អភិបាលរាជធានីភ្នំពេញ ចុះសួរសុខទុក្ខ ប្រជាពលរដ្ឋ នៅបុរីសន្តិភាព២ និងបានសម្រេចធ្វើផ្លូវ៧ខ្សែ លូមេ៤ខែ្ស នៅសង្កាត់ចោមចៅ២

ភ្នំពេញ៖ អភិបាលរាជធានីភ្នំពេញ លោក ឃួង ស្រេង កាលពីព្រឹកថ្ងៃទី៣ ខែសីហា នេះ បានដឹកនាំ មន្រ្តីជំនាញ និងអាជ្ញាធរមូលដ្ឋាន ចុះជួបសំណេះសំណាល សួរសុខទុក្ខ និងស្តាប់នូវសំណូមពរ របស់ប្រជាពលរដ្ឋ រស់នៅសហគម បុរីសន្តិភាព២ សង្កាត់ចោមចៅទី២ ខណ្ឌពោធិ៍សែនជ័យ។

  ក្នុងឱកាសនោះ លោកអភិបាល បានផ្តល់ជូនជាការដូជាច្រើន ដល់ប្រជាពលរដ្ឋនៅទីនោះ មានផ្លូវចំនួន៧ខ្សែ និងប្រព័ន្ធលូមេ ចំនួន៤ខ្សែ តបតាមការសន្យា កាលពីមុនពេលបោះឆ្នោតជ្រើសតាំងតំណាងរាស្ត្រ នីតិកាលទី៦ កន្លងទៅនេះ។

  លោក ឃួង ស្រេង បានមានប្រសាសន៍ថា នៅក្នុងបុរីសន្តិភាព២នេះ រដ្ឋបាលរាជធានីភ្នំពេញបានកសាងសមិទ្ធិផលជាច្រើន ដើម្បីបំពេញទៅតាមតម្រូវការ ក្នុងមូលដ្ឋាន របស់ប្រជាពលរដ្ឋ ដែលពីមុនតំបន់នេះ គ្មានអ្វីទាំងអស់ តែមកដល់ឥឡូវនេះ ប្រជាពលរដ្ឋមានផ្ទះសម្បែង រស់នៅសមរម្យ មានផ្សារ មានប្រពន្ធ័ទឹក-ភ្លើងប្រើប្រាស់ មានសេវារថយន្តក្រុង និងសេវាសុខាភិបាលថែមទៀត។

  សហគមសន្តិភាព២ មានការអភិវឌ្ឍន៏មិនចាញ់សហគមដទៃទៀតក្នុងរាជធានីភ្នំពេញឡើយក្រោមការ

យកចិត្តទុកដាក់ពីអាជ្ញាធរដែនដីគ្រប់លំដាប់ថ្នាក់ ,ការយកចិត្តទុកដាក់ពីរដ្ឋបាលរាជធានីភ្នំពេញដែលតែងតែចុះជាប់ដើម្បីបានដឹងពីសុខទុក្ខរបស់បងប្អូន ជាពិសេសទទួលបានការណែនាំ និងការគិតគូរដ៏ខ្ពង់ខ្ពស់ពីសម្តេចអគ្គមហាសេនាបតីតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា ដែលតែងផ្សារភ្ជាប់សុខទុក្ខជាមួយប្រជាពលរដ្ឋជាប់ជានិច្ច។

  គួរបញ្ជាក់ថា សហគមន៏សន្តិភាព២ មានសហគមប្រជាពលរដ្ឋចំនួន៨សហគមស្មើនឹង២៥៥០គ្រួសារដែលភាគបងប្អូនភាគច្រើនប្រកបរបរលក់ដូរ,

សេវាកម្ម និងកម្មកររោងចក្រ។បងប្អូនទាំងជាង២ពាន់គ្រួសារនេះភាគច្រើនត្រូវផ្លាស់ប្តូរទីលំនៅបែបមិនរៀបរយចេញពីសហគមដីក្រហម,សហគមបឹងកក់ និង១ផ្នែកទៀតមកពីប្រភពផ្សេងៗតាំងពីឆ្នាំ២០០៦,២០០៩ និងឆ្នាំ២០១០។

   ក្នុងឱកាសនោះដែរ លោក អភិបាលរាជធានីក៏បានថ្លែងអំណរគុណ ចំពោះប្រជាពលរដ្ឋ ដែលបានទៅបោះឆ្នោតយ៉ាងច្រើនកុះករ បង្ហាញពីឆន្ទះ ក្នុងការជ្រើសរើសមេដឹកនាំ ដែលខ្លួនស្រលាញ់ពេញចិត្ត តាមបែបប្រជាធិប តេយ្យ។  លោកថា ក្នុងនាមអាជ្ញាធរ ដែលជាអាណាព្យាបាល តែងតែគិតគូរជានិច្ច ពីសុខទុក្ខប្រជាពលរដ្ឋនៅតាមមូលដ្ឋានគ្រប់ពេល ជាពិសេសនៅពេលជួបប្រទះនូវបញ្ហាប្រឈមនានា។

   បន្ទាប់ពីសំណេះសំណាល លោក អភិបាល និងមន្ត្រីក្រោមឱវាទ បានបន្តចុះ ទៅពិនិត្យមើលស្ថានភាពប្រជាពលរដ្ឋនៅភូមិ ដូនកុក សង្កាត់បឹងធំ ខណ្ឌពោធិ៍សែនជ័យ និងបានផ្តល់ផ្លូវបេតុងឆ្អឹងដែកមួយខ្សែមានប្រវែងជាង១ពាន់ម៉ែត្រ ដើម្បីសម្រួលដល់ការធ្វើដំណើរ ពីភូមិដូនកុក ទៅភូមិបឹងធំ ក្នុងសង្កាត់បឹងធំ និងទៅតំបន់ផ្សេងៗទៀត  ដែលតំបន់ទាំងនោះ បានទទួលរងដោយទឹកជំនន់លិចលង់ កាលពីពេលកន្លងទៅនេះ។  រួចពីនោះ ក្រុមប្រតិភូ សាលារាជធានីភ្នំពេញ និង អាជ្ញាធរមូលដ្ឋាន ក៏បានបន្តដំណើរ ទៅពិនិត្យមើលការសាងសង់រង្វង់មូល តាង៉ុយ ដែលស្ថិតក្នុងសង្កាត់ ឪឡោក ខណ្ឌពោធិ៍សែនជ័យផងដែរ៕