រណារយន្ត១គ្រឿង និងឧបករណ៍ឆក់ត្រី១ដុំ ត្រូវបានមន្រ្តីឧទ្យានុរក្សដែនជម្រកសត្វព្រៃភ្នំព្រេច ដកហូតយកទៅរក្សាទុកនៅស្នាក់ការបរិស្ថាន

ខេត្តមណ្ឌលគិរី ៖ នៅក្នុងសប្ដាហ៍ទី៣ នៃខែមីនា ឆ្នាំ២០២១នេះ មន្រ្តីឧទ្យានុរក្សដែនជម្រកសត្វព្រៃភ្នំព្រេច ដោយមានការចូលរួមពីភ្នាក់ងារល្បាតសហគមន៍តំបន់ការពារធម្មជាតិ ដែលសហការនិងគាំទ្រដោយគម្រោងអង្គការ WWF បានចុះល្បាតរួមគ្នាហើយបានទប់ស្កាត់សកម្មភាពលួចអារឈើខុសច្បាប់ ហើយដកហូតបាននូវរណារយន្តចំនួន១គ្រឿង នៅចំណុចក្បែរអូរ ក្នុងតំបន់អភិរក្សនៃដែនជម្រកសត្វព្រៃភ្នំព្រេច ស្ថិតក្នុងភូមិសាស្រ្តអន្រ្ទងសាមគ្គីសែនជ័យ ឃុំពូជ្រៃ ស្រុកពេជ្រាដា ក្នុងដែនជម្រកសត្វព្រៃភ្នំព្រេច ខណៈនោះជនសង្ស័យបានរត់គេចខ្លួនបាត់។ ជាមួយគ្នានោះ ក្រុមការងារបានបន្តល្បាតនិងទប់ស្កាត់នូវសកម្មភាពនាំចូលឧបករណ៍នេសាទខុសច្បាប់ក្នុងតំបន់ការពារធម្មជាតិ ដែលជនសង្ស័យចំនួន២នាក់ កំពុងឆក់ត្រីនៅចំណុចក្បែរអូរតេ ហើយត្រូវបានមន្រ្តីឧទ្យានុរក្សទប់ស្កាត់និងដកហូតបានម៉ាស៊ីនឆក់ត្រីចំនួន១ និងអាគុយ១ យកទៅរក្សាទុកនៅស្នាក់ការបរិស្ថាន។ រីឯជនសង្ស័យបានរត់គេចខ្លួនបាត់៕