ឃាត់ខ្លួនជនសង្ស័យម្នាក់ លួចគាស់ផ្ទះរបស់មន្ត្រីយោធាម្នាក់ នៅក្រុងតាខ្មៅ
ខេត្តកណ្ដាល ៖ សមត្ថកិច្ចនគរបាលក្រុងតាខ្មៅ ចាប់ខ្លួនជនសង្ស័យម្នាក់ ដែលធ្វើសកម្មភាពលួចគាស់មន្ត្រីយោធាម្នាក់នៅក្រុងតាខ្មៅ មិនបានសម្រេច និងដកហូតវត្ថុតាងមួយចំនួន យកមកអធិការដ្ឋាននគរបាលក្រុង ដើម្បីកសាងសំណុំរឿងចាត់ការតាមនីតិវិធីច្បាប់ ។ ករណីនេះ បានកើតឡើងនៅវេលាម៉ោង២៣និង៥០នាទី ថ្ងៃទី១៣ ខែមីនា ឆ្នាំ២០២១ ចំណុចផ្ទះជនរងគ្រោះស្ថិតក្នុងភូមិក្រពើហារកើត សង្កាត់ព្រែកឫស្សី ក្រុងតាខ្មៅ ខេត្តកណ្តាល។
មន្ត្រីនគរបាលក្រុងតាខ្មៅបានឲ្យដឹងថា ជនរងគ្រោះឈ្មោះ ពេជ្រ មុនី ភេទប្រុស អាយុ៤០ឆ្នាំ មានទីលំនៅភូមិក្រពើហារកើត សង្កាត់ព្រែកឫស្សី ក្រុងតាខ្មៅខេត្តកណ្តាលមុខរបរយោធា ។ ចំណែកជនសង្ស័យឈ្មោះ តុង ចាន់រ៉ា ភេទប្រុស អាយុ២៥ឆ្នាំ ជនជាតិខ្មែរ ស្នាក់នៅភូមិកំពង់សំណាញ់ សង្កាត់កំពង់សំណាញ់ ក្រុងតាខ្មៅ ខេត្តកណ្តាល មុខរបរមិនពិតប្រាកដ(ឃាត់ខ្លួន) ។ ដោយឡែកវត្ថុតាងចាប់យក ៖ អាវុធខ្លី១ដើមម៉ាកLOCK.17ពណ៌ខ្មៅផលិតនៅប្រទេសអូទ្រីសលេខ19.00520 ,បង់១ ,ស្រោមពណ៌ខ្មៅ១ និងគ្រាប់ចំនួន១៣គ្រាប់, កុំព្យូទ័រលេបថប១គ្រឿងម៉ាកASUSពណ៌ទឹកមាស, កន្ត្រៃដងជ័រពណ៌ក្រហមចំនួន១, ពិលពណ៌ខ្មៅចំនួន១ ម៉ាឡេតពណ៌ទឹកប្រាក់ចំនួន១, កាបូបស្ពាយពណ៌ខ្មៅចំនួន១,កាបូបដៃពណ៌ខ្មៅចំនួន១, ប័ណ្ណសម្គាល់យានយន្តផ្លាកលេខភ្នំពេញ1CB3314ចំនួន១សន្លឹក ។
ប្រភពដដែលបន្តថា នៅមុនកើតហេតុ ជនរងគ្រោះនិងក្រុមគ្រួសារបានចាកចេញពីផ្ទះទៅលេងផ្ទះម្តាយក្មេកនៅភូមិព្រែកតាពៅ សង្កាត់ដើមមៀន តាំងពីម៉ោង១០ព្រឹក ដោយបានចាក់សោរទ្វារផ្ទះត្រឹមត្រូវ។ លុះដល់វេលាកើតហេតុខាងលើ មានប្រជាពលរដ្ឋនៅជិតខាងបានបានរាយការណ៍ថា បានឮសូរដូចមានជនសង្ស័យលួចគាស់ផ្ទះដែលម្ចាស់មិននៅ ភ្លាមនោះកម្លាំងសមត្ថកិច្ចបានចុះអន្តរាគមន៍ដល់កន្លែងកើតហេតុ ស្រាប់តែឃើញជនសង្ស័យកំពុងស្ពាយកាបូបពណ៌ខ្មៅ ដើរចេញពីផ្ទះជនរងគ្រោះទើបធ្វើការឃាត់ខ្លួន ឆែកឆេររកឃើញវត្ថុតាងដូចខាងលើ រួចបញ្ជូនមកកាន់អធិការដ្ឋាននគរបាលក្រុងតាខ្មៅដើម្បីចាត់ការបន្តតាមនីតិវិធី ៕
