អ្នកប្រើប្រាស់ម៉ូតូច្នៃស៊ីម៉ាំងបង្កសំឡេងរំខាន នៅពេលយប់ត្រូវនាំមកធ្វើការអប់រំណែនាំ នៅស្នងការដ្ឋាននគរបាលខេត្តបាត់ដំបង
បាត់ដំបង ៖ នៅយប់ថ្ងៃទី ១០ ខែមករា ឆ្នាំ២០២០ អនុវត្តតាមបទបញ្ជារបស់លោកឧត្តមសេនីយ៍ទោ សាតគឹមសាន ស្នងការនៃស្នងការដ្ឋាននគរបាលខេត្តបាត់ដំបង ក្រុមអន្តរាគមន៍ពិសេសនៃស្នងការដ្ឋាន បានធ្វើការត្រួតពិនិត្យនិងឃាត់អ្នកប្រើប្រាស់ម៉ូតូដែលបំពាក់ដោយបំពង់សីម៉ាំងកែច្នៃ បង្កសំឡេងខ្លាំងរំខានពេលយប់នៅក្នុងក្រុងបាត់ដំបងចំនួន៨គ្រឿង។
ក្រោយពេលឃាត់រក្សាទុកម៉ូតូទាំង៨គ្រឿងនេះរួចមកពិនិត្យឃើញថា ម៉ូតូទាំងនេះក្រៅពីការកែច្នៃបំពង់ស៊ីម៉ាំង ដើម្បីបន្លឺសំឡេងខ្លាំងៗនៅមានលក្ខណៈមិនត្រឹមត្រូវលើចំណុចផ្សេងទៀតដែលផ្ទុយពីច្បាប់ស្តីពីចរាចរណ៍ផ្លូវគោក។
នៅពេលនេះ លោកឧត្តមសេនីយ៍ស្នងការបានប្រគល់ ភារកិច្ចទៅការិយាល័យនគបាលចរាចរណ៍ផ្លូវគោកអនុវត្តការដោយអប់រំណែនាំដល់ម្ចាស់ម៉ូតូ ឱ្យឈប់ប្រព្រឹត្តសកម្មភាពបែបនេះបន្តទៀត និងតម្រូវឱ្យប្តូរស៊ីម៉ាំងម៉ូតូបានត្រឹមត្រូវរួចធ្វើការផាកពិន័យទៅតាមអំពើល្មើសច្បាប់ ស្តីពីចរាចរណ៍ផ្លូវគោកមុនពេលប្រគល់ជូនម្ចាស់វិញ៕
