ស្លាប់២របួស៥នាក់ ក្រទ្បាប់រថយន្តធ្លាក់ផ្លូវ ពេលនាំគ្រួសារដើរលេងពីព្រះវិហារមកគូលែន
ខេត្តព្រះវិហារ ៖ យ៉ាងហោចណាស់មនុស្ស ២នាក់ បានស្លាប់ភ្លាមៗនៅកន្លែងកើតហេតុ និងមនុស្ស ៥នាក់ ទៀតបានរងរបួសធ្ងន់ស្រាល ក្នុងករណីគ្រោះថ្នាក់ចរាចរណ៍ក្រឡាប់រថយន្តនៅខេត្តព្រះវិហារ ពេលនាំគ្រួសារដើរលេងពីព្រះវិហារមកគូលែន
នាល្ងាចថ្ងៃទី២៣ ខែសីហា ឆ្នាំ២០២០។ សមត្ថកិច្ចបានអះអាងថា គ្រោះថ្នាក់នេះកើតឡើងដោយរថយន្តបើកវ៉ាជែងក្នុងស្ថានភាពគ្រោះថ្នាក់ មិនប្រុងប្រយ័ត្ន និងធ្វេសប្រហែស ទើបបង្កឲ្យមានសោកនាដកម្មយ៉ាងដូច្នេះ។
មុនពេលកើតហេតុ រថយន្តខាងលើបានដឹកសមាជិកគ្រួសារចំនួន ៨នាក់ ធ្វើដំណើរចេញពីខេត្តព្រះវិហារ ឆ្ពោះទៅស្រុកគូលែន លុះដល់កន្លែងកើតហេតុរថយន្តខាងលើ តៃកុងរថយន្តបានបន្ថែមល្បឿនឡើងវ៉ាជែងរថយន្តខាងមុខ ដោយសារល្បឿនលឿនយកចង្កូត ជ្រុលធ្លាក់ចេញពីផ្លូវជាតិ បណ្តាលឱ្យក្រឡាប់ដោយខ្លួនឯងជាច្រើនត្រឡប់ បណ្តាលឱ្យស្លាប់ ២នាក់ និងរបួសធ្ងន់ស្រាល ៥នាក់។
រថយន្តដែលក្រឡាប់ម៉ាក តូយ៉តា តាកូម៉ា ពណ៌ទឹកប្រាក់ ពាក់ផ្លាកលេខភ្នំពេញ 2Z- 7512 បើកបរដោយឈ្មោះ ម៉ៅ ណាល់ អាយុ៣៩ឆ្នាំ រស់នៅភូមិបរិបូរណ៍ ឃុំត្បែងពីរ ស្រុកគូលែន ខេត្តព្រះវិហារ។ ចំណែកអ្នកស្លាប់២នាក់ ទី១ ឈ្មោះ ស្រី និច ភេទស្រី អាយុ២៥ឆ្នាំ ទី២៖ ឈ្មោះ ណាល់ ផានិត ភេទប្រុស អាយុ១២ឆ្នាំ។ អ្នករបួស ទី១៖ ឈ្មោះ ម៉ៅ សិលា ភេទស្រី ទី២៖ ឈ្មោះ ម៉ៅ រិទ្ធយុង ភេទប្រុស ទី៣៖ ឈ្មោះ ស្រី សៅ ភេទប្រុស អាយុ២១ឆ្នាំ ទី៤៖ ឈ្មោះ ម៉ុច មឿង ភេទស្រី អាយុ៦២ឆ្នាំ ទី៥៖ ឈ្មោះ លឿន ភេទស្រី អាយុ៦៣ឆ្នាំ។
ក្រោយហេតុការណ៍កើតឡើង សមត្ថកិច្ចបានចុះដល់កន្លែងកើតហេតុ និងទាក់ទងរថយន្តសង្គ្រោះបន្ទាន់ របស់ស្នងការដ្ឋាននគរបាលខេត្ត ព្រះវិហារ ដឹកអ្នករបួសទៅព្យាបាលភ្លាមៗ នៅមន្ទីរពេទ្យបង្អែកខេត្ត ចំណែកសាកសព បានប្រគល់ជូនក្រុមគ្រួសារ យកទៅធ្វើបុណ្យតាមប្រពៃណី ហើយរថយន្តត្រូវបានស្ទូចយកមករក្សាទុកនៅអធិការដ្ឋាននគរបាលស្រុក៕
