លោកជំទាវ ជូ ប៊ុនអេង ស្នើឲ្យឯកឧត្តមអភិបាល លោកស្នងការ ពិនិត្យ និងរិះរកវិធីលើកទឹកចិត្ត លោកស្រីអនុសេនីយទោម្នាក់ដែលបំបៅកូន
ភ្នំពេញ ៖ នៅថ្ងៃទី១០ ខែមីនា ឆ្នាំ២០២១ លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍ គណៈកម្មាធិការជាតិប្រយុទ្ធប្រឆាំង អំពើជួញដូរមនុស្ស (គ.ជ.ប.ជ) បានចេញលិខិតបន្ទាន់មួយ ជម្រាបមកឯកឧត្តម អភិបាលនៃគណៈអភិបាលខេត្តស្ទឹងត្រែង ករណីលោកអធិការស្រុកសៀមប៉ាង ព្រមានលោកស្រី អនុសេនីយ៍ទោម្នាក់ដែលបំបៅកូននៅ ក្នុងពេលបំពេញបេសកកម្ម តាមដងផ្លូវ ។
សូមបញ្ជាក់ថា អធិការស្រុកសៀមប៉ាង ហៅប៉ូលីសស្រីមកធ្វើកិច្ចសន្យា ក្រោយបំបៅដោះកូនពេលធ្វើការ ថាប៉ះពាល់ដល់ កិត្តិយសនគរបាល និងស្ត្រីខ្មែរ ។
លោកជំទាវ បានថ្លែងថា ក្នុងនាមខ្ញុំជារដ្ឋលេខាធិការក្រសួងមហាផ្ទៃ ជាប្រធានក្រុមការងារយេនឌ័រក្រសួងមហាផ្ទៃ និងជាអនុប្រធានអចិន្ត្រៃយ៍គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) ដឹកនាំដោយសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានឃើញអត្ថបទដែលផ្សព្វផ្សាយអំពី អធិការស្រុកសៀមប៉ាង ដែលបានកោះហៅ លោកស្រីនគរបាលម្នាក់ដែលគាត់បំបៅកូន នៅតុការងារតាមផ្លូវ ប្រហែលជានគរបាលចរាចរណ៍ ដើម្បីទៅព្រមាន និងឲ្យធ្វើកិច្ចសន្យាបញ្ឈប់ការបំបៅដោះកូនបែបនេះ ។
លោកជំទាវ បានលើកឡើងថា បានអានអត្ថបទនេះ ខ្ញុំមានការសោកស្តាយជាខ្លាំង ដែលលោកអធិការបានប្រើឥរិយាបទបែបនេះ និងមិនបានវែកញែកឲ្យច្បាស់ពីកំហុស និងពីគុណសម្បត្តិ ។ ខ្ញុំសូមជម្រាបឯកឧត្តមអភិបាល មេត្តាជ្រាប ថា ក្នុងស្ថានភាពជាស្ត្រី ដែលមានភារកិច្ចទទួលខុសត្រូវទ្វេដង លើសពីបុរស គឺបំពេញការងារស្នូលក្នុងអង្គភាពស្ថាប័នផង និងត្រូវចិញ្ចឹមបីបាច់ថែទាំកូន តាំងពីនៅក្នុងផ្ទៃរហូតកើតមក និងបន្តទៅទៀតដល់ពេញវ័យ បើទោះបីជាបុរស ជាស្វាមី ឬអ្នកដែលជាថ្នាក់ដឹកនាំមិនបានយកចិត្តទុកដាក់ បង្កលក្ខណៈឲ្យនាងទទួល បាននូវឱកាសថែទាំកូនបានងាយស្រួលយ៉ាងណាក៏ដោយ ក៏នាងមិនបានបោះបង់កូន និងការងារស្នូល របស់នាងដែរ ។ នេះជាទង្វើ ដែលខ្ញុំជាស្ត្រីម្នាក់ សូមគោរពកោតសរសើរ នូវឆន្ទៈដ៏មុះមុត ក្នុងការបំពេញ ការកិច្ចរបស់មន្ត្រីជាម្ដី ទោះជាប្រឈមនឹងការលំបាកយ៉ាងណាក៏ដោយ ។
