រកឃើញអ្នកប៉ះពាល់ជាមួយបុគ្គល កក្កដា សោភ័ណ្ឌ មានជំងឺកូវីដ-១៩ជិត៤០០នាក់ , អាជ្ញាធរខេត្តតាកែវ សម្រេចបិទភូមិ
តាកែវ ៖ បន្ទាប់ពីអ្នកផ្ទុកជំងឺកូវីដ-១៩ ម្នាក់ឈ្មោះ កក្កដា សោភ័ណ្ឌ បានមកចូលរួមពិធីអាពាហ៍ពិពាហ៍អ្នកភូមិកាលពីថ្ងៃទី១១ ខែមីនា លោក កេត ម៉ៅ អភិបាលស្រុកសំរោង ខេត្តតាកែវ បានថ្លែងនៅថ្ងៃទី១៥ ខែមីនា ឆ្នាំ២០២១នេះ អាជ្ញាធរសម្រេចបិទភូមិក្រាំងលាវ ឃុំរវៀង ទាំងមូលមិនឱ្យមានការចេញចូលនោះទេ ។
លោក កេត ម៉ៅ បានបញ្ជាក់ថា៖ អាជ្ញាធរសម្រេចបិទភូមិទាំងមូល មិនឱ្យមានការចេញចូលជាបណ្ដោះអាសន្ន ហើយចំពោះមនុស្សចំនួន២៥នាក់ ដែលប៉ះពាល់ផ្ទាល់ជាមួយអ្នកផ្ទុកជំងឺកូវីដ-១៩ ត្រូវបានមន្ត្រីសុខាភិបាលយកសំណាកទៅពិនិត្យរកជំងឺកូវីដ-១៩ និងបានដាក់ឱ្យធ្វើចត្តាឡីស័កចំនួន ១៤ថ្ងៃផងដែរ ដោយឡែកសម្រាប់អ្នកប៉ះពាល់ ដោយប្រយោលមានចំនួនជាង ៣៥៥នាក់ ក៏ត្រូវបានអាជ្ញាធរណែនាំឱ្យធ្វើចត្តាឡីស័កផងដែរ។
លោកអភិបាលស្រុកសំរោង បានធ្វើការណែនាំដល់មន្ត្រីមូលដ្ឋាន ឱ្យធ្វើការណែនាំដល់បងប្អូនកម្មករ កម្មការរិនីរោងចក្រមួយចំនួន ដែលបានចូលរួមក្នុងពិធីមង្គលការ ដែលអ្នកជំងឺកូវីដ-១៩ ត្រូវផ្អាកចេញទៅធ្វើការពោល គឺត្រូវធ្វើចត្តាឡីស័កនៅផ្ទះ ជៀសវាងទៅធ្វើការ ដែលនាំឱ្យមានការឆ្លងរីករាលដាល នៅក្នុងរោងចក្រដែលខ្លួនធ្វើការ។
អភិបាលខេត្តតាកែវ លោក អ៊ូច ភា នៅព្រឹកថ្ងៃទី១៥ ខែមីនានេះ បានចុះណែនាំដល់អាជ្ញាធរស្រុកសំរោង និងស្រុកបាទី ដែលមានមនុស្សប៉ះពាល់ផ្ទាល់ និងដោយប្រយោល ចំពោះអ្នកជំងឺកូវីដ-១៩ ដែលបានចូលរួមពិធីមង្គលការនៅក្នុងស្រុកសំរោង ដោយបានបញ្ជាដល់អាជ្ញាធរស្រុកឱ្យបិទជាបណ្ដោះអាសន្ន នៅទីតាំងមួយចំនួនដែលអ្នកជំងឺកូវីដ-១៩ បានធ្វើដំណើរទៅលេងមុននឹងចូលរួម នៅក្នុងពិធីមង្គលការ ដោយជៀសវាងការឆ្លងរីករាលដាលជំងឺកូវីដ-១៩ ជាពិសេសអាជ្ញាធរត្រូវធ្វើការស្រាវជ្រាវ ឱ្យបានច្បាស់លាស់ចំពោះអ្នកប៉ះពាល់ផ្ទាល់ ដើម្បីយកសំណាកពួកគេ ទៅធ្វើតេស្តរកជំងឺកូវីដ-១៩ និងត្រូវណែនាំឱ្យអ្នកប៉ះពាល់ផ្ទាល់ ឬប្រយោលត្រូវធ្វើចត្តាឡីស័ក ឱ្យគ្រប់ចំនួន១៤ថ្ងៃ។
គួរបញ្ជាក់ថា បុគ្គល កក្កដា សុភ័ណ្ឌ នាថ្ងៃទី១៤ ខែមីនា បានប្រកាសតាមហ្វេសប៊ុកផ្ទាល់ខ្លួនថា មាន «វិជ្ជមានកូវីដ១៩»។ កាលពីថ្ងៃទី១១ និងថ្ងៃទី១២ បុគ្គល កក្ដដា សោភ័ណ្ឌ បានមកចូលរួមពិធីមង្គលការមិត្តភក្តិ របស់ខ្លួននៅក្នុងភូមិក្រាំងលាវ ឃុំរវៀង ស្រុកសំរោង ខេត្តតាកែវ ដែលពិធីបង្គលការនេះ មានអ្នកចូលរួមប្រមាណ ៣០០នាក់៕
