បុរសម្នាក់បើកគោយន្ដកន្រ្តៃទៅដកដំឡូង ត្រូវឈើស្ពានធ្លាក់សង្កាត់ស្លាប់នៅនិងកន្លែងកើតហេតុ

ឧត្ដរមានជ័យ៖ បុរសម្នាក់បានស្លាប់ភ្លាមៗនៅនិងកន្លែងកើតហេតុដោយសាឈើស្ពានធ្លាក់សង្កាត់ជាប់ចូលទៅក្នុងទឹក កាលពីវេលាម៉ោង១៥និង៣០នាទីល្ងាចថ្ងៃទី២៦ ខែសីហា ឆ្នាំ២០២០ ស្ថិតនៅភូមិថ្នល់កែង ឃុំត្រពាំងប្រាសាទ ស្រុកត្រពាំងប្រាសាទខេត្តឧត្ដរមានជ័យ។

សមត្ថកិច្ចបានអោយដឹងថា នៅវេលាម៉ោង១៥នឹង៣០នាទីល្ងាច បានទទួលសេចក្តីរាយការណ៍ពីកម្លាំងប្រជាការពារ ថាមានករណីឈើស្ពានមួយកន្លែង នៅចំណុចចំការកៅស៊ូ របស់ក្រុមហ៊ុន បេសរ៉ូយយ៉ាល់ បានធ្លាក់សង្កត់លើមនុស្សបណ្តាលអោយរងគ្រោះស្លាប់ចំនួន០១នាក់ ស្ថិតនៅក្នុងភូមិថ្នល់កែង ឃុំស្រុកត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ។

ក្រោយទទួលដំណឹង លោកអធិការ បានចាត់ផ្នែកជំនាញ ចុះពិនិត្យធ្វើកោសល្យវិច្ច័យជនរងគ្រោះ និងកន្លែងកើតហេតុ ៖ ជនរងគ្រោះមាន ឈ្មោះ ស្រឿន ទូច ភេទប្រុស អាយុ៤៤ឆ្នាំ មុខរបរ កសិករ មានទីលំនៅភូមិ-ឃុំ កើតហេតុខាងលើ។

យោងតាមការបំភ្លឺរបស់ឈ្មោះ អ៊ុន អូន ភេទស្រី អាយុ៤៥ឆ្នាំ ជាប្រពន្ធជនរងគ្រោះ បានឲ្យដឹងថា នៅវេលាម៉ោង១១នឹង០០នាទី ប្តីរបស់គាត់ (ជនរងគ្រោះ) ជាមួយនិងកូន០២នាក់ បានជិះគោយន្តចេញផ្ទះដើម្បីទៅដកដំឡូងនៅចំការ លុះធ្វើដំណើរដល់កន្លែងកើតហេតុ ប្តីរបស់គាត់បានឃើញស្ពានមានសភាពទ្រុឌទ្រោម ឃើញដូចនេះគាត់ក៏បានចុះពិនិត្យមើល ក៏បានឃើញខ្សែកាបនៅជាប់ជាមួយឈើស្ពានស្រាប់ គាត់បានចុះទៅក្រោមស្ពានដើម្បីយកខ្សែកាបនោះមកចង ពេលនោះឈើស្ពានក៏បានស្រុតសង្កត់ពីលើ រើខ្លួនពុំរួចនៅក្នុងទឹកជម្រៅ០.៥០ម៉ែត្រ បណ្តាលឲ្យដាច់ខ្យល់ស្លាប់នៅកន្លែងកើតហេតុ។

ការសន្និដ្ឋាន ៖ យោងការបំភ្លឺ និងការពិនិត្យ ជនរងគ្រោះពិតជាស្លាប់ដោយសារត្រូវឈើស្ពានសង្កត់ ដកដង្ហើមពុំរួច បណ្តាលអោយដាច់ខ្យល់ស្លាប់ ប្រាកដមែន។ ក្រោយធ្វើការពិនិត្យរួចរាល់ សមត្ថកិច្ច បានប្រគល់សាកសពទៅក្រុមគ្រួសារដើម្បីធ្វើបុណ្យទៅតាមប្រពៃណី៕