ក្រសួងមហាផ្ទៃ បើកកិច្ចប្រជុំបន្តពិនិត្យ និងពិភាក្សាលើសេចក្តីព្រាងច្បាប់ស្តីពី សណ្តាប់ធ្នាប់សាធារណៈ តែសង្គមស៊ីវិលសម្ដែងកង្វល់ចំពោះមាត្រាមួយចំនួន
ភ្នំពេញ៖ ទីស្ដីការក្រសួងមហាផ្ទៃ នា ថ្ងៃព្រហស្បតិ៍ ទី២៧ ខែសីហា ឆ្នាំ២០២០ ក្រសួងមហាផ្ទៃ បានបើកកិច្ចប្រជុំបន្តពិនិត្យ និងពិភាក្សាលើសេចក្តីព្រាងច្បាប់ស្តីពី សណ្តាប់ធ្នាប់សាធារណៈ ក្រោមអធិបតីភាព ឯកឧត្តម នាយឧត្តមសេនីយ៍ សន្តិបណ្ឌិត អ៊ុក គឹមលេខ រដ្ឋលេខាធិការក្រសួងមហាផ្ទៃ ទទួលបន្ទុកការងារផែនសណ្តាប់ធ្នាប់សាធារណៈ ដោយមានការចូលរួម ឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ ឯកឧត្តម នាយឧត្តមសេនីយ៍ យុន ឈុន្នី រដ្ឋលេខាធិការក្រសួងមហាផ្ទៃ អគ្គស្នងការដ្ឋាននគរបាលជាតិ អ្នកជំនាញផ្នែកច្បាប់ ព្រមទាំង អ្នកពាក់ព័ន្ធជាច្រើនរូបទៀត។
សូមជម្រាបថា សេចក្តីព្រាងច្បាប់ស្តីពី សណ្តាប់ធ្នាប់សាធារណៈ ត្រូវបានប្រគល់ជូន រដ្ឋបាលរាជធានី-ខេត្ត យកទៅរៀបចំកិច្ចប្រជុំពិគ្រោះយោបល់ ដើម្បីធ្វើជាធាតុចូលបន្ថែមទៀត។ ហើយកិច្ចប្រជុំពិភាក្សា នាពេលព្រឹកនេះ គឺយកយោលបល់ រដ្ឋបាលរាជធានី-ខេត្ត ធ្វើជាធាតុចូល ដើម្បីកែលម្អច្បាប់នេះបន្ថែមទៀត។
ឆ្លៀតឱកាសនោះ ឯកឧត្តម នាយឧត្តមសេនីយ៍ សន្តិបណ្ឌិត អ៊ុក គឹមលេខ មានប្រសាសន៍កោតសសើរ ចំពោះក្រុមការងារ ដែលបានរៀបចំសេចក្តីព្រាងច្បាប់ស្តីពី សណ្តាប់ធ្នាប់សាធារណៈ។ ឯកឧត្តម បានបន្ដថា គិតមកដល់ពេលនេះ សេចក្ដីព្រាងច្បាប់ មានរយៈពេលជាង១ឆ្នាំហើយ ដូច្នេះ ក្រុមងារការងារត្រូវបន្ដខិតខំប្រឹងប្រែងបន្ថែមទៀត។
ឯកឧត្តម រៀបរាប់ថា ក្នុងកិច្ចប្រជុំពិភាក្សានាពេលព្រឹកនេះ មានគោលបំណងធំៗ ចំនួន២ រួមមាន ៖ រៀបរាប់អំពីដំណើរការ សេចក្ដីព្រាងច្បាប់ស្តីពី សណ្តាប់ធ្នាប់សាធារណៈ និងរៀបរាប់អំពីកម្មវត្ថុ សេចក្ដីព្រាងច្បាប់ស្ដីពី សណ្តាប់ធ្នាប់សាធារណៈ។ ឯកឧត្តមបញ្ជាក់ថា សេចក្ដីព្រាងច្បាប់នេះ ក៏បានពាក់ព័ន្ធទៅនឹងជីវភាពរបស់ប្រជាពលរដ្ឋផងដែរ ដូច្នេះ សេចក្ដីព្រាងច្បាប់នេះ ក្រុមការងារត្រូវសិក្សាឲ្យបានលម្អិតគ្រប់ជ្រុងជ្រោយ ដើម្បីធ្វើយ៉ាងណាឲ្យការអនុវត្តច្បាប់នេះប្រកបដោយប្រសិទ្ធភាពខ្ពស់ និងទទួលបានលទ្ធផលល្អប្រសើរ។
