មណ្ឌលចត្តាឡីស័ករាជធានីភ្នំពេញ អាចដាក់បាន៥០០នាក់ ត្រៀមខ្លួនទទួលអ្នកដំណើរ មកពីក្រៅប្រទេសចូលកម្ពុជា
ភ្នំពេញ៖ដោយមានគោលការណ៍ពីរាជរដ្ឋាភិបាល រដ្ឋបាលរាជធានីភ្នំពេញកំពុងពន្លឿនការងារសាងសង់មណ្ឌលចត្តាឡីស័កមួយកន្លែង មានចំនួន២អគារដែលទទួលអ្នកដំណើរស្នាក់នៅបានជាង ៥០០នាក់ នាប៉ុន្មានសប្ដាហ៍ក្រោយនេះ ដើម្បីធានាបាននូវការអនុវត្តវិធានការចត្តាឡីស័កចំពោះអ្នកដំណើរចូលមកព្រះរាជាណាចក្រកម្ពុជាតាមអាកាសយានដ្ឋានអន្តរជាតិភ្នំពេញ។
នៅព្រឹកថ្ងៃទី២៨វិច្ឆិកានេះ លោកមាន ចាន់យ៉ាដា អភិបាលរងរាជធានីភ្នំពេញនិងលោកសាំ ពិសិដ្ឋ ប្រធានមន្ទីរសាធរណការនិងដឹកជញ្ជូនរាជធានីភ្នំពេញព្រមទាំងមន្ត្រីអាជ្ញាធរមូលដ្ឋានបានចុះពិនិត្យការងារសាងសង់អគារចត្តាឡីស័កនៅខណ្ឌប្ញស្សីកែវ។
មន្ត្រីឱ្យដឹងថា៖មណ្ឌលចត្តាឡីស័កមួយកន្លែងនេះ មានទីតាំងនៅក្នុងខណ្ឌប្ញស្សីកែវហើយមណ្ឌលចត្តាឡីស័កខាលើ នឹងដំណើរការក្រោយសាងសង់រួចនៅពេលខាងមុខ ដោយធ្វើឱ្យកាន់តែមានប្រសិទ្ធភាព បន្ទាប់ពីប្រគល់កន្លែងចត្តាឡីស័កកន្លងមក ឱ្យទៅសាលារៀនជូនសិស្សានុសិស្សចូលរៀនវិញនាពេលខាងមុខនេះ ។
គួរបញ្ជាក់ថា៖ កន្លងមករដ្ឋបាលរាជធានីភ្នំពេញបានយកវិទ្យាល័យជម្ពូរវ័ន្ត និងអនុវិទ្យាល័យពោធិចិនតុងនៅខណ្ឌពោធិសែនជ័យ និងសាលាមួយកន្លែងទៀត នៅខណ្ឌប្ញស្សីកែវធ្វើជាកន្លែងសម្រាប់ធ្វើចត្តាឡីស័ក៕
