ធ្លាប់ជាប់ពន្ធនាគារ២លើក មិនរាងចាល មកលួចទៀត ត្រូវនគរបាលចាប់ខ្លួនទៀត
កំពង់ស្ពឺ ៖ មុខសញ្ញាចាស់ធ្លាប់ជាប់គុក ២លើកស្មើ១២ឆ្នាំ មិនរាងចាល ចេញមកវិញដើរលួចទៀត ត្រូវកងកម្លាំងអធិការដ្ឋាននគរបាលក្រុងច្បារមន ចាប់ខ្លួនបានជាលើកទី៣ កាលពីវេលាម៉ោង៣ទៀបភ្លឺថ្ងៃទី០៣ ខែមីនា ឆ្នាំ២០២១ នៅចំណុចភូមិពាណិជ្ជកម្ម សង្កាត់រការធំ ក្រុងច្បារមន ខេត្តកំពង់ស្ពឺ ។
មន្ត្រីនគរបាលខេត្តកំពង់ស្ពឺ បានឲ្យដឹងថា សង្ស័យឈ្មោះកែវ ឈឺ ភេទប្រុស អាយុ៣៤ឆ្នាំ នៅភូមិក្រាំងពលទេព សង្កាត់រការធំ ជាមុខសញ្ញាចាស់ធ្លាប់ជាប់ពន្ធនាគារចំនួន០២លើក រួចមកហើយ ពីបទលួច។
វត្ថុតាងដកហូតៈ ម៉ូតូ១គ្រឿងម៉ាកHONDA C125 ពណ៌ខ្មៅ ផលិតឆ្នាំ២០១៤ ពាក់ផ្លាកលេខ កំពង់ស្ពឺ 1G-7224 ដែលជនសង្ស័យយកមកលាក់ទុកនៅក្នុងព្រៃក្បែរផ្លូវរទេះភ្លើង ក្រោយដីឡូត៍ ឈួន គឹមសាន។
បច្ចុប្បន្នជនសង្ស័យកំពុងឃាត់ខ្លួនបណ្តោះអាសន្ននៅអធិការដ្ឋានក្រុងច្បារមន ដើម្បីកសាងសំណុំរឿងចាត់ការតាមនីតិវិធី ៕
