បុគ្គល ផែង វណ្ណៈ ទៅវត្តរាជបូណ៌ ដើម្បីក្រាបបង្គំសុំខមាទោសចំពោះព្រះតេជគុណ ពិន សែម
សៀមរាប ៖ បុគ្គល ផែង វណ្ណៈ ដែលបានប្រមាថ សមាជិកថេរសភាសង្ឃខេត្ត និងមន្ត្រីរដ្ឋបាលខេត្តសៀមរាប ព្រះតេជគុណ ពិន សែមព្រះគ្រូចៅអធិការវត្តរាជបូណ៌ ក្រុងសៀមរាប នៅព្រះបុគ្គលរូបនោះ អញ្ជើញទៅវត្តរាជបូណ៌ដើម្បីក្រាបបង្គំសុំខមាទោសចំពោះព្រះតេជគុណ ពិន សែម។
គួរបញ្ជាក់ថា បន្ទាប់ពីមានរឿងនេះកើតឡើង បុគ្គល ផែង វណ្ណៈ បានសរសេរលិខិតសុំខមាទោសចំពោះព្រះតេជគុណ ពិន សែម។
សូមបញ្ជាក់ថា សាលាគណខេត្តសៀមរាប បានចេញព្រះលិខិតមួយសូមក្រាបបង្គំទូលថ្វាយសម្តេចព្រះមហាសុមេធាធិបតី កិត្តិឧទ្ទេសបណ្ឌិត នន្ទ ង៉ែត សម្តេចព្រះសង្ឃនាយក នៃព្រះរាជាណាចក្រកម្ពុជា សូមទ្រង់ព្រះមេត្តាជ្រាប សំណើសុំឱ្យរាជរដ្ឋាភិបាលកម្ពុជា ថ្កោលទោសចំពោះបុគ្គល ផែង វណ្ណៈ ដែលបានប្រមាថ សមាជិកថេរសភាសង្ឃខេត្ត និងមន្ត្រីរដ្ឋបាលខេត្តសៀមរាប ។
តបតាមកម្មវត្ថុខាងលើ ទូលព្រះបង្គំ សូមទូលសម្ដេចទ្រង់ព្រះមេត្តាជ្រាបថា៖នៅយប់ថ្ងៃសៅរ៍១៥រោច ខែផល្គុន ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៤ ខែមីនា ឆ្នាំ២០២១ នៅវត្តរាជបូណ៌ មានករណីថតជាវីដេអូ នូវសកម្មភាពប្រៀនប្រដៅសិស្សគណរបស់ព្រះមហាវិមលធម្ម ដោយរំពាត់ផ្តៅ បានធ្វើឱ្យព័ត៌មាននេះដឹងដល់សាធារណជន ធ្វើឱ្យបញ្ហានេះត្រូវបានមន្ត្រីអាជ្ញាធរខេត្ត និងសាលាគណខេត្តសៀមរាប ស្រាវជ្រាវ ពិនិត្យទៅលើផ្លូវច្បាប់ និងទៅតាមធម៌វិន័យរបសព្រះពុទ្ធជាម្ចាស់ អាជ្ញាធរខេត្ត ដឹកនាំ ដោយ លោកជំទាវអភិបាលរងខេត្ត អមដំណើរដោយលោកប្រធានមន្ទីរធម្មការ និងសាសនាខេត្ត និងមន្ត្រី នគរបាលយុត្តិធម៌របស់ស្នងការនគរបាលខេត្តសៀមរាប បានធ្វើការស្រាវជ្រាវសាកសួរនូវហេតុការណ៍ផ្សេងៗ បានកំណត់នូវទង្វើរបស់ព្រះមហាវិមលធម្ម គឺមានគោលបំណងសុចរិត ធ្វើឡើងដោយគ្រាន់តែជាការ ប្រៀនប្រដៅទៅតាមបទបញ្ញត្តិ នៃបទបញ្ជាផ្ទៃក្នុងវត្តតែប៉ុណ្ណោះ ។
