ព្រះចៅអធិការវត្តប្រាសាទ ប្រគល់ទ័យទាននិងបច្ច័យមួយចំនួនជូនសាខាកាកបាទក្រហមរាជធានី ដើម្បីបន្តយកទៅចែកជូនប្រជាពលរដ្ឋរងគ្រោះនិងងាយរងគ្រោះនៅក្នុងរាជធានីភ្នំពេញ

ភ្នំពេញ៖ ទ័យទានមួយចំនួន ដែលមានទាំងអង្ករគ្រឿងឧបភោគ បរិភោគ សម្ភារៈប្រើប្រាស់ផ្ទះបាយនិងបច្ច័យមួយចំនួនត្រូវបានព្រះចៅអធិការវត្តប្រាសាទប្រគល់ជូនសាខាកាកបាទក្រហមរាជធានីភ្នំពេញដើម្បីបន្តយកទៅចែកចាយប្រជាពលរដ្ឋដែលរងគ្រោះនិងងាយរងគ្រោះនៅក្នុងរាជធានីភ្នំពេញ។
ពិធីប្រគល់និងទទួលទ័យទាននិងថវិកាទាំងនេះបានធ្វើឡើងកាលពីព្រឹកថ្ងៃទី០៥ខែសីហាឆ្នាំ២០២០ នៅក្នុងទីអារាមវត្តប្រាសាទស្ថិតនៅ ក្នុងសង្កាត់ពញាពន់ ខណ្ឌព្រែកព្នៅ រាជធានីភ្នំពេញ ក្រោមវត្តមាន
លោក ឃួង ស្រេង អភិបាលនៃគណៈអភិបាលរាជធានីភ្នំពេញនិងជាប្រធានគណៈកម្មាធិការសាខាកាកបាទក្រហមកម្ពុជា​ រាជធានីភ្នំពេញ។
លោកឃួង ស្រេង ក្នុងឱកាសនោះបានមានប្រសាសន៍លើកឡើងថា ការប្រគល់នូវទ័យទាននិងថវិការបស់ព្រះធម្មធម៌សោម ស៊ីម ព្រះចៅអធិការវត្យន្រាសាទនិងជាព្រះអនុគុណខណ្ឌព្រែកព្នៅមកសាខាកាកបាទក្រហមរាជធានីភ្នំពេញនេះ គឺពិតជាបានបង្ហាញឲ្យឃើញពីភាពសិ្នទ្ធស្នាល រវាងពុទ្ធចក្រនិងអាណាចក្រ ។ លោកបញ្ជាក់ថា ពុទ្ធចក្រនិងអាណាចក្រ ដើរទទឹមគ្នា មានន័យថា បើអាណាចក្រមានការរីកចម្រើនពុទ្ធចក្រក៏មានការរីកចម្រើនដូចគ្នា ហើយអាណាចក្រជួបបញ្ហា ពុទ្ធចក្រក៏ជួបបញ្ហាដែរ។ជាក់ស្ដែងនៅក្នុងសម័យប៉ុលពត អាណាចក្របានធ្លាក់ដល់ចំណុចសូន្យ ក្នុងនោះពុទ្ធចក្រ ក៏បានធ្លាក់ដល់ចំណុចសូន្យដូចគ្នាដែរ។
ក្នុងឱកាសនោះដែរ លោកឃួង ស្រេងក៏បានលើកឡើងពីបញ្ហាជំងឺរាតត្បាតនៅលើពិភពលោកដោយលោកបញ្ជាក់ថា ជំងឺរាតត្បាត ហើយមានសភាពសាហាវ នៅលើពិភពលោកយើងនេះ
តែងតែកើតមានឡើង ១០ឬ២០ឆ្នាំម្ដង ។ជាក់នៅពេលនេះ ពិភពលោក ក៏ដូចជានៅព្រះរាជាណាចក្រកម្ពុជារបស់យើងគឺបាននិងកំពុងប្រឈមទៅនឹងជំងឺកូវីដ-១៩ ។ ប៉ុន្តែក្រោមការដឹកនាំគ្រប់គ្រងរបស់សម្ដេចតេជោហ៊ុនសែន កម្ពុជាយើងការពារនិងទប់ស្កាត់បានល្អប្រសើរ ដោយមកដល់ពេលនេះមិនមានមនុស្សណាម្នាក់ស្លាប់ដោយជម្ងឺនេះឡើយ។
ព្រះធម្មធម៌សោម ស៊ីម ព្រះចៅអធិការវត្យន្រាសាទនិងជាព្រះអនុគុណខណ្ឌព្រែកព្នៅ បានមានសង្ឃដីកាលើកឡើងថា ការផ្ដល់នូវទ័យទាននិងថវិកានេះគឺដើម្បីឲ្យសាខាកាកបាទក្រហមរាជធានីភ្នំពេញបន្តយកទៅចែកជូនប្រជាពលរដ្ឋដែលរងគ្រោះនិងប្រជាពលរដ្ឋដែលងាយរងគ្រោះដោយមិនប្រកាន់និន្នាការនយោបាយអ្វីឡើយ។
ព្រះធម្មធម៌សោម ស៊ីម មានសង្ឃដីកាបន្តទៀតថា ក្រោមការដឹកនាំរបស់សម្ដេចតេជោហ៊ុនសែនគឺបានធ្វើអោយប្រទេសកម្ពុជាមានសុខសន្តិភាព មានហេដ្ឋារចនាសម្ព័ន្ធ មានការអភិវឌ្ឍគ្រប់ទីកន្លែង ប្រជាពលរដ្ឋអាចធ្វើដំណើរបានទាំងយប់ទាំងថ្ងៃ ទៅតាមបណ្ដាខេត្តនានា ដោយមិនមានការព្រួយបារម្ភ ពីបញ្ហាសន្តិសុខឡើយ។
គួរបញ្ជាក់ផងដែរថា ទេយ្យទានដែលព្រះចៅអធិការវត្តប្រាសាទ ប្រគល់ជូនសាខាកាកបាទក្រហមរាជធានីភ្នំពេញខាងលើនេះ រួមមានអង្គ ៥តោន ទឹកបរិសុទ្ធ ទឹកក្រូច ទឹកត្រី ទឹកស៊ីអ៊ីវ ទឹកដោះគោ ត្រីខ មីប្រេងឆា ស្ករស អំបិល សម្ភារៈប្រើប្រាស់ផ្ទះបាយមួយចំនួននិងបច្ច័យចំនួន៣០០០ដុល្លារអាមេរិក៕