សម្តេចពិជ័យសេនា អញ្ជើញប្រគល់ផែនទីឋានលេខាព្រំដែនខ្នាត ១/២៥០០០ជូនដល់ក្រសួង ស្ថាប័ន និងអង្គភាពចំនួន៣៥

ភ្នំពេញ៖ សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ តំណាងសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានផ្តល់បទសម្ភាសន៍ដល់អ្នកសារព័ត៌មាននៅក្នុងឱកាសដែលសម្តេចពិជ័យសេនា អញ្ជើញប្រគល់ផែនទីឋានលេខាព្រំដែនខ្នាត ១/២៥០០០ជូនដល់ក្រសួង ស្ថាប័ន និងអង្គភាពចំនួន៣៥ នាព្រឹកថ្ងៃទី២៧ ខែសីហា ឆ្នាំ២០២០ នៅវិមានសន្តិភាពទីស្តីការគណៈរដ្ឋមន្រ្តី ។

សម្តេចពិជ័យសេនា ទៀ បាញ់ បានគូសបញ្ជាក់ថា៖ ជារឿងពិសេសខ្លាំងណាស់ដែលយើងធ្វើការងារនេះបានយ៉ាងល្អប្រសើរបំផុតក្នុងប្រវត្តិសាស្រ្តជាតិដែលមិនធ្លាប់មានការដែលរៀបចំបោះបានផែនទីថ្មីខ្នាត ១/២៥០០០នេះ វាជាជោគជ័យមួយដ៏ធំធេងមួយដែលជាឯកសារជាតិមួយមិន ធ្លាប់មានពីមុនមក ។

សម្តេចពិជ័យសេនា បានបន្ថែមទៀតថា សម្តេច ក៏មិនអាចអត់ឱនឱ្យបានទេជាមួយអ្នកមួយចំនួនដែលបានចោទប្រកាន់ថាផែនទីថ្មី ខ្នាត ១/២៥០០០ បានបាត់ប្រទេស បាត់ទឹកដី បាត់ស្រុក បាត់ដី គឺមិនអាចអត់ឱនឲ្យបានជាដាច់ខាតព្រោះជារឿងសំខាន់បំផុតរបស់ប្រទេសជាតិយើង។ប្រទេសជាតិយើងបានទទួលផែនទីខ្នាត ១/២៥០០០ ទុកជាឯកសារជាតិសម្រាប់ប្រើប្រាស់ ទម្រាំយើងទទួលបានផែនទីមកទុក វាជាការលំបាកណាស់មិនមែនជាការងាយស្រួលនោះទេ។ដោយយើងធ្វើការឱ្យមានការ ឯកភាពគ្នា មានគេ មានយើងគឺត្រូវមានការឯកភាពទាំងសងខាងជាមួយអ្នកជិតខាងយើងនិយាយរួម គឺមានការចរចាគ្នាទម្រាំឯកភាពសម្រេចបានគឺមានការលំបាកណាស់ បែរជាមានការចោទប្រកាន់ទៅជារឿងផ្សេងដែលប៉ះពាល់ដល់ផ្លូវច្បាប់ ការធ្វើគឺមានការឆ្លងកាត់ផ្លូវច្បាប់ទាំងអស់គឺច្បាប់បានអនុញ្ញាតឲ្យគណៈកម្មាធិការចម្រុះព្រំដែនធ្វើដោយបានអនុម័តច្បាប់ទាំងអស់ដោយមានការឆ្លងកាត់រដ្ឋសភាអនុម័តត្រឹមត្រូវទាំងអស់ បែរជាមកចោទគ្មានមូលដ្ឋានច្បាស់លាស់ទាល់តែសោះគឺមិនអាចអត់ឱនឱ្យបានជាដាច់ខាត។ ចំពោះការចោទប្រកាន់គឺត្រូវប្រឈមមុខវិធានការផ្លូវច្បាប់ព្រោះអ្នកប្រជាភិថុតិ ចំពោះអ្នកដែលនិយាយមិនមានមូលដ្ឋាននៃការពិតយើងនឹងយកវិធានការច្បាប់មកប្រើប្រាស់។

សម្តេចពិជ័យសេនា បានលើកឡើងថា សម្តេចមានការងឿងឆ្ងល់ថា ព្រំដែនយើងមានភាពមិនប្រក្រតីមួយចំនួនជាមួយថៃដែរ តែហេតុអីអ្នកមួយចំនួនមិនយកមកដេញដោលមកចោទរដ្ឋាភិបាលទាល់តែសោះ បែរជារឿងដែលធ្វើដោយហ្មត់ចត់ត្រឹមត្រូវបំផុតមកចោទថាបែបនេះបែបនោះទៅវិញ រហូតប្រើពាក្យមួយចំនួនប៉ះពាល់ដល់ផ្លូវច្បាប់ដែលយើងមិនអាចអត់ឱនឱ្យបានគឺរហូតដល់ទៅប្រើពាក្យថាក្បត់ជាតិ កាត់ដីឲ្យវៀតណាម ហៅថាលក់ដីឲ្យវៀតណាមគឺមិនអាចអត់ឱនឱ្យបានទេ ។

