នគរបាលខណ្ឌប្ញស្សីកែវបង្ក្រាបជាក់ស្តែងករណីលួចម៉ូតូ, ក្លែងលិខិតឯកសារសាធារណៈ ទទួលផលចោរកម្ម
ភ្នំពេញ ៖ នគរបាលខណ្ឌប្ញស្សីកែវ ឃាត់ខ្លួនបុរសម្នាក់ ករណីលួចម៉ូតូ, ក្លែងលិខិតឯកសារសាធារណៈ ទទួលផលចោរកម្ម រក្សាទុកនូវសារធាតុញៀនខុសច្បាប់ នៅចំណុចបន្ទប់ជួលលេខ៦ ស្ថិតនៅក្រុមទី១១ ភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ នៅថ្ងៃទី២៣ ខែកញ្ញា ឆ្នាំ២០២០ វេលាម៉ោង៨និង៣០នាទី ។
លោក ហ៊ាង ថារ៉េត អធិការនគរបាលខណ្ឌប្ញស្សីកែវ បានអោយដឹងថា ជនសង្ស័យឈ្មោះ យី ណារ៉េត ភេទប្រុស អាយុ៣៣ឆ្នាំ មុខរបរទិញលក់ម៉ូតូ ស្នាក់នៅផ្ទះជួល ក្រុមទី១១ ភូមិក្រោលគោ សង្កាត់គីឡូម៉ែត្រលេខ៦ ខណ្ឌឬស្សីកែវ រាជធានីភ្នំពេញ មានសារធាតុញៀន។
ចំណែកជនរងគ្រោះឈ្មោះ ដាវ សុវន្ត័ ភេទប្រុស អាយុ២៧ឆ្នាំ មុខរបរបេីកបរ ស្នាក់នៅផ្ទះជួល ភូមិបឹងសាឡាង សង្កាត់ឫស្សីកែវ ខណ្ឌឬស្សីកែវ ។
ក្នុងនោះ សមត្ថកិច្ចដកហូតបានម៉ូតូ ១គ្រឿង ម៉ាកស្កុបពី ពណ៌ស ពាក់ស្លាកលេខ ភ្នំពេញ 1IE-8531 បណ្ណ័សម្គាល់យានយន្តចំនួន៥សន្លឹក, ថ្នាំក្រាម ពណ៌សថ្លា ចំនួន ២កញ្ចប់ (តូចមួយធំមួយ) និងទូរស័ព្ទដៃចំនួន ១គ្រឿងម៉ាកវីវ៉ូ ពណ៌ខ្មៅ ។
សមត្ថកិច្ចខណ្ឌប្ញស្សីកែវ បានអោយដឹងថា នៅថ្ងៃទី១៨ ខែកញ្ញាឆ្នាំ២០២០ វេលាម៉ោង ១៧និង ៣០នាទី ជនរងគ្រោះ បានបាត់ម៉ូតូរបស់ខ្លួន នៅក្នុងសង្កាត់បឹងកក់២ ខណ្ឌទួលគោក។ លុះដល់ថ្ងៃទី២៣ ខែកញ្ញាឆ្នាំ២០២០ វេលាម៉ោង ៨និង៣០នាទី ជនរងគ្រោះបានប្រទះឃើញម៉ូតូរបស់ខ្លួនដែលជនសង្ស័យកំពុងជិះនៅចំនុចមុខបន្ទប់ជួលខាងលើ ហើយក៏បានប្ដឹងរាយការណ៍ ឈានដល់ការ បង្ក្រាបជាក់ស្ដែង ឃាត់ខ្លួនជនសង្ស័យរួមទាំងវត្ថុតាងខាងលេី។
បច្ចុប្បន្នជនសង្ស័យ រួមទាំងវត្ថុតាងដកហូតបានត្រូវបានកសាងសំណុំរឿងបញ្ជូនទៅសាលាដំបូងរាជធានីភ្នំពេញអនុវត្តទៅតាមនីតិវិធីច្បាប់។ ដោយឡែកម៉ូតូបានប្រគល់ឲ្យជនរងគ្រោះវិញ ៕