សូមរំលឹកថា សេចក្តីព្រាងច្បាប់ស្តីពី សណ្តាប់ធ្នាប់សាធារណៈ មាន៩ជំពូក និង៤៦មាត្រា ហើយច្បាប់នេះ មានគោលបំណងធានាការគ្រប់គ្រងសណ្ដាប់សាធារណៈ ឲ្យមានរបៀបរៀបរយ សោភ័ណភាព អនាម័យ បរិស្ថាន ភាពស្ងប់ស្ងាត់ សុវត្ថិភាពសង្គម រក្សាប្រពៃណីជាតិ និងសេចក្ដីថ្លៃថ្នូររបស់ប្រជាពលរដ្ឋ។
ជាងនេះទៅទៀត ច្បាប់នេះ មានវិសាលភាពអនុវត្តចំពោះរាល់សកម្មភាព ដែលពាក់ព័ន្ធនឹងសណ្ដាប់ ធ្នាប់សាធារណៈ នៅក្នុងព្រះរាជាណាចក្រកម្ពុជា។
ទោះយ៉ាងណាបើតាមការផ្សាយរបស់មជ្ឈមណ្ឌលសិទ្ធិមនុស្សកម្ពុជានៅថ្ងៃទី 29 ខែសីហាឆ្នាំ 2020 ឡើងថា
យើងខ្ញុំជាតំណាងអង្គការ និងសមាគមដែលកំពុងបំពេញបេសកកម្មដើម្បីលើកកម្ពស់សិទ្ធិស្ត្រី និងសមភាពយេនឌ័រនៅក្នុងព្រះរាជាណាចក្រកម្ពុជា សូមសម្តែងកង្វល់យ៉ាងខ្លាំងចំពោះមាត្រាជាច្រើនដែលមានចែងនៅក្នុងសេចក្ដីព្រាងច្បាប់ ស្ដីពីសណ្ដាប់ធ្នាប់សាធារណៈ (DLPO) ដែលរំលោភបំពានសិទ្ធិស្ត្រី។ យើងខ្ញុំក៏ចូលរួមគាំទ្រសំណើឱ្យទម្លាក់ចោលសេចក្ដីព្រាងច្បាប់នេះដែលបានលើកឡើងនៅក្នុង សេចក្ដីថ្លែងការណ៍រួមរបស់សង្គមស៊ីវិល ដែលបានផ្ញើជូនចំពោះរាជរដ្ឋាភិបាលកម្ពុជា ចុះថ្ងៃទី១៣ ខែសីហា ឆ្នាំ២០២០ ផងដែរ។
សង្គមស៊ីវិល បានលើកទៀតថា យើងខ្ញុំទទួលស្គាល់ និងកោតសរសើររាជរដ្ឋាភិបាលកម្ពុជា ដែលបានចាត់វិធានការវិជ្ជមានមួយចំនួន ដើម្បីដោះស្រាយបញ្ហាវិសមភាពយេនឌ័រ តាមរយៈការផ្តួចផ្តើមគំនិតក្នុងការបង្កើតគោលនយោបាយ រួមមាន ផែនការសកម្មភាពជាតិ ស្តីពីការទប់ស្កាត់អំពើហិង្សាលើស្រ្តី ដំណាក់កាល ជាច្រើន ទី ប៊ី (NAPVAW III) ដែល នឹងដាក់ឱ្យប្រើប្រាស់នាពេលឆាប់ៗខាងមុខនេះ និងផែនការយុទ្ធសាស្ត្រលើកទីប្រាំ ដើម្បីសមភាពយេនឌ័រ និង ការបង្កើនភាពអង់អាចដល់ស្ត្រីក្នុងប្រទេសកម្ពុជា (យុទ្ធសាស្រ្តនារីរតនៈទីV)។ ទោះជាយ៉ាងនេះក្តី សេចក្តី ព្រាងច្បាប់នេះ បានធ្វើឱ្យពួកយើងមានការខ្វល់ខ្វាយយ៉ាងខ្លាំង ពីផលប៉ះពាល់នៃសេចក្តីព្រាងច្បាប់នេះ ក្នុង ការដាក់ទណ្ឌកម្មស្ត្រីចំពោះការស្លៀកពាក់ និងអាកប្បកិរិយា ដែលត្រូវបានបកស្រាយថាមានការបំពានលើ ក្រឹត្យក្រមសង្គមដែលមានលក្ខណៈរើសអើងទាក់ទងទៅនឹងការស្លៀកពាក់ និងការប្រព្រឹត្តរបស់ស្ត្រី៕
