កោះហៅបុគ្គលម្នាក់ ដែលផ្សព្វផ្សាយប្រឌិតព័ត៌មានបែបចរិកញុះញង់ និងរេីសអេីងថា អ្នកធ្វេីចត្ដាឡីស័ក សុទ្ធតែអ្នកផ្ទុកមេរោគ កូវីដ-១៩
កំពង់ស្ពឺ ៖ នគរបាលខេត្តកំពង់ស្ពឺ បានកោះហៅបុគ្គលម្នាក់ដែលបានផ្សព្វផ្សាយប្រឌិតព័ត៌មានបែបចរិកញុះញង់និងរេីសអេីង ចំពោះកិច្ចខិតខំប្រឹងប្រែងរបស់លោកគ្រូ អ្នកគ្រូពេទ្យ និងកងកម្លាំងនគរបាលប្រចាំការនៅកន្លែងធ្វេីចត្ដាឡីស័ក ថា សុទ្ធតែអ្នកផ្ទុកមេរោគ កូវីដ-១៩ មកសារភាពបកស្រាយចំពោះការបំភ្លៃព័ត៌មានបែបនេះ។
នៅថ្ងៃទី២៩ខែមីនាឆ្នាំ២០២១នេះ ក្រុមការងារប្រតិកម្មរហ័សស្នងការដ្ឋាននគរបាលខេត្តកំពង់ស្ពឺ បានស្រាវជ្រាវកោះហៅបុគ្គលម្នាក់ ឈ្មោះ គង់ វណ្ណឫទ្ធិ ដែលបានផ្សព្វផ្សាយប្រឌិតព័ត៌មានបែបចរិកញុះញង់និងរេីសអេីង ចំពោះកិច្ចខិតខំប្រឹងប្រែងរបស់លោកគ្រូ អ្នកគ្រូពេទ្យ និងកងកម្លាំងនគរបាលប្រចាំការនៅកន្លែងធ្វេីចត្ដាឡីស័ក ថា សុទ្ធតែអ្នកផ្ទុកមេរោគ កូវីដ-១៩ ដោយបានគោលការណ៍ឯកភាពពីថ្នាក់ដឹកនាំខេត្ដ និងការទទួលស្គាល់អំពីកំហុស បុគ្គលខាងលើបានធ្វេីការសុំទោសដល់លោកគ្រូ អ្នកគ្រូពេទ្យ និងកងកម្លាំងនគរបាល និងប្រជាពលរដ្ឋ សន្យាថានិងកែខ្លួនឈប់ប្រព្រឹត្ដនូវទង្វេីមិនគួរគម្បីរេីសអេីងចំពោះអ្នកកូវីដ-១៩ និងប្ដេជ្ញាការពារព័ត៌មានញុះញង់គ្រប់រូបភាព។
បុគ្គលម្នាក់ ឈ្មោះ គង់ វណ្ណឫទ្ធិ អះអាងថា ជាចុងក្រោយក្នុងនាមខ្លួនជាពលរដ្ឋខ្មែរមួយរូបសូមចូលរួមគាំទ្រយ៉ាងពេញទំហឹងចំពោះកិច្ចខិតខំប្រឹងប្រែងរបស់ រាជរដ្ឋាភិបាលកម្ពុជា ពិសេសប្រមុខរាជរដ្ឋាភិបាល សម្ដេចតេជោ ហ៊ុន សែន នាយករដ្ឋមន្រ្ដី នៃព្រះរាជាណាចក្រកម្ពុជា ក្នុងការប្រយុទ្ធប្រឆាំងជំងឺកូវីដ-១៩ ជូនពរបងប្អូនប្រជាពលរដ្ឋខ្មែរ ជៀសផុតពីជំងឺកូវីដ-១៩ « ៣ ការពារ ៣ កុំ »៕
