និស្សិតម្នាក់ ត្រូវរថយន្តបើកបុក និងកិនបែកក្បាលស្លាប់ភ្លាមៗ នៅកន្លែងកើតហេតុ
ភ្នំពេញ៖ យុវជនម្នាក់ដែលជានិស្សិតជិះម៉ូតូមួយគ្រឿង ត្រូវបានរថយន្តមីតស៊ុយប៊ីស៊ីមួយគ្រឿងបើកបុកពីក្រោយ និងកិនបែកក្បាលស្លាប់ភ្លាមៗចំណែកជនបង្ករត់គេចខ្លួនបាត់ស្រមោល សល់តែរថយន្តនៅកន្លែងកើតហេតុ។
ហេតុការណ៍នេះកើតឡើងកាលពីវេលាម៉ោង១១និង៥០ចូលថ្ងៃទី៣០ ខែកញ្ញាឆ្នាំ២០២០ស្ថិតនៅចំណុចផ្ទះលក់ដែកមួយកន្លែង ស្ថិតនៅតាមបណ្តោយផ្លូវ៣៧១ក្នុងភូមិក្បាលទំនប់ សង្កាត់បឹងជំពុនទី2 ខណ្ឌមានជ័យ រាជធានីភ្នំពេញ។
តាមប្រភពព័ត៌មានពីអ្នកឃើញហេតុការណ៍ នៅកន្លែងកើតហេតុបានឲ្យដឹងថា មុនកើតហេតុគេឃើញជនរងគ្រោះជិះម៉ូតូមួយគ្រឿងម៉ាកឃ្លីក ពណ៌ស ពាក់ផ្លាកលេខ ភ្នំពេញ1HP 1535 ធ្វើដំណើរទិសដៅពីជើងទៅត្បូង ខណៈមកដល់ចំណុចកើតហេតុខាងលើ ជនរងគ្រោះត្រូវបានរថយន្តបុកពីក្រោយនិងកិនចំក្បាលបែកក្បាលស្លាប់ភ្លាមៗ ចំណែកឯជនបង្កបានរត់គេចខ្លួនបាត់ស្រមោល រថយន្តបង្កពាក់ផ្លាកលេខ ភ្នំពេញ 3D8785 បើកបរដោយជនមិនស្គាល់ឈ្នោះ និងអាសយដ្ឋាន ជនបង្កបានរត់គេចខ្លួនបាត់ស្រមោល ទុកតែរថយន្តនៅកន្លែងកើតហេតុ។
ក្រោយកើតហេតុសមត្ថកិច្ចបានចុះមកដល់បានទំនាក់ទំនង ទៅសមត្ថកិច្ចជំនាញចុះមកធ្វើការវាស់វែង យកម៉ូតូជនរងគ្រោះទៅរក្សាបណ្តោះអាសន្ន នៅស្នងការនគរបាលចរាចរណ៍ផ្លូវគោក រងចាំប្រគល់ជូនសាច់ញាតិវិញ។ ដោយឡែកសពជនរងគ្រោះសមត្ថកិច្ចធ្វើការយកទៅតម្កល់ទុកនៅវត្តសំបូរមាស រង់ចាំ សាច់ញាតិមកទទួលយកទៅធ្វើបុណ្យតាមប្រពៃណី៕
