អនុសាខាកាកបាទក្រហមកម្ពុជា ខណ្ឌមានជ័យ ផ្តល់អំណោយមនុស្សធម៌ជូនកម្លាំងសណ្តាប់ធ្នាប់ខណ្ឌ ចំនួន ៤៧គ្រួសារ
ភ្នំពេញ ៖ នារសៀលថ្ងៃព្រហស្បតិ៍ ២រោច ខែបុស្ស ឆ្នាំជូត ទោស័ក ព.ស ២៥៦៤ ត្រូវនិងថ្ងៃទី ៣១ ខែធ្នូ ឆ្នាំ២០២០នេះ អនុសាខាកាកបាទក្រហមកម្ពុជា ខណ្ឌមានជ័យ ដឹកនាំដោយលោក ឌី រ័ត្នខេមរុណ ប្រធានគណៈកម្មាធិការអនុសាខាកាកបាទក្រហមកម្ពុជា ខណ្ឌមានជ័យ បានអញ្ជើញចុះជួបសំណេះសំណាល និងនាំយកអំណោយ មនុស្សធម៌ ផ្តល់ជូនកម្លាំងសណ្តាប់ធ្នាប់ និងអនាម័យ ខណ្ឌមានជ័យ ចំនួន ៤៧គ្រួសារ ។
នាឱកាសនោះដែរ លោក ឌី រ័ត្នខេមរុណ ប្រធានអនុសាខា ខណ្ឌមានជ័យ បានកោតសរសើរ ចំពោះកងកម្លាំងសណ្តាប់ធ្នាប់ខណ្ឌមានជ័យ ដែលបានខិតខំ បំពេញភារៈកិច្ចការងារក៏ដូចជា ការ ចូល រួម ប្រចាំការ និង ចុះល្បាតក្នុងមូលដ្ឋាន កន្លង មក បានយ៉ាងសកម្មជូនរដ្ឋបាល ខណ្ឌមានជ័យ ក៌ដូចជាថ្នាក់ដឹកនាំខណ្ឌប្រគល់ជូន ។ ម្យ៉ាងទៀត កំលាំងសណ្តាប់ធ្នាប់ បានបំពេញនូវ តួនាទី ភារកិច្ច របស់ខ្លួន និងខិតខំប្រឹងប្រែង រក្សាសុន្តិសុខ សុវត្ថិភាព សណ្តាប់ធ្នាប់ ជូនបងប្អូនប្រជាពលរដ្ឋ ក្នុងមូលដ្ឋាន មិនអោយមានភាពភ័យខ្លាចរឿងអសន្តិសុខ ក្នុងភូមិ ជាពិសេសនោះ គឺរក្សាបាននូវភូមិ សង្កាត់ មានសុវត្ថិភាព មិនអោយបងប្អូនប្រជាពលរដ្ឋរស់នៅក្នុងមូលដ្ឋាន មានការព្រួយបារម្ភឡើយ ។
ទន្ទឹមនឹងនេះដែរ លោក ឌី រ័ត្នខេមរុណ ប្រធានអនុសាខា ខណ្ឌមានជ័យ បានបន្តទៀតថា ដោយមើលឃើញក្នុងរយៈពេលកន្លងមកកម្លាំងសណ្តាប់ធ្នាប់ យើងខិតខំប្រឹងប្រែងរៀបចំសណ្តាប់ធ្នាប់តាមដងផ្លូវ ក៌ដូចជាតាម ផ្សារក្រមួនមួយចំនួនក្នុងមូលសង្កាត់ទាំង៧ ដើម្បីកាត់បន្ថយការកកស្ទះចរាចរណ៍ ក្នុងការធ្វើដំណើរបស់បងប្អូនប្រជាពលរដ្ឋ ជាងនេះទៅទៀតកម្លាំងសណ្តាប់ធ្នាប់ ខណ្ឌមានជ័យ យើងបានសហការជាមួយកម្លាំងអធិការ និង មូលដ្ឋានកងរាជអវុធហត្ថខណ្ឌមានជ័យ បង្ក្រាបនូវបទ ល្មើសជួញដូរដោយខុសច្បាប់នូវសារធាតុញៀនក្នុងមូលដ្ឋានខណ្ឌផងដែរ ។
បន្ទាប់មក លោក ឌី រ័ត្នខេមរុណ ប្រធានអនុសាខា ខណ្ឌមានជ័យ បានផ្តល់ឱវាទដល់កងកម្លាំងសណ្តាប់ធ្នាប់ គឺធ្វើយ៉ាងណាកម្លាំងសណ្តាប់ធ្នាប់ ខណ្ឌមានជ័យ ត្រូវប្រកាន់អោយបានខ្ជាប់ខ្ជួននូវ ៖ ១. ត្រូវមានវិន័យ, ២. ត្រូវស្តាប់បទបញ្ជា, ៣. ត្រូវគោរព តួនាទី ភារកិច្ច និង៤.សាមគ្គីភាពផ្ទៃក្នុង ។
ក្នុងការសំណេះសំណាលនេះដែរ ក្នុងមួយគ្រួសារទទួលបាន
– អង្ករ ១០គីឡូក្រាម
– ទឹកសុទ្ធ ១យួរ
– ទឹកស៊ីអ៉ីវ ១យួរ
– មី ១កេស
– ថវិកា ២ម៉ឺនរៀលផងដែរ ក្នុងមួយគ្រួសារផងដែរ ។