សម្តេចពិជ័យសេនាបន្ត សម្តេចបានធ្វើ ដំណើរទៅព្រំដែនប្រទេសថៃឃើញមានកន្លែងមួយចំនួនមានស្លាកស្នាមមានភាពមិនប្រក្រតីមួយចំនួនដែរ ចុះហេតុអីក៏មិនជួយលើកឡើងផងបើសិនអ្នកនោះជាអ្នកស្នេហាជាតិពិតប្រាកដ ដែលជាអ្នកការពារអធិបតេយ្យភាពរបស់ខ្លួនពិតប្រាកដបែរជាមិនលើកឡើងទាល់តែសោះ បែរជាទៅ លើកឡើងតែរឿងដែលគេធ្វើត្រឹមត្រូវទៅវិញ ។ ការងារព្រំដែនសួរ ឯកឧត្តម វ៉ា គឹមហុងគឺមិនមែនទើបតែធ្វើមួយថ្ងៃ ពីរថ្ងៃចប់នោះទេ ហើយក៏មិនមែនទើបធ្វើឥឡូវនេះទេគឺធ្វើតាំងពីសម័យមុនមកម៉្លេះ តាំងពីសម័យសង្គមរាស្រ្តនិយមមកម៉្លេះ គឺធ្វើដោយផ្អែកលើផ្លូវច្បាប់ទាំងស្រុងទៅលើផែនទីដែលយើងមានតាមផ្លូវច្បាប់ដែលអន្តរជាតិទទួលស្គាល់។

សម្តេចពិជ័យសេនា ថ្លែងថា ជាមួយថៃកន្លែងខ្លះមិនប្រក្រតីយើងត្រូវបន្តជាមួយគ្នាតទៅទៀតដរាបណាមានការឯកភាព ដូចយើងបានធ្វើជាមួយវៀតណាម គឺធ្វើបានជិត ៨៤%នេះទើបយើងចាត់ទុកថា ជាប្រសិទ្ធភាពមែនទែនក្នុងព្រំដែនរបស់យើង ។

សម្តេចពិជ័យសេនា បានបញ្ជាក់ថា” នេះហើយជាផែនទីដែលយើងធ្វើបានថ្មីបោះពុម្ពផែនទីខ្នាត ១/២៥០០០នេះច្បាស់លាស់តែមិនទាន់បានកំណត់ថាថ្ងៃណាយកទៅតម្កល់នៅអង្គការសហប្រជាជាតិនៅ ឡើយទេ។ ក៏ប៉ុន្តែគឺសម្រាប់ឲ្យយើងទាំងអស់គ្នាយកទៅប្រើប្រាស់ គឺនេះហើយជាផែនទីដ៏ពិតប្រាកដដែលពីមុនមកមិនទាន់មានទេ និងច្បាស់ លាស់នៅក្នុងឧបសគ្គឬលើទឹកដីជាក់ស្តែងនីមួយៗ។ ដោយយើងបានបោះបង្គោលជាការសម្គាល់ជាក់លាក់ដែលពីមុនមិនដែលធ្វើបានទេ លើកនេះយើងធ្វើបានដោយមានចែងពិតប្រាកដដោយបានប្រគល់ឱ្យបណ្តាស្ថាប័នទាំងអស់កាន់ កាប់ជាមោទនភាពខ្លាំងណាស់
គឺយើងមានមូលដ្ឋានរឹងមាំដើម្បីដោះស្រាយបញ្ហារបស់យើង ។ បញ្ហានៅសេសសល់គឺយើងចង់បញ្ចប់ឱ្យឆាប់ណាស់តែត្រូវមានការឯកភាពជាមួយវៀតណាមត្រូវចរចាទោះបីនៅបន្តិចបន្តួចតែ ១៦%ក៏ដោយទាល់តែឯកភាពទាំងសងខាងទើបបានចប់ព្រោះមិនមែនជាការងាយស្រួលនោះទេ បើយើងតែម្នាក់ឯងគឺឥតបញ្ហាទេចប់ស្អែកក៏បានដែរគឺត្រូវដោះស្រាយដោយមានការឯកភាពទាំងសងខាងទើបចប់បាន “៕