លោកអធិការ គួរតែសម្តែងនូវការកោតសរសើរ លើកទឹកចិត្ត និងរិះរកមធ្យោបាយ ឲ្យមន្ត្រីស្ត្រី បែបនេះទទួលបាននូវការយកចិត្តទុកដាក់ និងឲ្យគាត់មានឱកាសគ្រប់គ្រាន់ថែទាំកូន ដូចម្តាយលោកថែទាំលោកកាលពីនៅទារក និងភរិយាលោកថែទាំកូនលោកដូចគ្នាដែរ ។ គាត់មិនបានសម្តែងការបញ្ចេញ ភាពសិចស៊ី ដើម្បីថតបង្ហាញសាធារណជនដើម្បីទាក់ទាញដូចអ្នករកស៊ីលក់ភាពសិចស៊ី ដែលលោកត្រូវ មាន ចំណាត់ការនោះទេ តែដោយសារតែមានអ្នកដែលចាប់អារម្មណ៍ និងកោតសរសើរគាត់ និងថតដើម្បីជាភស្តុតាងបង្ហាញថា នេះហើយជាស្ត្រី ជាតិជាមាតា និងជាអ្នកដែលមានតួនាទីបម្រើជាតិជាប់ខ្លួន។
អាស្រ័យហេតុនេះ សូមឯកឧត្តមអភិបាល លោកជំទាវអភិបាលរង លោកស្នងការ និងថ្នាក់ដឹកនាំ ទាំងអស់ ពិនិត្យករណីនេះ និងរិះរកវិធីលើកទឹកចិត្ត លោកស្រីអនុសេនីយទោរូបនេះ និងស្ត្រីជាមន្ត្រីរាជការដទៃទៀត តាមតែអាចធ្វើទៅបាន ដើម្បីកុំឲ្យបាក់ទឹកចិត្ត ជាពិសេស ក្នុងឱកាសទិវាអន្តរជាតិនារី ខួបលើក ទី ១១០ និងសូមជូនពរដល់ស្ត្រីទាំងឡាយ ជាកូនស្រី ជាបងស្រី ជាម្តាយ ជាជីដូន ជាមន្ត្រីរាជការ ជាអ្នក ទ្រទ្រង់គ្រួសារ សូមរួចផុតពីអំពើហិង្សា ការប្រមាថមាក់ងាយ ការរើសអើង និងការរំលោភបំពានគ្រប់រូបភាព និងសូមទទួលបាននូវកិត្តិយស សេចក្តីថ្លៃថ្នូរ ការគោរព ការឲ្យតម្លៃ និងការទទួលស្គាល់នូវកិច្ចខិតខំ ប្រឹងប្រែង នៅក្នុងការងារគ្រួសារ ការងារសង្គម និងការងារប្រទេសជាតិ ។ សូមបារមី វត្ថុសក្តិសិទ្ធក្នុងលោក ជួយបីបាច់ថែរក្សា និងប្រទានពរ ឲ្យស្ត្រី ដែលជាអ្នកទ្រទ្រង់ពិភពលោក ឲ្យមានជីវិតបន្តពូជពង្ស និងមាន សុខសន្តិភាព ទទួលបាននូវសេចក្តីសុខ សុខភាពល្អបរិបូណ៍ ជៀសផុតគ្រោះថ្នាក់ និងឧបសគ្គផងទាំងពួង កុំបីឃ្លៀងឃ្លាតឡើយ ។
សូមថ្លែងអំណរគុណ ឯកឧត្តមដែលបានយកចិត្តទុកដាក់ចំពោះការលំបាករបស់មន្ត្រីជាស្ត្រី និង រង់ចាំទទួលព័ត៌មានត្រឡប់អំពីចំណាត់ការសមស្រប៕