ចំណែកខាងសាលាគណខេត្តបាននិមន្ត បើកកិច្ចប្រជុំថេរសភាសង្ឃខេត្ត ហើយសម្រេចលើកទោសតាមវិន័យត្រូវអាបត្តិ (បាចិត្តិយ) ចំពោះព្រះមហាវិមលធម្ម ព្រះគ្រូចៅអធិការវត្តរាជបូណ៌ និងបានសម្រេចសូមឱ្យព្រះគ្រូចៅអធិការវត្ត ធ្វើកិច្ចសន្យា បញ្ចប់រឿង ។ ប៉ុន្តែអ្វីដែលគួរឱ្យសោកស្តាយបំផុត គឺបុគ្គលឈ្មោះ ផែង វណ្ណៈ បាន Lve តាមផេករបស់ខ្លួន បានលើកឡើងថាប្រសិនបើវាយកូនខ្ញុំបែបនេះ ខ្ញុំអត់ទៅប្តឹងទេ ខ្ញុំទៅបាញ់ចោលតែម្តងចំពោះអ្នកប្រព្រឹត្ត និងចោទបន្ថែមនូវពាក្យមិនពិតដោយពោលថាលោកជាជនរងគ្រោះរត់គេចខ្លួន ព្រោះខ្លាចគេតាមធ្វើបាបមិនហ៊ានចូលផ្ទះទៀតផង និងវាយប្រហារមន្ត្រីថេរសភាសង្ឃខេត្ត ដែលធ្វើឱ្យប៉ះពាល់ដល់កិត្តិយស សេចក្តី ថ្លៃថ្នូរព្រះពុទ្ធសាសនាដែលជាសាសនារបស់រដ្ឋយ៉ាងខ្លាំង ។
មិនត្រឹមតែប៉ុណ្ណោះ បុគ្គលរូបនេះ មានការជេរប្រមាថ មើលងាយដល់មន្ត្រីរាជការ អាជ្ញាធរខេត្តសៀមរាបយ៉ាងធ្ងន់ធ្ងរថែមទៀតផង ដោយពោលពាក្យថា ចង់យកផ្តៅវាយក្បាលម្នាក់បីផ្ដៅទៀតផង ។ មើលឃើញទង្វើអសីលធម៌របស់បុគ្គល ផែង វណ្ណៈ បែបនេះ ទូលព្រះបង្គំយើងខ្ញុំជាព្រះមេគណតំណាងឲ្យព្រះសង្ឃទូទាំងខេត្តសៀមរាប សូមព្រះរាជានុញ្ញាត ទ្រង់ព្រះមេត្តាប្រោសជួយស្នើសុំទៅរាជរដ្ឋាភិបាលឱ្យលោកមានចំណាត់ការថ្កោលទោស ចំពោះបុគ្គលឈ្មោះផែង វណ្ណៈ តាមច្បាប់ឱ្យសមនឹងទង្វើដែលជននេះ បានប្រព្រឹត្ត។
សកម្មភាពរបស់ព្រះតេជគុណ ពិន សែមព្រះគ្រូចៅអធិការវត្តរាជបូណ៌ ក្រុងសៀមរាប ដែលបានដាក់វិន័យ ក្នុងការប្រៀនប្រដៅ ដោយប្រើរំពាត់វាយធ្ងន់ៗទៅលើកូនសិស្សជាព្រះសង្ឃ ចំនួន៩អង្គ ដែលធ្វើខុស និងខ្ជិលរៀន គឺមិនមែនជាអំពើហិង្សាធ្វើទារុណកម្ម ទណ្ឌកម្មឃោរឃៅនោះទេ តែគឺជាអំពើទូន្មានប្រៀនប្រដៅ និងការដាក់វិន័យរបស់ព្រះគ្រូចៅអធិការដល់ ភិក្ខុ និងសាមណេរ ដែលប្រព្រឹត្តខុសនិងវិន័យ ដែលបានចែងក្នុងបទកំណត់ផ្ទៃក្នុងរបស់វត្តរាជបូណ៌តែប៉ុណ្ណោះ ប៉ុន្តែ ព្រះគ្រូចៅអធិការក៏បានយល់ពីកំហុសថាបានដាក់វិន័យទៅដល់ ភិក្ខុសង្ឃ និងសាមណេរក្នុងរូបភាពនេះ គឺជាការផ្ទុយនឹងច្បាប់កម្ពុជា ព្រមទាំងបានធ្វើកិច្ចសន្យា បញ្ឈប់នូវការធ្វើអំពើរបៀបនេះទៀត។
