១០ប្រភេទកីឡា កំពុងហ្វឹកហាត់លក្ខណៈប្រមូលផ្តុំ ត្រៀមស៊ីហ្គេម ២០២១

CAMSOC-ភ្នំពេញ៖ គណៈកម្មាធិការជាតិអូឡាំពិកកម្ពុជា (NOCC) ក៏ដូចជា គណៈកម្មាធិការជាតិ CAMSOC កំពុងតាមដានត្រួតពិនិត្យមើលវឌ្ឍនភាពការហ្វឹកហាត់លក្ខណៈប្រមូលផ្តុំ ដើម្បីកសាងសមត្ថភពរបស់កីឡាករ កីឡាការិនីជម្រើសជាតិ ដែលត្រូវហ្វឹកហាត់ត្រៀមផង និងត្រូវតែទប់ស្កាត់ការរីករាលដាលជំងឺកូវីដ-១៩ក្នុងពេលជាមួយគ្នាដែរ ដោយវិបត្តិនេះកំពូងបង្កផលប៉ះពាល់ជាទូទៅ ក៏ដូចជាប៉ះពាល់ដល់ការហ្វឹកហាត់របស់ក្រុមជម្រើសជាតិយើងដែរ។ ទោះយ៉ាងនេះក្តី ក៏ការហ្វឹកហាត់លក្ខណៈប្រមូលផ្តុំត្រូវបានធ្វើឡើងប្រមាណ១០ប្រភេទកីឡាហើយ។

ឯកឧត្តម វ៉ាត់ ចំរើន អគ្គលេខាធិការ NOCC និង CAMSOC គូសបញ្ជាក់ថា បច្ចុប្បន្នយើងបានមូលមតិគ្នានៅក្នុងកិច្ចពិភាក្សាគ្នាជាញឹកញាប់ ជាមួយឯកឧត្តម ស សុខា រដ្ឋលេខាធិការ ក្រសួងអប់រំ យុវជន និងកីឡា ដែលឯកឧត្តមទទួលបន្ទុកវិស័យកីឡាទាំងមូលបានបង្ហាញឆន្ទៈចង្អុល ឲ្យក្រុមការងារបច្ចេកទេសទាំងអស់ឲ្យរៀបចំការហ្វឹកហាត់បន្ត ក៏ដូចជាស្នើសុំឲ្យសហការជាមួយគណៈកម្មាធិការជាតិអូឡាំពិកកម្ពុជា និងមជ្ឈមណ្ឌលជាតិហ្វឹកហ្វឺនកីឡានៃក្រសួងអប់រំឲ្យពិនិត្យមើលលទ្ធភាព នៃការប្រមូលផ្តុំឡើងវិញ ដើម្បីត្រៀមចូលរួមប្រកួតប្រជេងមេដាយ នៅក្នុងការប្រកួតកីឡា ស៊ីហ្គេម លើកទី៣២ ដែលគ្រោងចាប់ផ្តើមពីថ្ងៃទី២១ ខែវិច្ឆិកា រហូតដល់ថ្ងៃទី២ ខែធ្នូ ឆ្នាំ២០២១ នៅប្រទេសវៀតណាម។ ដូច្នេះពេលវេលានេះកាន់តែខើចទៅៗ ដែលយើងត្រូវតែរៀបចំការប្រមូលផ្តុំហ្វឹកហាត់ត្រៀមឲ្យបានមុនពេលប្រកួត យ៉ាងហោចណាស់ ក៏បាន៧ខែទៅ៨ខែដែរ ដើម្បីបង្កើនសមត្ថភាពកម្លាំងកាយបច្ចេកទេសរបស់យើងឲ្យមានសមត្ថភាពមួយ មានភាពស្មើមុខស្មើមាត់ទាំងកម្លាំងកាយ បច្ចេកទេស ក្នុងការប្រកួតប្រជែងមេដាយ តាមគោលបំណងរបស់យើងដែលចង់បាន។

