គ្រង និងអភិវឌ្ឍនៅ តាមភូមិនីមួយៗរបស់ខ្លួន ដែលមានមេភូមិជាតំណាងប្រជាពលរដ្ឋទាំងអស់នៅក្នុងភូមិ និងជាខ្សែរយៈចម្បងសម្រាប់ភ្ជាប់ទំនាក់ទំនងរវាងភូមិ និងក្រុមប្រឹក្សាឃុំ ។
២.កិច្ចការបន្តគឺ ប្រធានក្រុមប្រឹក្សាឃុំថ្មីត្រូវប្រជុំគ្នាដើម្បីពិនិត្យមើលគម្រោង អភិវឌ្ឍនិងគម្រោងសេវាកម្មនានាដែលនៅសេសសល់ពីអាណត្តិមុន ។ ក្នុងករណីពិនិត្យ ឃើញ មានគម្រោងមូលនិធិឃុំ ទាំងផ្នែកហេដ្ឋារចនាសម្ព័ន្ធ និងផ្នែកសេវាកម្ម ដែលបានធ្វើ លទ្ធកម្មរួចហើយ តែមិនទាន់បានអនុវត្ត ឬបានធ្វើលទ្ធកម្មរួចហើយ ហើយកំពុងតែអនុវត្ត ឬកំពុងស្ថិតក្នុងកិច្ចសន្យា ក្រុមប្រឹក្សាឃុំ ត្រូវទទួលខុសត្រូវអនុវត្តបន្តគម្រោងទាំងនោះ រហូតដល់បញ្ចប់ ។
៣.ក្រុមប្រឹក្សាឃុំត្រូវបន្តអនុវត្តថវិកា និងគម្រោង អភិវឌ្ឍដែលបានសម្រេចដោយ ក្រុម ប្រឹក្សាឃុំមុន។ ដូច្នេះក្រុមប្រឹក្សាថ្មី ត្រូវរៀបចំបែបបទស្នើសុំតម្កល់គំរូហត្ថលេខាឡើង វិញនៅរតនាគារ និងធនាគារដែលមានគណនីរបស់ឃុំ។
៤.ពិនិត្យឡើងវិញអំពីសមាសភាពគណៈ កម្មាធិការ ឬគណៈកម្មការនានារបស់ក្រុម ប្រឹក្សាឃុំមុន ដើម្បីធ្វើការកែសម្រួលទៅតាមសមាស ភាព និងតម្រូវការនៃក្រុមប្រឹក្សាឃុំ។
៥. ក្រុមប្រឹក្សាឃុំ ត្រូវបន្តអនុវត្តដីកា សេចក្ដី សម្រេច និងលិខិតបទដ្ឋាននានា របស់ ក្រុម ប្រឹក្សាឃុំមុនដែលបានសម្រេចកន្លងមកឱ្យបានត្រឹមត្រូវ និងមានប្រសិទ្ធភាព ប្រសិន បើពុំមានដីកា សេចក្ដីសម្រេច និងលិខិតបទដ្ឋានថ្មីណាមកជំនួសទេនោះ ។
៦.ដោយផ្អែកលើផែនការអភិវឌ្ឍរបស់ក្រុម ប្រឹក្សាឃុំចាស់ ក្រុមប្រឹក្សាឃុំថ្មី ត្រូវត្រៀម រៀប ចំអនុវត្តបន្តនូវផែនការអភិវឌ្ឍ និងកម្មវិធីវិនិ យោគបីឆ្នាំរំកិលរបស់ខ្លួនឱ្យស្របតាមនីតិវិធី ។
៧.លើសពីនេះទៀត ក្រុមប្រឹក្សាឃុំ ក៏ត្រូវយក ចិត្តទុកដាក់ និងលើកកម្ពស់ គណនេយ្យភាពនិងតម្លាភាពនៅក្នុងការអនុវត្តការងាររបស់ខ្លួនជាប្រចាំ ។ គណនេយ្យភាព និងតម្លាភាពគឺជាកត្តាដ៏គន្លឹះនៅក្នុងអភិបាលកិច្ចល្អ ដើម្បីឆ្លុះ បញ្ចាំងនូវភាពសុចរិត និងភាពត្រឹមត្រូវប្រាកដ ប្រជានៅក្នុងការអនុវត្តគម្រោងអភិវឌ្ឍ ការ អនុវត្តថវិកា និងការ ចាត់ចែងការងារនានា ដែលធ្វើឡើងដោយក្រុមប្រឹក្សាឃុំ ។
៨.ផ្អែកតាមច្បាប់ស្ដីពីការប្រឆាំងអំពើពុក រលួយ សមាជិកក្រុមប្រឹក្សាឃុំ ទាំងអស់ មានកាតព្វកិច្ចត្រូវ ធ្វើការប្រកាសទ្រព្យសម្បត្តិ និងបំណុល។
៩.ចំណុចចុងក្រោយនេះ គឺក្រុមប្រឹក្សាឃុំទាំង អស់ ត្រូវបន្តនិងរក្សាឱ្យបាននូវ វប្បធម៌សាម គ្គីភាពសម្របសម្រួល មិនបែងចែកនិន្នាការនយោបាយ និងស្ថានភាពក្នុង សង្គម ដោយខិតខំលើកកម្ពស់ការចូលរួមបំពេញការងារជាក្រុមក្នុងចំណោមសមាជិកក្រុម ប្រឹក្សាឃុំទាំង អស់ ដើម្បីធ្វើជាតំណាងឱ្យសាមគ្គីភាពក្នុង ចំណោមប្រជាពលរដ្ឋគ្រប់មជ្ឈដ្ឋានក្នុងឃុំ និងជំរុញការអភិវឌ្ឍមូលដ្ឋាន ឱ្យកាន់តែប្រសើរឡើងថែមទៀត។
