ឥណ្ឌូនេស៊ី សន្យានូវតែបន្ដផ្ដល់បច្ចេកទេស ផ្នែកផលិតដូងប្រេង និងបរិស្ថាន ដល់កម្ពុជា
ភ្នំពេញ៖ នៅព្រឹកថ្ងៃសុក្រ ២កើត ខែមាឃ ឆ្នាំទោស័កព.ស.២៥៦៤ ត្រូវនឹងថ្ងៃទី១៥ ខែមករា ឆ្នាំ២០២១ លោក អ៊ាង សុផល្លែត រដ្ឋលេខា ធិការក្រសួងបរិស្ថាន បានទទួលជួបលោក Sudirman Haseng ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណៈរដ្ឋឥណ្ឌូនេស៊ីប្រចាំនៅព្រះរាជាណាចក្រកម្ពុជា ដើម្បីសម្តែងការគួរសម និងពិភាក្សាការ នៅទីស្តីការក្រសួងបរិស្ថាន ។
ឯកអគ្គរដ្ឋទូត បានមានប្រសាសន៍ជម្រាបជូន និងរាយការណ៍អំពីការៀបចំកិច្ចប្រជុំលើកទី១នៃក្រុមការងារចម្រុះសហភាពអឺរ៉ុប-រដ្ឋជាសមាជិកអាស៊ានស្តីពីដូងប្រេង ដែលនឹងប្រព្រឹត្តទៅនៅសប្តាហ៍ទី៤ ខែមករា ឆ្នាំ២០២១ នេះ ។ ជាកិច្ចឆ្លើយតប លោក រដ្ឋលេខាធិការបានសម្តែងការអគុណ ចំពោះលោក ឯកអគ្គរដ្ឋទូត និងប្រតិភូអមដំណើរ និងបានថ្លែងអំណរគុណជូនលោក ឯកអគ្គរដ្ឋទូតចំពោះព័ត៌មានពាក់ព័ន្ធនឹងកិច្ចប្រជុំក្រុមការងាររដ្ឋជាសមាជិកអាស៊ាន និងសហភាពអឺរុប។ ជុំវិញករណីនេះ លោក រដ្ឋលេខាធិការបានស្នើសុំ លោក ឯកអគ្គរដ្ឋទូត ក្នុងនាមជាប្រទេសមានបទ ពិសោធន៍ សូមចែករំលែកនូវព័ត៏មាន និងបទពិសោធន៍ដែលធ្លាប់មាន ដល់ក្រសួងបរិស្ថាន។
ក្រសួងបរិស្ថានមានបំណងចង់ចូលស្តាប់កិច្ចពិភាក្ស ក្នុងកិច្ចប្រជុំលើកទីមួយរបស់រដ្ឋជាសមាជិកអាស៊ាន-សហភាពអឺរ៉ុបលើបញ្ហាដូងប្រេង ដើម្បីជាចំណេះដឹង និងបទពិសោធ ន៍សម្រាប់យកមកអនុវត្តរួមចំណែកក្នុងគាំពារបរិស្ថាន ៕. សំរិត