រឿងនៅវត្តរាជបូរ ដំណោះស្រាយគឺថា បើលោកអង្គណា នៅតស៊ូនៅក្នុងវិន័យសង្ឃនេះមិនបានទេ ក៏សូមអញ្ជើញទៅនៅវត្តផ្សេងទៅ។ ឬមួយទទួលវិន័យនេះ ឬមួយសឹកចេញ ឬមួយទៅនៅវត្តផ្សេង ជាសិទ្ធិរបស់ខ្លួនទេ។ ព្រោះថាបើវត្តអត់មានវិន័យត្រឹមត្រូវទេ ក្នុងសម័យនេះ រកព្រះសង្ឃដ៏ល្អម្នាក់ យកមកគោរពថ្វាយបង្គុំអត់បានផង អីចឹងត្រូវតែពត់លោកសង្ឃទាំងនេះអោយត្រង់ផ្លូវ តាមមាគារបស់ព្រះពុទ្ធអង្គ។ មួយវិញទៀត មុនដាក់វិន័យដល់សង្ឃទាំងឡាយ គឺមានការប្រជុំគណៈង្ឃយ៉ាងត្រឹមត្រូវ ដើម្បីបើកបង្ហាញប្រាប់ពីទោស កំហុស ទាំងឡាយ រហូតឈានដល់ការដាក់ពិន័យឬទណ្ឌកម្ម តែត្រូវអោយសង្ឃទាំងអស់នោះ ស្ម័គ្រចិត្តទទួលយកការដាក់ពិន័យនេះដោយខ្លួនឯង គឺថាព្រមទទួលយក ឬមិនសុខចិត្តទេក៏ចាកចេញទៅនៅវត្តផ្សេងទៅ ឬមួយសឹកចេញទៅ។ តែបើព្រមទទួលយកការដាក់ពិន័យនេះហើយ ហេតុអ្វីក៏មានអ្នកលួចថត យកមកបង្ហោះ? អ្នកលួចថតបង្ហោះ ក្នុងចេតនាអី? ជារនុកក្នុង? ចង់កម្ចាត់ព្រះសង្ឃដែលប្រតិបត្តិល្អក្នុងព្រះពុទ្ធសាសនា?។
បើតាមសេចក្តីជូនដំណឹងរបស់គណៈសង្ឃនាយកនៃកម្ពុជា នៅថ្ងៃទី១៥ ខែមីនា ឆ្នាំ២០២១នេះ បានបញ្ជាក់ថា ករណីព្រះតេជគុណ ពិន សែម ព្រះគ្រូចៅអធិការវត្តរាជបូណ៌ ក្រុងសៀមរាប ខេត្តសៀមរាប ដាក់វិន័យកូនសិស្សដោយប្រើហិង្សា ត្រូវបានដោះស្រាយរួចរាល់ហើយ។
យោងតាមសេចក្តីជូនដំណឹង របស់លេខាធិការដ្ឋានគណៈសង្ឃនាយកនៃកម្ពុជា, គណៈសង្ឃនាយក ថែមទាំងបានសំណូមពរ ដល់ព្រះមន្ត្រីសង្ឃ ព្រះថេរានុថេរៈ និងសាធារណជន ព្រះមេត្តា និងមេត្តាទទួលយក និងរក្សាភាពស្ងៀមស្ងាត់ បញ្ចប់ការលើកឡើងពីបញ្ហានេះបន្តទៀត។
បន្ទាប់ពីបែកធ្លាយវីដេអូលើបណ្តាញសង្គមហ្វេសប៊ុក មានការរិះគន់ជាខ្លាំងចំពោះសកម្មភាពរបស់ព្រះតេជគុណ ពិន សែម ដែលបានដាក់វិន័យ ក្នុងការប្រៀនប្រដៅ ដោយប្រើរំពាត់វាយធ្ងន់ៗទៅលើកូនសិស្សជាព្រះសង្ឃ ចំនួន៩អង្គ ដែលធ្វើខុស និងខ្ជិលរៀន ប៉ុន្តែករណីនេះពេលស្រាវជ្រាវទៅ មិនមែនជាអំពើហិង្សាធ្វើទារុណកម្ម ទណ្ឌកម្មឃោរឃៅនោះទេ តែគឺជាអំពើទូន្មានប្រៀនប្រដៅ និងការដាក់វិន័យរបស់ព្រះគ្រូចៅអធិការដល់ ភិក្ខុ និងសាមណេរ ដែលប្រព្រឹត្តខុសនឹងវិន័យ។
បន្ទាប់ពីដោះស្រាយរួចរាល់ហើយនោះ គណៈសង្ឃនាយក ថែមទាំងបានប្រគេន និងជម្រាបជូន ព្រះរាជាគណៈ ព្រះមន្ត្រីសង្ឃ ព្រះថេរានុថេរៈ និងសាធារណជន ព្រះមេត្តា និងមេត្តាជ្រាបស្តីពី កំណត់ហេតុសម្របសម្រួលករណីហិង្សាព្រះសង្ឃ និងព្រះសង្ឃ និងកិច្ចសន្យារបស់ ព្រះមហាវិមលធម្ម ពិន សែម សិរីសុវណ្ណោ និងជាព្រះគ្រូចៅអធិការវត្តរាជបូណ៌ ក្រុងសៀមរាបផងដែរ។
