រដ្ឋមន្រ្តីធនធានទឹក៖ នារដូវប្រាំង ឆ្នាំ២០២១ នឹងចាប់ផ្តើមអនុវត្តគម្រោងអភិវឌ្ឍន៍ប្រព័ន្ធធារាសាស្ត្រផ្តល់ដោយកូរ៉េ, គ្រោះទឹកជំនន់នឹងត្រូវកាត់បន្ថយ ក្នុងខេត្តបន្ទាយមានជ័យ

ស្ថានភាពទឹកនៅច្រកទឹកខាងលើនេះមានកម្រិតធម្មតាជាប្រក្រតីនៅឡើយ បើទោះជាបានទទួលបរិមាណទឹកមួយផ្នែកហូរពីប្រទេសថៃ និងបរិមាណទឹកភ្លៀងធ្លាក់ច្រើនក៏ដោយ។ ដោយឡែក ការលិចលង់ នៅតំបន់ទំនាបភាគច្រើន នៃក្រុងសិរីសោភ័ណ គឺបណ្តាលមកពីបរិមាណទឹកភ្លៀងធ្លាក់ច្រើនលើសលប់ បើគិតពីថ្ងៃទី១៣ ដល់ថ្ងៃទី១៩ ខែតុលា ឆ្នាំ២០២០ មានបរិមាណទឹកភ្លៀងធ្លាក់ជាង ៦០០ មីលីម៉ែត្រ ហើយការជន់លិចនឹងឆាប់ហូរស្រកចុះជាបន្តបន្ទាប់ទៅវិញពេលអាកាសធាតុអំណោយផលនាពេលដ៏ខ្លីខាងមុខ។

សូមបញ្ជាក់ជូនថា ក្នុងដំណើរចុះពិនិត្យនៅតំបន់នេះ លោករដ្ឋមន្រ្តីក៏បានពិភាក្សា និងណែនាំបន្ថែមដល់ក្រុមអ្នកបច្ចេកទេសតំណាងក្រុមហ៊ុនសាងសង់កូរ៉េ បន្ទាប់ពីបានចាត់មន្រ្តីបច្ចេកទេសក្រសួង សហការជាមួយទីប្រឹក្សាបច្ចេកទេស កូរ៉េ ចុះស្រាវជ្រាវ និងសិក្សារៀបចំជាសំណើគម្រោងអស់រយៈពេលជិត១០ឆ្នាំ ទំរាំទទួលបានការគាំទ្រហិរញ្ញប្បទាន-ឥណទានពីភាគីសាធារណ:កូរ៉េ ហើយនឹងចាប់ផ្តើមអនុវត្តគម្រោងអភិវឌ្ឍន៍ប្រព័ន្ធធារាសាស្ត្រ និងកាត់បន្ថយគ្រោះទឹកជំនន់ ក្នុងខេត្តបន្ទាយមានជ័យ (Irrigation Développement and Flood Mitigation Project) នៅទីតាំងខាងលើនារដូវប្រាំងឆ្នាំ២០២១ ខាងមុខនេះ។

គម្រោងនេះបន្ទាប់ពីសាងសង់រួចមានសារសំខាន់យ៉ាងខ្លាំង ក្នុងការកាត់បន្ថយគ្រោះទឹកជំនន់ឆ្លងដែនកម្ពុជា-ថៃ ក្នុងតំបន់ជាប់ព្រំដែនស្រុកម៉ាឡៃ ក្រុងប៉ោយប៉ែត ស្រុកអូរជ្រៅ និងក្រុងសិរីសោភ័ណ ខេត្តបន្ទាយមានជ័យ ពិសេសអាចមានលទ្ធភាពផ្គត់ផ្គង់ទឹកគ្រប់គ្រាន់សម្រាប់ប្រើប្រាស់ លក្ខណៈគ្រួសារ និងមានសក្តានុពលស្រោចស្រពលើផ្ទៃដីដាំដុះស្រូវបានប្រមាណ ៣៤.៦០០ ហិកតា ថែមទៀតផង៕