អាជ្ញាធរខេត្តបាត់ដំបងបង្កើនការប្រុងប្រយ័ត្ននិង រៀបចំមណ្ឌលចត្តាឡីស័កបន្ថែមទៀត តាមការណែនាំរបស់ក្រសួងសុខាភិបាល
ភ្នំពេញ៖ អាជ្ញាធរស្រុកកំរៀង លោក សុខ គឹមខុន បានបញ្ជាក់ឲ្យដឹងនៅថ្ងៃទី១៦ កុម្ភៈឆ្នាំ២០២១នេះថា៖ រដ្ឋបាលស្រុកកំរៀងកំពុងខិតខំ រៀបចំបន្ថែមទៀត តាមការណែនាំ របស់ក្រសួងសុខាភិបាល មូលហេតុថា រយៈពេលដ៏ខ្លីខាងមុខនេះ កម្ពុជា និងរៀបចំពិធីបុណ្យចូលឆ្នាំប្រពៃណីជាតិខ្មែរ ដែលអាចឱ្យពល ករខ្មែរត្រឡប់មកពីប្រទេសថៃកាន់តែ ច្រើនឡើង ។ អាជ្ញាធរស្រុកជាប់ តំបន់ព្រំដែន ខេត្តបាត់ដំបង កំពុងមានការប្រុងប្រយ័ត្ន និង រៀបចំមណ្ឌលចត្តាឡីស័កបន្ថែមទៀត ដើម្បីត្រៀមទទួលពលករ ។
លោក សុខ គឹមខុន អភិបាលស្រុកកំរៀង បានឱ្យដឹងថា មកទល់ពេលនេះ មណ្ឌលចត្តាឡីស័កថ្មីបាន
រៀបចំតម្លើងបាន១០០ ភាគរយហើយ លើផ្ទៃដីប្រមាណ ២ហិកតា ។
លោកអភិបាលស្រុកបញ្ជាក់ថា មណ្ឌលចត្តាឡីស័កថ្មីនេះ ជាប្រភេទ តង់ចល័តរបស់កងអង្គរក្សសម្តេចតេជោ និងតម្លើងដោយកងអង្គរក្សផ្ទាល់ ដែលមាន៤២តង់ អាចដាក់ ពលករធ្វើចត្តាឡីស័ក ចំនួន ៨ទៅ ១២នាក់ ក្នុងមួយតង់ចល័ត ។
លោកបញ្ជាក់ថា តង់ចល័តថ្មីមិនទាន់ដាក់ពលករធ្វើចត្តាឡីស័កនៅឡើយទេ គឺសម្រាប់ត្រៀមធ្វើជាមណ្ឌលចត្តាឡីស័កទទួលពលករដែលត្រឡប់មកពីថៃ ដែលអាចនឹងកើន ឡើងទៀត នឹងធ្វើឱ្យមណ្ឌល ចត្តា ឡីស័ក ដែលមានបីទីតាំងរួចទៅហើយនោះពេញ នឹងបន្តយកមកដាក់ ទីតាំងថ្មីនេះ។
លោកអភិបាលស្រុកកំរៀងបន្តថានៅពេលមានបុណ្យទាន ចំនួនពលករត្រឡប់មកពីថៃ នឹងកើនឡើង ដែលបច្ចុប្បន្នមានពលករត្រឡប់មកពីថៃចន្លោះពី៧០ទៅ២០០នាក់ក្នុងមួយថ្ងៃៗ ។ ចំនួននេះ អាចនឹងកើន ឡើងចាប់ពីថ្ងៃទី១២ ឬ ១៣ ខែមីនាខាងមុខទៅ ព្រោះបុណ្យចូលឆ្នាំខ្មែរនឹងជិតមកដល់ គឺពលករអាចសម្រុកនាំគ្នាមកច្រើន ហើយការបន្ថែមមណ្ឌលចត្តាឡីស័ក នឹងគិតគូរបន្ថែម ទៀតទៅតាមស្ថានភាពពលករជាក់ស្តែង។ ទទ្ទឹមនឹងនេះ អាជ្ញាធរនិងស្ថាប័នពាក់ព័ន្ធ បានបង្កើនការប្រុង ប្រយ័ត្ន ដើម្បីធ្វើយ៉ាងណាឱ្យពលករដែលត្រឡប់មកពីថៃ ត្រូវបានធ្វើចត្តាឡីស័កបានគ្រប់គ្នា ដើម្បីទប់ស្កាត់ការឆ្លងរាល ដាលជំងឺកូវីដ-១៩ ចូលសហគមន៍ ។
សូមបញ្ជាក់ថា រាជរដ្ឋាភិបាលក៏ដូចជាអាជ្ញាធរ បានអំពាវនាវដល់ពលករដែលធ្វើការនៅប្រទេសថៃ សូមមេត្តាធ្វើការនៅទីនោះរកលុយចិញ្ចឹមគ្រួសារសិន កុំទាន់អាលត្រឡប់មកស្រុកខ្មែរវិញ រង់ចាំឱ្យសភាពការ ជំងឺកូវីដ-១៩ នៅប្រទេសថៃស្ងប់ស្ងាត់សិន ដើម្បីចៀស វាងការឆ្លងរាលដាលជំងឺនេះចូលសហគមន៍
ខ្មែរ ៕. សំរិត
