«កិច្ចប្រជុំចង្អៀតពីការវិវឌ្ឍនៃការនាំចេញអង្ករកម្ពុជា ក្នុងខែសីហា ឆ្នាំ២០២០ និងផលប៉ះពាល់ និងវិស័យស្រូវអង្ករនាពេលខាងមុខ»

ភ្នំពេញ៖
នារសៀល ថ្ងៃទី២៧ ខែសីហា ឆ្នាំ២០២០ នាស្តីការក្រសួងពាណិជ្ជកម្ម ឧកញ៉ា សុង សារ៉ន ប្រធានសហព័ន្ធស្រូវអង្ករកម្ពុជា (ស.អ.ក) រួមជាមួយអនុប្រធាន នឹងទីប្រឹក្សាប្រតិបត្តិរបស់សហព័ន្ធស្រូវអង្ករ កម្ពុជា ចំនួន ៦រូប បានចូលរួមក្នុង “កិច្ចប្រជុំចង្អៀតស្តីពីការវិវឌ្ឍនៃការនាំចេញអង្ករកម្ពុជា ក្នុងខែសីហា ឆ្នាំ២០២០ និងផលប៉ះពាល់ និងវិស័យស្រូវអង្ករនាពេលខាងមុខ” ដែលកិច្ចប្រជុំនេះ ដឹកនាំដោយ ឯកឧត្តម បួន សារៈមុនី រដ្ឋលេខាធិការ ក្រសួងពាណិជ្ជកម្ម និងចូលរួមដោយ ឯកឧត្តម ចាន់ សុខទី ប្រតិភូរាជរដ្ឋាភិបាល ទទួលបន្ទុកជាអគ្គនាយកក្រុមហ៊ុនហ្រ្គីនត្រេដ។

កិច្ចប្រជុំចង្អៀតនេះ ត្រូវបានរៀបចំឡើងជាបន្ទាន់ តបតាមការស្នើរបស់សហព័ន្ធស្រូវអង្ករកម្ពុជា ដែលស្នើឱ្យក្រសួងពាណិជ្ជកម្ម ក្នុងនាមជាអាណាព្យាបាលរបស់សហព័ន្ធ នៅក្នុងគោលបំណងរាយការណ៍ និងពិភាក្សាពីលទ្ធភាពជួយគាំទ្រពីស្ថាប័នពាក់ព័ន្ធនៅក្នុងរាជរដ្ឋាភិបាល ដើម្បីជួយដោះស្រាយ និងដាក់ចេញនូវផែនការសកម្មភាពក្នុងការជួយជំរុញផលិតកម្មស្រូវអង្ករ និងការនាំចេញស្របតាមគោលនយោបាយរបស់រាជរដ្ឋាភិបាលកម្ពុជា។

របៀបវារៈចំនួន៤ ត្រូវបានលើកឡើងនៅក្នុងអង្គប្រជុំនេះ រួមមាន៖ ១.) ការបម្រែបម្រួល អាកាសធាតុ ដែលជំរុញអោយមានភាពយឺតយ៉ាវក្នុងការប្រមូលផល និងទិន្នផល ជាពិសេសប្រភេទស្រូវសែនក្រអូប ២.) ភាពយឺតយ៉ាវក្នុងការផ្តល់ទិន្នផលបានជំរុញអោយការ នាំចេញអង្ករធ្លាក់ចុះយ៉ាងគំហុក ជាពិសេសក្នុងខែសីហា ហើយនិងឈានដល់ខែកញ្ញាផងដែរ ៣.) ការព្រួយបារម្ភក្នុងរយៈពេលវែងខាងមុខលើការបម្រែបម្រួលអាកាសធាតុលើសន្តិសុខស្បៀងក្នុងស្រុក និង ៤.) ឥណទានបន្ថែមសម្រាប់ទិញស្រូវពីប្រជាកសិករ និងលក្ខខណ្ឌបង្វិល។

ឯកឧត្តមប្រធានអង្គប្រជុំ បានទទួលយកនូវចំណុចដែលបានពិភាក្សា និងសំណូមពរដែលបានលើកឡើងនៅក្នុងអង្គប្រជុំ រូចនឹងលើកឡើងនៅក្នុង “កិច្ចប្រជុំពិនិត្យ និងវាយតម្លៃការប្រមូលផលស្រូវដើមដៃ និងការនាំចេញអង្ករ” ដើម្បីសុំជាគោលការណ៍ និងការអន្តរាគមន៍ផ្សេងៗ នាទីស្តីក្រសួងសេដ្ឋកិច្ចនិងហិរញ្ញវត្ថុ នាថ្ងៃទី២៨ ខែសីហា ឆ្នាំ២០២០នេះ៕