ចាក់វ៉ាក់សាំងកូវីដ -១៩ ជូនបងប្អូនកម្មករប្រមូលសំរាម
ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានលើកឡើងថារាជរដ្ឋាភិបាល បានសម្រេចប្រគល់ភារកិច្ចជូនក្រសួងសុខាភិបាល រៀបចំកម្មវិធីដើម្បីចាក់វ៉ាក់សាំងការពារ ជំងឺកូវីដ-១៩ ជូនដល់កម្មករប្រមូលសំរាម អ្នករត់តាក់ស៊ី អ្នកបើកម៉ូតូកង់បី អ្នករត់ម៉ូតូឌុបនៅពេលខាងមុខនេះ។
បើតាមសេចក្តីជូនដំណឹងរបស់ក្រសួងសុខាភិបាល ស្តីពីកម្មវិធីចាក់វ៉ាក់សាំងកូវីដ -១៩ ជូនបងប្អូនកម្មករប្រមូលសំរាមនៅរាជធានីភ្នំពេញ។
យោងតាមអនុសាសន៍ណែនាំ និងការយកចិត្តទុកដាក់ដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ការចាក់វ៉ាក់សាំងកូវីដ-១៩ “ស៊ីណូហ្វាម (Sinopharm Beijing Institute of Biological Products)” ដែលជាជំនួយមនុស្សធម៌ដ៏ថ្លៃថ្លារបស់សាធារណរដ្ឋប្រជាមានិតចិន ត្រូវបានអនុញ្ញាត ឱ្យបន្តចាក់ជូនដល់បងប្អូនដែលជាកម្មករប្រមូលសម្រាមនៅរាជធានីភ្នំពេញ បន្ថែមលើក្រុមមនុស្សដែលជាបុគ្គលិកសុខាភិបាល កងកម្លាំងប៉ូលីសជាតិ និងអាជ្ញាធរជួរមុខ ដូចជាគណៈអភិបាលខេត្ត គណៈអភិបាលក្រុង /ស្រុក / ខណ្ឌ គណៈកម្មការភូមិ -ឃុំ-សង្កាត់។
ក្រសួងសុខាភិបាល សូមអញ្ជើញបងប្អូនជាកម្មករប្រមូលសម្រាមនៅរាជធានីភ្នំពេញ ដែលមានអាយុពី ១៨ឆ្នាំ ដល់ ៥៩ឆ្នាំ ទៅទទួលការចាក់វ៉ាក់សាំងដោយឈរលើគោលការណ៍ស្ម័គ្រចិត្ត ចាប់ពីថ្ងៃផ្សាយដំណឹងនេះតទៅ នៅតាមទីតាំងដូចខាងក្រោមនេះ៖ ១). មន្ទីរពេទ្យបង្អែករាជធានីភ្នំពេញ ២). មន្ទីរពេទ្យបង្អែកព្រែកព្នៅ ៣). មន្ទីរពេទ្យបង្អែកច្បារអំពៅ ៤)មន្ទីរពេទ្យបង្អែកដង្កោ ៥)មន្ទីរពេទ្យបង្អែកមិត្តភាពកម្ពុជាចិនសែនសុខ ៦)មន្ទីរពេទ្យបង្អែកចតុមុខ ៧). មន្ទីរពេទ្យបង្អែកសម្តេចឪ សម្តេចម៉ែ និង៨). មន្ទីរពេទ្យបង្អែកពោធិចិនតុង។
បន្ថែមលើនេះ ដោយក្រសួងបានពង្រីកទីតាំងចាក់វ៉ាក់សាំងដល់គ្រប់រាជធានី -ខេត្តទាំង២៥ ហើយនោះ និងដើម្បីជម្រុញ ការចាក់វ៉ាក់សាំងឱ្យមានវិសាលភាពកាន់តែទូលំទូលាយ ទីតាំងចាក់វ៉ាក់សាំងទាំងអស់ ដែលមានការអនុញ្ញាតពីក្រសួងរួច ហើយនោះ ត្រូវបន្តការងារចាក់វ៉ាក់សាំង ជូនប្រជាជនតាមក្រុមមនុស្ស នៅរៀងរាល់ថ្ងៃ (ទាំងថ្ងៃសៅរ៍ ថ្ងៃអាទិត្យ និងថ្ងៃឈប់ សម្រាកផ្លូវការ ) ចាប់ពីម៉ោង ០៨និង០០នាទីព្រឹក ដល់ម៉ោង ១៧និង០០នាទីល្ងាច (ដោយសម្រាកពិសាអាហារថ្ងៃត្រង់ពីម៉ោង ១២និង០០នាទី ដល់ម៉ោង ១៤និង០០នាទី)។
សម្រាប់ក្រុមមនុស្ស ដែលក្រសួងធ្លាប់បានចេញសេចក្តីជូនព័ត៌មានជាហូរហែ ចាប់តាំងពីថ្ងៃទី៨ ខែកុម្ភៈ ឆ្នាំ២០២១ រួចមកហើយនោះ ហើយដែលមិនទាន់បានមកចាក់វ៉ាក់សាំងដោយស្ម័គ្រចិត្ត សូមអញ្ជើញមកទទួលការចាក់វ៉ាក់សាំង នៅតាមទីតាំងនានា ដែលក្រសួងធ្លាប់បានជូនព័ត៌មានរួចហើយ (មានដាក់ផ្សាយសេចក្តីជូនព័ត៌មាន តាមទំព័រហ្វេសបុករបស់ក្រសួង សុខាភិបាលរួចហើយ)។
ក្រសួង ក៏សូមក្រើនរំលឹកដល់អ្នកដែលបានចាក់វ៉ាក់សាំងលើកទី១ (ដូសទី១) រួចហើយ សូមអញ្ជើញមកទទួលការ ចាក់វ៉ាក់សាំងជាលើកទី២ (ដូសទី២) ក្នុងរយៈពេលពី ១៤ ទៅ ២៨ថ្ងៃ (មិនឱ្យលើសពី ២៨ថ្ងៃ) បន្ទាប់ពីថ្ងៃចាក់លើកទី១ នៅទីតាំងដែលសាមីជនបានចាក់លើកទី១ កុំបីអាក់ខានឡើយ។
ក្រសួងសុខាភិបាល បន្តជូនដំណឹងដល់សាធារណជន ក្នុងក្រុមអាយុពី ១៨ ដល់ ៥៩ឆ្នាំ ផ្សេងៗទៀត នឹងអញ្ជើញ មកទទួលវ៉ាក់សាំងកូវីដ-១៩ ដោយស្ម័គ្រចិត្តនាពេលក្រោយៗទៀត។
សូមបងប្អូនប្រជាពលរដ្ឋ ក្នុងក្រុមអាទិភាពផ្សេងៗទៀត ដែលស្ម័គ្រចិត្តចាក់វ៉ាក់សាំងកូវីដ-១៩ មេត្តាអធ្យាស្រ័យ
ប្រសិនបើមិនទាន់ដល់វេនរបស់ខ្លួនទេនោះ សូមមេត្តារង់ចាំបន្តិចសិន ព្រោះនៅពេលនេះវាក់សាំងមានចំនួនកំណត់ ៕
