បុរសម្នាក់លោតទឹកសម្លាប់ខ្លួនពីលើស្ពានជ្រោយចង្វា តែប្រឹងហែលមកលើគោកវិញ
ភ្នំពេញ ៖ សង្ស័យមានវិបត្តិអ្វីមួយក្នុងចិត្តគិតដោះស្រាយមិនចេញ បុរសម្នាក់បានសម្រេចចិត្តជិះម៉ូតូមួយគ្រឿងតែម្នាក់ឯង មកស្ពានជ្រោយចង្វាចាស់ រួចលោតពីលើស្ពានចូលក្នុងទឹកទន្លេដើម្បីសម្លាប់ខ្លួន តែដោយសារនៅមិនទាន់អស់អាល័យ និងទំនងជាពិបាកក្នុងខ្លួនក្នុងការពន្លិចខ្លួនចូលក្នុងទឹក ក៏ខំប្រឹងហែលមកលើគោកវិញ នៅវេលាម៉ោង៩និង៣០នាទីយប់ ថ្ងៃទី១៥ ខែវិច្ឆិកា ឆ្នាំ២០២០ នៅលើស្ពានជ្រោយចង្វាចាស់ ក្នុងសង្កាត់ជ្រោយចង្វា ខណ្ឌជ្រោយចង្វា ។
មុនពេលកើតហេតុ គេឃើញបុរសម្នាក់បានជិះម៉ូតូមួយគ្រឿងម៉ាកហុងដាឌ្រីមស៊េរីឆ្នាំ២០១៨ ពណ៌ខ្មៅពាក់ផ្លាកលេខ ភ្នំពេញ 1HE-0780 តែម្នាក់ឯងមកឈប់នៅលើស្ពានជ្រោយចង្វាចាស់ ហើយក៏បានទៅតោងបង្កាន់ដៃស្ពាន លោតចុះលិចចូលទៅក្នុងទឹកបាត់ ដោយបន្សល់ទុកទូរស័ព្ទ១គ្រឿង លុយចំនួន៤ម៉ឺនរៀល និងខ្សែដៃ១ខ្សែ ទុកនៅលើកែបម៉ូតូ របស់ខ្លួន ហើយសមត្ថកិច្ចបានយកម៉ូតូនិងសម្ភាររបស់ជនរងគ្រោះ ទៅរក្សាទុកនៅប៉ុស្តិ៍នគរបាលជ្រោយចង្វា។
ប្រមាណជាង១០នាទី ក៏មានគេប្រទះឃើញបុរសនោះ ហែលតោងទូកអ្នកនេសាទឡើងលើគោកវិញ នៅម្តុំវត្តភ្នំ ខំប្រឹងហែលមកលើគោកវិញ ហើយត្រូវសមត្ថកិច្ចនាំយកកាន់ប៉ុស្តិ៍នគរបាលជ្រោយចង្វា ដើម្បីធ្វើការសាកសួរនិងណែនាំអប់រំ រួចទាក់ទងទៅក្រុមគ្រួសារ មកទទួលទៅផ្ទះវិញ៕
