មន្ត្រីមន្ទីរព័ត៌មានខេត្តកែបម្នាក់ ដែលគំរាមហែកកេរ្តិ៍ និងកំហែងទារប្រាក់តាម facebook ត្រូវសមត្ថកិច្ចចាប់វាយខ្នោះ
កែប៖ កម្លាំងផែនការងារនគរបាលព្រហ្មទណ្ឌ បានឃាត់ខ្លួន មន្ត្រីមន្ទីរព័ត៌មានខេត្តកែបម្នាក់ ករណីគំរាមហែកកេរ្តិ៍ និងកំហែងទារប្រាក់ តាម facebook តាមបណ្តឹងជនរងគ្រោះ។
រសៀលថ្ងៃទី៤ ខែវិច្ឆិកា ឆ្នាំ២០២០ អនុវត្តតាមការដឹកនាំចង្អុលបង្ហាញពីលោកឧត្តមសេនីយ៍ទោ សម្បត្តិ សុធារដ្ឋ ស្នងការនគរបាលខេត្តកែប កម្លាំងផែនការងារនគរបាលព្រហ្មទណ្ឌ ផែនការងារសន្តិសុខ និងកម្លាំងអធិការដ្ឋាននគរបាលក្រុង បានចុះស៊ើបអង្កេត ស្រាវជ្រាវ បង្ក្រាបករណីគំរាមហែកកេរ្តិ៍ និងកំហែងទារប្រាក់ តាមfacebook (តាមបណ្តឹងជនរងគ្រោះ) ដោយចាប់ឃាត់ខ្លួនជនសង្ស័យម្នាក់ឈ្មោះ អ៊ុង ចន្ថា ភេទប្រុស អាយុ៣៨ឆ្នាំ មុខរបរមន្ត្រីមន្ទីរព័ត៌មានខេត្តកែប រស់នៅភូមិអូរក្រសារ សង្កាត់អូរក្រសារ ក្រុងកែប។
ក្រោយធ្វើការសាកសួរជនសង្ស័យ បានសារភាពថា ខ្លួនពិតជាបានប្រព្រឹត្តិលើករណីនេះ ជាច្រើនលើកមកហើយ។ ជនសង្ស័យ កំពុងបំពេញសំណុំរឿងបញ្ជូនទៅសាលាដំបូងចាត់ការតាមផ្លូវច្បាប់។
លោកឧត្តមសេនីយ៍ទោ សម្បត្តិ សុធារដ្ឋ ស្នងការនគរបាលខេត្តកែប សូមសំណូមដល់បងប្អូនអ្នកលេងបណ្តាញសង្គមហ្វេសបុក សូមប្រុងប្រយ័ត្នចំពោះល្បិចកលផ្សេងៗ របស់ជនបោកប្រាស់តាមបណ្តាញសង្គមហ្វេសប៊ុក បើមានការសង្ស័យសូមសហការរាយការណ៍ជូនកម្លាំងមានសមត្ថកិច្ចដែលនៅជិតលោកអ្នកបំផុត៕
