កម្លាំងនគរបាលជំនាញ កសាងសំណុំរឿង បញ្ជូនជនសង្ស័យម្នាក់ ខឹងគេបើកឡានឆាបម៉ូតូយកដុំថ្មគប់កញ្ចក់ក្រោយ
ខេត្តបាត់ដំបង ៖ នៅថ្ងៃទី៤ ខែមេសា ឆ្នាំ២០២១នេះ កម្លាំងក្រុមអន្តរាគមន៍ និងបង្ការ បានកំពុងកសាងសំណុំរឿងបញ្ជូនជនសង្ស័យម្នាក់ ខឹងគេបើកឡានឆាបម៉ូតូយកដុំថ្មគប់កញ្ចក់ក្រោយ នៅចំណុច ភូមិ ២០ ឧសភា សង្កាត់ស្វាយប៉ោ ក្រុងបាត់ដំបង ខេត្តបាត់ដំបង ទៅតុលាការ ។
តាមរបាយការណ៍បានឲ្យដឹងថា ជនសង្ស័យរូបនេះ បានគប់កញ្ចក់ រថយន្ត បណ្តាលឲ្យបែកកញ្ចក់ខាងក្រោយរថយន្ត កាលពីថ្ងៃទី៣០ ខែមីនា ឆ្នាំ២០២១ វេលាម៉ោង ប្រហែល ១៨និង៣០នាទី លុះដល់ថ្ងៃទី០២ ខែមេសា ឆ្នាំ២០២១ វេលាម៉ោង២៣និង២០នាទី សមត្ថកិច្ចបានឃាត់ខ្លួនជនសង្ស័យ ឈ្មោះ ឌិន ពៅ ហៅ ង៉ោល ភេទប្រុស អាយុ ៣២ ឆ្នាំ មានទីលំនៅ ភូមិព្រៃទទឹង ឃុំជ្រៃ ស្រុកថ្មគោល ខេត្តបាត់ដំបង មក កាន់ស្នងការដ្ឋាននគរបាលខេត្តបាត់ដំបង។
ក្រោយ ពី បានឃាត់ខ្លួន សមត្ថកិច្ចបានធ្វើការ សាកសួរ ជនសង្ស័យ ដោយជនសង្ស័យបាន ឆ្លើយសារភាពថា ៖ កាលពី ថ្ងៃទី ៣០ ខែមីនា ឆ្នាំ២០២១ វេលាម៉ោង ប្រហែល ១៨និង៣០ នាទី ជនសង្ស័យ បាន ចេញ ពី ផ្ទះ ដែល ស្ថិត នៅ ក្នុង ភូមិព្រៃទទឹង ឃុំជ្រៃ ស្រុកថ្មគោល ខេត្តបាត់ដំបង ជាមួយមិត្តភក្តិ ម្នាក់ទៀត ឈ្មោះ សត់ ភេទប្រុស អាយុ ប្រហែល ២៦ ឆ្នាំ ដោយជិះម៉ូតូម្នាក់មួយគ្រឿង ដើម្បីមកហូបចុក នៅក្នុងក្រុងបាត់ដំបង ។ លុះដល់ពេល ត្រឡប់ទៅផ្ទះវិញ ជនសង្ស័យបានស្រវឹងស្រាតិចៗដែរ នៅពេលជិះម៉ូតូតាមផ្លូវដល់ចំណុចមុខវត្តរូង ស្រាប់តែមានរថយន្តដឹកទំនិញធុនធំមួយគ្រឿង បើកមកឆាបជនសង្ស័យ ដែលកំពុងជិះម៉ូតូតាមផ្លូវ ពេលនោះជនសង្ស័យក៏បានឈប់ម៉ូតូរើសយកដុំថ្ម ០១ ដុំ គប់ទៅលើកញ្ចក់រថយន្តនោះ ហើយក៏បានជិះម៉ូតូរត់គេចខ្លូនរហូត ដល់ថ្ងៃទី ០២ ខែ មេសា ឆ្នាំ២០២១ វេលាម៉ោង២៣និង២០នាទី ទើបកម្លាំងសមត្ថកិច្ចធ្វើការនាំខ្លួនមកកាន់ស្នងការដ្ឋាន ។
ជនរងគ្រោះ ឈ្មោះ ជឹង ប៉ូច ភេទប្រុស អាយុ ៣៨ ឆ្នាំ មានទីលំនៅ ភូមិ អូរតាគាំ ១ សង្កាត់ ទួលតាឯក ក្រុងបាត់ដំបង ខេត្តបាត់ដំបង ។
សម្ភារខូចខាតមានរួមមាន ៖ រថយន្ត ម៉ាក ហ៊ីយ៉ាន់ដាយ ពណ៌ក្រហម ពាក់ផ្លាកលេខ បន្ទាយមានជ័យ 3A-1679 បណ្ដាលឲ្យបែក កញ្ចក់ក្រោយ ។
វត្ថុតាង ដកហូត រួម មាន ៖ ម៉ូតូ ០១ គ្រឿង ម៉ាកហុងដា ឌ្រីម សេ ១២៥ ពណ៌ខ្មៅស៊េរីឆ្នាំ ២០១៣ ពាក់ផ្លាកលេខ បាត់ដំបង 1Q-5482 ( ដែល ជា ម៉ូតូ ជិះ ធ្វេី សកម្មភាព ) ។
បច្ចុប្បន្ន កម្លាំងនគរបាលការិយាល័យ ជំនាញនៃស្នងការដ្ឋាននគរបាលខេត្ត កំពុងតែធ្វើការកសាងសំណុំរឿង បញ្ជូន ទៅសាលាដំបូងខេត្ត ដេីម្បីចាត់ការ បន្តតាមនីតិវិធី ៕
