ក្នុងរយៈពេល៧ខែ ឆ្នាំ២០២០កម្ពុជានាំចេញផលិតផលកសិកម្មជាច្រើនមុខ ទៅកាន់ទីផ្សារអន្តរជាតិបានជាង២,៦៨៩,៦៨៥តោន
ភ្នំពេញ៖ យោងតាមរបាយការណ៍របស់រដ្ឋមន្ត្រីក្រសួងកសិកម្ម រុក្ខាប្រមាញ់ និង នេសាទ នៅព្រឹកថ្ងៃទី០១ ខែសីហា ឆ្នាំ២០២០នេះបានបញ្ជាក់ថា កម្ពុជាបាន នាំចេញផលិតផលកសិកម្មជាច្រើនមុខ ទៅកាន់ទីផ្សារអន្តរជាតិបានបរិមាណ ២,៦៨៩,៦៨៥តោន ក្នុងរយៈពេល៧ខែ ឆ្នាំ២០២០នេះ ។
លោករដ្ឋមន្ត្រី វេង សាខុន បញ្ជាក់បន្ថែមទៀតថា បរិមាណនៃការនាំចេញផលិតផលកសិកម្មនេះ គឺត្រូវបានគត់ត្រាផ្លូវការ ដែលឆ្លងកាត់ការត្រួតពិនិត្យភូតគាមអនាម័យ ដោយមិនទាន់គិតពីការនាំចេញក្រៅផ្លូវការ ដូចជាស្រូវជាង១លានតោន ទៅកាន់ប្រទេសវៀតណាមនោះទេ។
លោករដ្ឋមន្ត្រី បានគូសបញ្ជាកថា ផលិតផលកសិកម្មសំខាន់ៗរបស់កម្ពុជា ដែលនាំចេញទៅក្រៅប្រទេស នៅរយៈ ពេល៧ខែនេះរួមមាន៖អង្ករនាំចេញបានជិត៤៣ម៉ឺនតោន, ដំឡូងមីជាង១.៥លានតោន, គ្រាប់ស្វាយចន្ទី ជិត២០ម៉ឺនតោន, គ្រាប់ពោតជាង១៤ម៉ឺនតោន,ចេកស្រស់ជិត១៧ម៉ឺនតោន, ផ្លែស្វាយជិត៥ម៉ឺនតោន, ដូងប្រេងជាង៣ម៉ឺនតោន, ម្ទេសស្រស់ជាង៤ម៉ឺនតោន និងផលិតផលកសិកម្មផ្សេងៗទៀត។
សូមបញ្ជាក់ថា ទីផ្សារកសិផលរបស់កម្ពុជា មានដូចជា៖ ចិន ថៃ វៀតណាម ឥណ្ឌា អឺរ៉ុប ជប៉ុន រុស្ស៊ី អូស្ត្រាលី បារាំង និងប្រទេសមួយចំនួនទៀត៕ សំរិត