ក្នុងកំណត់ហេតុនោះ បានបញ្ជាក់ថា ដោយបានពិនិត្យមើលសេចក្តីបំភ្លឺ និងចម្លើយ របស់ភិក្ខុ និងសាមណេរ ០៩ ព្រះអង្គ និងចម្លើយរបស់ ព្រះតេជគុណ ពិន សែម ព្រះចៅអធិការវត្តរាជបូណ៌រួចមក យើងសន្និដ្ឋានបានថា ករណីនេះមិនមែនជាអំពើហិង្សាធ្វើទារុណកម្ម ទណ្ឌកម្មឃោរឃៅនោះទេ តែគឺជាអំពើទូន្មានប្រៀនប្រដៅ និងការដាក់វិន័យរបស់ព្រះគ្រូចៅអធិការដល់ ភិក្ខុ និងសាមណេរ ដែលប្រព្រឹត្តខុសនិងវិន័យ ដែលបានចែងក្នុងបទកំណត់ផ្ទៃក្នុងរបស់វត្តរាជបូណ៌តែប៉ុណ្ណោះ ហើយព្រះសង្ឃដែលធ្លាប់ទទួលវិន័យទាំង០៩អង្គសុទ្ធតែមានសង្ឃដីកាថា ពួកខ្លួនពិតជាយល់ព្រមទទួលនូវវិន័យទាំងនេះ។ ហើយព្រះគ្រូចៅអធិការក៏បានយល់ពីកំហុសថាបានដាក់វិន័យទៅដល់ ភិក្ខុសង្ឃ និងសាមណេរក្នុងរូបភាពនេះ គឺជាការផ្ទុយនឹងច្បាប់កម្ពុជា ព្រមទាំងបានធ្វើកិច្ចសន្យា បញ្ឈប់នូវការធ្វើអំពើរបៀបនេះទៀត។
បើតាមកិច្ចសន្យារបស់ព្រះតេជគុណ ពិន សែម ដែលមានព្រះជុន្មាយុ ៨០ព្រះវស្សា បានឲ្យដឹងថា៖
១. ស្វែងយល់ពីច្បាប់នៃព្រះរាជណាចក្រកម្ពុជា ស្តីពីការទប់ស្កាត់អំពើហិង្សាក្នុងគ្រួសារ និងកិច្ចការពារជនរងគ្រោះ ច្បាប់ស្តីពីសិទ្ធិមនុស្ស ច្បាប់ស្តីពីកិច្ចការពារកុមារ។
២. អាត្មាភាពឈប់អប់រំភិក្ខុ និងសាមណេរ តាមបែបប្រើអំពើហិង្សាវាយដំចាប់ពីថ្ងៃនេះតទៅ។
៣. អាត្មាភាពសូមកែប្រែនូវការអប់រំ ទូន្មានប្រដៅដល់ភិក្ខុ និងសាមណេរតាមបែបវិន័យព្រះពុទ្ធសាសនា និងអហិង្សាវិញ។
៤. ចាប់ពីថ្ងៃនេះតទៅអាត្មាភាពមិនមានការគុំគួន ស្អប់ខ្ពើមរើសអើងដល់ភិក្ខុ និងសាមណេរ ដែលបានប្រព្រឹត្តខុសក្នុងវត្តរាជបូណ៌ ឬបោះបង់គ្រប់សង្ឃ
ដែលប្រព្រឹត្តកំហុសនោះឡើយ គឺប្រៀនប្រដៅដោយយុត្តិធម៌ និងមិនលំអៀង។
៥. អាត្មាភាពបន្តការដឹកនាំភិក្ខុ និងសាមណេរ នៅក្នុងវត្តរាជបូណ៌ ដើម្បីឲ្យមានភាពរីកចំរើនប្រកបដោយកិត្តិយសក្នុងព្រះពុទ្ធសាសនា។
ទោះយ៉ាងណា ដោយសារតែបុគ្គល ផែង វណ្ណៈ ប្រើពាក្យសម្តីប្រមាថដល់ព្រះសង្ឃមកនោះ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន បានចេញសេចក្តីសម្រេចលុបអាជ្ញាប័ណ្ណសារព័ត៌មានរបស់បុគ្គលផែង វណ្ណៈ ជាស្ថាពរ៕ រក្សាសិទ្ធិដោយ៖បញ្ញាស័ក្តិ