នារសៀលថ្ងៃទី២៨ ខែកក្កដា ឆ្នាំ២០២០នេះ ឯកឧត្ដម ជាម ហុីម ប្រធានក្រុមប្រឹក្សាខេត្តព្រះសីហនុ និងឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ បានអញ្ជើញជាអធិបតីក្នុងពិធីប្រកាសផ្លាស់ប្តូរ និងទទួល ស្គាល់ប្រធានក្រុម ប្រឹក្សាឃុំ មេឃុំ ជំទប់ទី១ ជំនប់ទី២ និងសមាជិកក្រុមប្រឹក្សាឃុំ នៃឃុំទឹកថ្លា ស្រុកព្រៃនប់ ខេត្តព្រះសីហនុ ។
ពិធីនេះក៏មានការអញ្ជើញចូលរួមពីសំណាក់ឯកឧត្តម សមាជិកក្រុមប្រឹក្សាខេត្តព្រះសីហនុ លោកអភិបាលរងខេត្ត អភិបាលស្រុក ប្រធានមន្ទីរ-អង្គភាព សមាជិកក្រុមប្រឹក្សាឃុំ ស្មៀនឃុំ បុគ្គលិករដ្ឋបាលឃុំ មេភូមិ អនុប្រធានភូមិ សមាជិកភូមិ តំណាងអង្គការសង្គមស៊ីវិល ដៃគូរអភិវឌ្ឍ និងប្រជាពលរដ្ឋមូលដ្ឋាន ជាច្រើនរូបផងដែរ ។
ក្នុងឱកាសឱកាសនោះ ឯកឧត្តម គួច ចំរើនអភិបាលនៃគណៈអភិបាលខេត្តព្រះសីហនុបានសម្ដែងនូវការកោតសរសើរ និងវាយតម្លៃខ្ពស់ចំពោះ ប្រធានក្រុមប្រឹក្សាឃុំ សមាជិកក្រុម ប្រឹក្សាឃុំ ដែលកន្លងមកបានខិតខំប្រឹងប្រែងយកអស់ពី កម្លាំងកាយចិត្ត អនុវត្តតួនាទី ភារកិច្ចរបស់ខ្លួន សម្រេចបាននូវសមិទ្ធផលជាច្រើនសម្រាប់ជា ផលប្រយោជន៍របស់ប្រជាពលរដ្ឋដែលជាម្ចាស់ឆ្នោត ហើយសមិទ្ធ ផល ទាំងនោះ គឺជាមូលដ្ឋាន សម្រាប់ក្រុមប្រឹក្សាឃុំ បន្តពង្រីកពង្រឹងថែមទៀតដើម្បីអភិវឌ្ឍឃុំ ភូមិរបស់ខ្លួន ។ ជាមួយគ្នានេះ ឯកឧត្ដមសូមស្វាគមន៍ និងអបអរសាទរ ចំពោះ លោក ជួប បាន ប្រធានក្រុមប្រឹក្សាឃុំ និងជាមេឃុំទឹកថ្លា លោក សឹម អេល ជំទប់ទី១ លោកស្រី ហុ ទាន ជំទប់ទី២ និងលោក តេះ ហាលីម សមាជិកក្រុមប្រឹក្សាឃុំទឹកថ្លា ដែលត្រូវបានទទួលស្គាល់ស្រប តាមប្រកាសលេខ ២៨២៦ ប្រក. ចុះថ្ងៃទី២៥ ខែមិថុនា ឆ្នាំ ២០២០ របស់ក្រសួងមហាផ្ទៃត្រូវអនុវត្តតួនាទី និងភារកិច្ចរបស់ខ្លួនដោយឈរលើមូលដ្ឋានច្បាប់គោលនយោបាយ និងលិខិតបទដ្ឋានគតិយុត្តដែលមានចែកជាធរមាន និងសូមប្រកាន់ភ្ជាប់នូវអភិក្រមរបស់សម្ដេចអគ្គមហាសេនាបតិតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា គឺ ” ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់ ” និងបាវចនាពីរគឺ ” កែទម្រង់ខាងក្នុង ” និង ” បង្កើតមិត្តខាងក្រៅ ” ដោយសា្មរតីឯករាជ្យ។
ជាមួយគ្នានេះឯកឧត្ដមអភិបាលខេត្តក៏បានធ្វើការផ្សព្វផ្សាយពីការអនុវត្តកម្មវិធី «ឧបត្ថម្ភសាច់ប្រាក់ ជូនពលរដ្ឋមានជីវភាពក្រីក្រ និងងាយរងគ្រោះក្នុងអំឡុងពេលជំងឺ កូវីដ-១៩» របស់រាជរដ្ឋាភិបាល ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរា ជាណាចក្រកម្ពុជា ផងដែរ៕
