លោក គួច ចំរើន ដឹកនាំប្រជុំត្រៀមបង្ការ ទប់ស្កាត់ការឆ្លងរាតត្បាតជំងឺកូវីដ-១៩
ព្រះសីហនុ នៅរសៀលថ្ងៃពុធទី០៣ ខែកុម្ភៈ ឆ្នាំ២០២១ លោក គួច ចំរើន អភិបាល នៃគណៈអភិបាលខេត្តព្រះសីហនុ ដឹកនាំប្រជុំត្រៀមបង្ការ ទប់ស្កាត់ការឆ្លងរាតត្បាតជំងឺកូវីដ-១៩ មានការចូលរួមពីលោក លោកស្រី អភិបាលរងខេត្ត នាយករដ្ឋបាលសាលាខេត្ត អភិបាលក្រុង ស្រុក ប្រធានអនុប្រធានមន្ទីរ អង្គភាព មេឃុំ ចៅសង្កាត់២៩ មណ្ឌលសុខភាព១៦ក្នុងខេត្តព្រះសីហនុ ។
លោក គួច ចំរើន អភិបាលខេត្តព្រះសីហនុ មាន ប្រសាសន៍ថា ដោយសាររយៈពេលប៉ុន្មានថ្ងៃចុងក្រោយនេះ ជំងឺកូវីដ-១៩បានផ្ទះក្នុងសហគមន៍នៅប្រទេសជិតខាងរបស់យើង វាក៏អាចគំរាមកំហែងដល់ប្រទេសកម្ពុជាផងដែរ ។ យើងមានពលកររាប់ម៉ឺននាក់នៅប្រទេសថៃ ហើយមានពលករមួយចំនួនបានវិលត្រឡប់មកប្រទេសកម្ពុជាវិញ ។
លោក អភិបាលបានបន្តថា សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានប្រើប្រាស់កម្លាំងសរុប ក្នុងការគ្រប់គ្រងធ្វើចក្តាឡឺស័ក នៅតាមព្រំដែន និងធ្វើការដឹកជញ្ជូនពលកររបស់យើងមកកាន់ក្រុង ស្រុកវិញប្រកបដោយជោគជ័យមិនមានការឆ្លងចូលសហគមន៍ ។ រាជរដ្ឋាភិបាលមានការព្រួយបារម្មណ៍នៃការវិលត្រឡប់មកពីប្រទេសថៃ របស់ពលកររបស់យើង បានដាក់ចេញនូវវិធានការគ្រប់គ្រងទទួលបានជោគជ័យ ដូច្នេះយើងត្រូវបន្តការគ្រប់គ្រងអ្នកដែលចូលមកតាមច្រករបៀងខុសច្បាប់ ។ ហើយថ្ងៃនេះយើងធ្វើការជួបជុំប្រមូលផ្តុំគ្នា ព្រមទាំងស្នើសុំមេឃុំ ចៅសង្កាត់ ត្រូវយកចិត្តទុកដាក់ត្រួតពិនិត្យប្រជាពលរដ្ឋដែលវិលត្រឡប់មកពីប្រទេសជិតខាង បំផុសប្រជាពលរដ្ឋ បើមានក្រុមគ្រួសារណាមកពីប្រទេសថៃ សូមរាយការណ៍មកមេភូមិ ឃុំ សង្កាត់ ដើម្បីយកពួកគាត់ធ្វើចក្តាឡឺស័ក ១៤ថ្ងៃ និងយកប្រជាពលរដ្ឋជាភ្នែក ច្រមុះ ដើម្បីយើងប្រមូលពត៌មាន នៅក្នុងមូលដ្ឋាន ។ ម្យ៉ាងទៀតមណ្ឌលសុខភាពចូលរួមសហការជាមួយអាជ្ញាធរឃុំ សង្កាត់ ព្រោះមន្ត្រីសុខាភិបាលនៅតាមមណ្ឌលសុខភាពពួកគាត់បានបណ្តុះ បណ្តាលក្នុងការយកសំណាកកូវីដ-១៩ ។
លោក គួច ចំរើន បានណែនាំមេឃុំ ចៅសង្កាត់បង្កើនស្មារតីទទួលខុសត្រូវប្រមូលពត៌មានឱ្យបានជាប់ជាប្រចាំ ដើម្បីការពារទប់ស្កាត់ការឆ្លងរាលដាលកូវីដក្នុងសហគមន៍ ។ ព្រមទាំងឱ្យមណ្ឌលសុខភាព និងមន្ទីរពេទ្យរដ្ឋធ្វើរបាយការណ៍ទីតាំងរបស់ខ្លួន ក្នុងការរៀបចំធ្វើរបង ដើម្បីការពារសុវត្ថិភាពមន្ត្រីរបស់យើងនៅតាមមណ្ឌលសុខភាពនីមួយៗ ។
ក្នុងឱកាសនោះ លោកគួច ចំរើន បានផ្តល់ថវិកាដល់អភិបាលក្រុង ស្រុកទាំង៥ ក្នុងមួយក្រុង ស្រុកនូវថវិកា ១០លានរៀល មន្ទីរសុខាភិបាលខេត្ត ១០លានរៀល មន្ទីរពេទ្យបង្អែកខេត្ត ១០លានរៀល មណ្ឌលសុខភាព១៦ ក្នុងមួយមណ្ឌល ៥លានរៀល សាលាឃុំ សាលាសង្កាត់២៩ ក្នុងមួយឃុំ សង្កាត់ ៥លានរៀល ៕
