រថយន្តបាឡែនបុករថយន្តកុងតឺន័រពីក្រោយ ខ្ទេចទាំងស្រុង
ភ្នំពេញ ៖ បុរសម្នាក់បានបើករថយន្តបាឡែនមួយគ្រឿង ក្នុងល្បឿនលឿន ជ្រុលទៅបុកពីខាងក្រោយរថយន្តកុងតឺន័រពេញទំហឹង បណ្តាលឲ្យរថយន្តបង្ករងការខូចខាតស្ទើរទាំងស្រុង។ ចំណែកឯតៃកុងរថយន្តវិញរងរបួសបញ្ជូនទៅមន្ទីរពេទ្យ។
ហេតុការណ៍គ្រោះថ្នាក់ចរាចរណ៍នេះដែរ បានកើតឡើងកាលពីវេលាម៉ោង០០និង១៥ នាទីយប់ឈានចូលថ្ងៃសៅរ៍ទី២៧ ខែកុម្ភៈ ឆ្នាំ២០២១ ស្ថិតនៅតាមបណ្តោយផ្លូវ២១៧ ក្នុងសង្កាត់ជើងឯក ខណ្ឌដង្កោ រាជធានីភ្នំពេញ។
ប្រភពព័ត៌មានពីប្រជាពលរដ្ឋនៅជាប់នឹងកន្លែងកើតហេតុ បានឲ្យដឹងថា មុនពេលកើតហេតុគាត់បានឃើញរថយន្តកុងតឺន័រមួយគ្រឿង ក្បាលពណ៌ខៀវពាក់ផ្លាកលេខ ភ្នំពេញ 3F-2025 បើកបដោយបុរសម្នាក់ធ្វើដំណើរតាមបណ្តោយផ្លូវ២១៧ ក្នុងទិសដៅពីលិចទៅកើតក្នុងល្បឿនមធ្យម ខណៈមកដល់ចំណុចកើតហេតុបម្រុងនឹងបត់អែបចូលកៀនចិញ្ចើមផ្លូវ ស្រាប់តែមានរថយន្តមួយគ្រឿងទៀតម៉ាកកាមរីបាឡែនពណ៌ស្ករ ពាក់ផ្លាកលេខភ្នំពេញ2-AB 0187 បើកបរដោយបុរសម្នាក់ ធ្វើដំណើរតាមបណ្តោយផ្លូវ២១៧ ពីក្រោយស្របគ្នាក្នុងទិសដៅពីលិចទៅកើត ក្នុងល្បឿនលឿនជ្រុលទៅបុកពីក្រោយរថយន្តកុងតឺន័រពេញទំហឹង បណ្តាលឲ្យរថយន្តបង្កខ្ទេចទាំងស្រុង។ ចំណែកឯម្ចាស់រថយន្តបង្ករងរបួសបញ្ជូនទៅមន្ទីរពេទ្យ រីឯតៃកុងរថយន្តកុងតឺន័រវិញរត់គេចខ្លួនបាត់ស្រមោល។
ក្រោយពេលកើតហេតុសមត្ថកិច្ចជំនាញចរាចរណ៍ខណ្ឌដង្កោ ជំនាញចរាចរណ៍ក្រុង ចុះមកវាស់វែងនិងធ្វើកំណត់ហេតុស្ទូចយករថយន្តទាំងខាងទៅរក្សាទុកនៅខាងជំនាញការិយាល័យចរាចរណ៍ផ្លូវគោក នៃស្នងការរាជធានីភ្នំពេញរង់ចាំដោះស្រាយនៅពេលក្រោយ៕
