ជនជាតិចិនម្នាក់ស្លាប់ ពេលធ្វើចត្តាឡីស័ក
ភ្នំពេញ ៖ រដ្ឋបាលខេត្តព្រះសីហនុបានឲ្យដឹងថា នៅថ្ងៃទី១៤ ខែមីនា ឆ្នាំ២០២១ វេលាម៉ោង ១៣:៤៣ នាទីរសៀល មានករណីបុរសជនជាតិចិនម្នាក់បានទទួលមរណភាពនៅមន្ទីរពេទ្យបង្អែកខេត្តព្រះសីហនុ ដោយមានជំងឺ រលាកលំពែង និងសួតរ៉ាំរ៉ៃ ព្រមទាំងឡើងជាតិស្ករខ្លាំង។
រដ្ឋបាលខេត្តព្រះសីហនុបានបន្តថា បុរសជនជាតិចិននេះមាន ឈ្មោះ RAO SHAOXING ភេទ ប្រុស អាយុ២៧ឆ្នាំ កាន់លិខិតឆ្លងដែន លេខ EH4480832 បានចូលមកដល់ប្រទេសកម្ពុជា នៅថ្ងៃទី៣០ ខែធ្នូ ឆ្នាំ២០២០ តាមច្រកអាកាសយានដ្ឋានអន្តរ ជាតិខេត្តព្រះសីហនុ ។ នៅថ្ងៃទី២៦ ខែកុម្ភៈ ឆ្នាំ២០២១ បានស្នាក់នៅ និងធ្វើចត្តាឡីស័កនៅបន្ទប់លេខ៩១៨ ក្នុង អគារស្នាក់នៅរួមរបស់បុគ្គលិកកាស៊ីណូ មួយកន្លែង ស្ថិតនៅភូមិ២ សង្កាត់លេខ៤ ក្រុងព្រះសីហនុ ខេត្តព្រះសីហនុ។ នៅយប់ថ្ងៃទី១៣ ខែមីនា ឆ្នាំ២០២១ វេលាម៉ោង២០:៤២នាទី ដោយបុរសរូបនេះមានអាការៈហត់ និងចុះខ្សោយខ្លាំង ក៏ត្រូវបានបញ្ជូនមកសង្គ្រោះបន្ទាន់នៅមន្ទីរពេទ្យបង្អែកខេត្តព្រះសីហនុ។
ដោយពិនិត្យឃើញថាបុរសរូបនេះមាន អាការៈកាន់តែធ្ងន់ធ្ងរ ដូចនេះក្រុមគ្រូពេទ្យបានរៀបចំបែបបទដើម្បីបញ្ជូនទៅសង្គ្រោះនៅរាជធានីភ្នំពេញ ប៉ុន្តែដោយ បុរសរូបនេះមានស្ថានភាពសុខភាពចុះខ្សោយពេកទើបធ្វើឱ្យគាត់ទទួលមរណភាព នៅវេលាម៉ោង១៣:៤៣នាទី រសៀល ថ្ងៃទី១៤ ខែមីនា ឆ្នាំ២០២១ នៅមន្ទីរពេទ្យបង្អែកខេត្តព្រះសីហនុ។ តាមការពិនិត្យវាយតម្លៃបឋមរបស់ក្រុម គ្រូពេទ្យបង្ហាញថា បុរសខាងលើ មានជំងឺ រលាកលំពែង និងសួតរ៉ាំរ៉ៃ ព្រមទាំងឡើងជាតិស្ករខ្លាំង។
បច្ចុប្បន្នសាកសពតម្កល់ទុកនៅមន្ទីរពេទ្យបង្អែកខេត្តព្រះសីហនុ និងបានយកសំណាកទៅធ្វើវិភាគនៅវិទ្យា ស្ថានប៉ាស្ទ័រកម្ពុជា ដើម្បីបន្តនីតិវិធី។
រដ្ឋបាលខេត្តសូមសម្តែងនូវការសោកស្តាយ និងចូលរួមរំលែកមរណៈទុក្ខដ៏ក្រៀមក្រំជាមួយក្រុមគ្រួសារនៃសព៕
