ក្រសួងសុខាភិបាល ប្រកាសហាមមិនឱ្យលក់គ្រឿងសម្អាងម៉ាក «ស្រីម៉ា ស្គីនឃែ» និង «ស្រីម៉ា រក្សាសម្រស់ PSM» ព្រោះជាផលិតផលមិនស្របច្បាប់

(ភ្នំពេញ)៖ ក្រសួងសុខាភិបាល បានចេញសេចក្ដីជូនព័ត៌មានស្ដីពី ការហាមឃាត់ការផ្សព្វផ្សាយលក់ផលិតផលគ្រឿងសម្អាងម៉ាក «ស្រីម៉ា ស្គីនឃែ» និង «ស្រីម៉ា រក្សាសម្រស់ PSM» នៅលើគណនី Facebook ឈ្មោះ «ស្រីម៉ា រក្សសម្រស់» និងគណនីផ្សេងៗជាច្រើនទៀត ព្រោះដោយសារផលិតផលនេះគ្មានលេខប្រវេសន៍ និងគ្មានការទទួលស្គាល់ពីក្រសួងសុខាភិបាល។

ជុំវិញបញ្ហានេះ ក្រសួងសុខាភិបាលបានតម្រូវឱ្យម្ចាស់គណនី Facebook ឈ្មោះ «ស្រីម៉ា រក្សាសម្រស់» និងគណនីដែលពាក់ព័ន្ធផ្សេងទៀតនោះ បញ្ឈប់ការផ្សព្វផ្សាយលក់ផលិតនេះតទៅទៀត ហើយប្រសិនបើពុំដូច្នេះទេ ក្រសួងនឹងចាត់វិធានការតឹងរឹងតាមផ្លូវច្បាប់ជាក់ជាមិនខាន។

ក្រសួងសុខាភិបាលក៏បានអំពាវនាវដល់ប្រជាពលរដ្ឋទាំងអស់ សូមឈប់ជឿលើការផ្សព្វផ្សាយនៅលើបណ្ដាញសង្គម Facebook និងឈប់ប្រើប្រាស់ផលិតផលគ្រឿងសម្អាងម៉ាក «ស្រីម៉ា ស្គីនឃែ» និង «ស្រីម៉ា រក្សាសម្រស់ PSM» នេះតទៅទៀត។

ប្រសិនបើប្រជាពលរដ្ឋណាឃើញមានការចែកចាយផលិតផលហាមឃាត់នេះ សូមរាយការណ៍មកតាមរយៈលេខទូរស័ព្ទ៖ ០១២ ៣៥៥ ១៦១ / ០១១ ៥៧៤ ៧៨៧ / ០១២ ៩៨៣ ៣៣៤ / ០១៧ ៦០៦ ៦៧០ / ០១៧ ៨៦៦ ៧៦០។

ខាងក្រោមនេះជាសេចក្ដីជូនព័ត៌មានរបស់ក្រសួងសុខាភិបាល៖