ម្យ៉ាងទៀត ការហ្វឹកហាត់លក្ខណៈប្រមូលផ្តុំលើគ្រប់ប្រភេទកីឡាទាំងអស់នេះ អាចបង្កើនគុណភាពបច្ចេក ទេសបានផង ហើយអាចការពារការរីករាលដាលនៃជំងឺកូវីដ-១៩បានផង ដែល២ ចំណុចសំខាន់ៗទាំងពីរនេះគឺជាយុទ្ធសាស្ត្រត្រូវដើរស្របគ្នា ហើយអ្វីដែលសំខាន់គឺឆន្ទៈដ៏មុះមុតរបស់កីឡាករ កីឡាការិនីជម្រើសជាតិ គ្រូបង្វឹក សហព័ន្ធកីឡាជាតិនីមួយៗបូកជាមួយគោលការណ៍ដឹកនាំ របស់មជ្ឈមណ្ឌលជាតិហ្វឹកហ្វឺនកីឡា អគ្គនាយកដ្ឋានកីឡា ក្រសួងអប់រំ យុវជន និងកីឡា ស្របគ្នានឹងការជួយគាំទ្រពីគណៈកម្មាធិការជាតិអូឡាំពិកកម្ពុជា និងគណៈកម្មាធិការជាតិ CAMSOC ដើម្បីជំរុញឲ្យយុទ្ធសាស្រ្តទាំងពីរនេះដើរទន្ទឹមគ្នា។ យើងត្រូវកែប្រែការហ្វឹកហាត់តាមគន្លងថ្មី ដូច្នេះលទ្ធភាពរបស់សហព័ន្ធកីឡាជាតិនីមួយៗនៃការប្រមូលផ្តុំហ្វឹកហាត់មានភាពខុសៗគ្នា ដោយយើងផ្តល់លទ្ធភាពការគ្រប់គ្រងកន្លែងហ្វឹកហាត់ណា មានលក្ខណៈសម្បត្តិគ្រប់គ្រាន់ធានាបាននូវការទប់ស្កាត់ការរីករាលដាលជំងឺកូវីដ-១៩ បាន ធានាបាននូវការស្នាក់នៅរួម ការហូបចុករួម បិទទីតាំងហ្វឹកហាត់របស់ខ្លួនបានប្រកបដោយសុខសុវត្ថិភាពបាន ទើបក្រសួងអប់រំ មជ្ឈមណ្ឌលជាតិហ្វឹកហ្វឺនកីឡា និងNOCC លើកទឹកចិត្តឲ្យប្រភេទកីឡាជាតិនោះ អាចហ្វឹកហាត់បាន ប៉ុន្តែបើសហព័ន្ធកីឡាជាតិណាខ្លះដែលមិនទាន់អាចទៅរួច យើងរង់ចាំពេលវេលាអំណោយផលធូរស្បើយពីជំងឺកូវីដ-១៩សិន។ មកដល់ពេលនេះមានសហព័ន្ធកីឡាជាតិប្រមាណ១០ហើយ ដែលចាប់ផ្តើមប្រមូលផ្តុំហ្វឹកហាត់ ត្រៀមស៊ីហ្គេម ចុងឆ្នាំ២០២១ហើយ ខណៈសហព័ន្ធកីឡាជាតិផ្សេងៗទៀតកំពុងរៀបចំពិនិត្យមើលលទ្ធភាពប្រមូលផ្តុំ ដូចជានៅមជ្ឈមណ្ឌលជាតិហ្វឹកហ្វឺនកីឡានៃពហុកីឡដ្ឋានជាតិអូឡាំពិក និងពហុកីឡដ្ឋានជាតិមរតកតេជោ ស្ថិតនៅខណ្ឌជ្រោយចង្វារ រាជធានីភ្នំពេញ ដែលមានទីធ្លាហ្វឹកហាត់ធំទូលាយ ដែលមានប្រមាណ១០ប្រភេទកីឡាដែរ សម្រាប់ការហូបចុក ស្នាក់នៅរួម ហ្វឹកហាត់រួម បានប្រមាណ៣០០នាក់នៅទីនោះដែរ។ ប្រសិនបើក្រោយបញ្ចប់វិបត្តិជំងឺកូវីដ-១៩ នោះការប្រមូលផ្តុំហ្វឹកហាត់ទ្រង់ទ្រាយធំគ្រប់ប្រភេទកីឡាទាំងអស់ នឹងត្រូវធ្វើឡើងភ្លាមៗ ដើម្បីត្រៀមប្រជែងមេដាយ។

ឯកឧត្តម វ៉ាត់ ចំរើន សង្កត់ធ្ងន់ថា CAMSOC តែងតែធ្វើទំនាក់ទំនងជាប់រហូតជាមួយ សាធារណរដ្ឋប្រជាមានិតចិន ក្រសួងកីឡាចិន តាមរយៈស្ថានទូតចិនតែងតែបញ្ជូនសារទៅវិញទៅមកជាមួយកម្ពុជា ក្នុងការភ្ជាប់ជំនួនអភិវឌ្ឍជំនាញបច្ចេកទេសកីឡាកម្ពុជា ពីឆ្នាំ២០២១ដល់ឆ្នាំ២០២៣ ដែលជាការត្រៀមទទួលធ្វើម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣ នៅកម្ពុជា ដោយយើងបានត្រៀមក្រុមកីឡាករ កីឡាការិនីជម្រើសជាតិកម្ពុជាចំនួន១៣៥នាក់ បូករួមទាំងគ្រូបង្វឹក គ្រូជំនួយ ម្នាក់ ឬពីរនាក់ ក្នុង១ប្រភេទកីឡា ក្នុងការចេញទៅគ្រប់គ្រងដឹកនាំកូនសិស្សរបស់ខ្លួន សម្រាប់ការហ្វឹកហាត់នៅប្រទេសចិន ដោយត្រៀមចេញទៅហ្វឹកហាត់នៅក្នុងខែកក្កដា ឬខែសីហា ឆ្នំា២០២១។ អត្តពលិកកម្ពុជាចំនួន១៥៣នាក់របស់កម្ពុជានេះ គឺជាអត្តពលិកដែលមានគុណភាពខ្ពស់ៗ ជាងគេបំផុតក្នុងចំណោមជាង១០ប្រភេទកីឡា ដែលភាគីចិនជាអ្នកមកជ្រើសរើសដោយខ្លួនឯង។ ក្រៅពីការហ្វឹកហាត់នៅចិន ក្រុមជម្រើសជាតិកម្ពុជា លើប្រភេទកីឡាមួយចំនួនទៀត ដូចជាការ៉ាតេត្រៀមចេញទៅហ្វឹកហាត់នៅជប៉ុន, តេក្វាន់ដូ WT ទៅហ្វឹកហាត់នៅសាធារណរដ្ឋកូរ៉េ រីឯកីឡាករ កីឡាការិនី មានឈាមជ័រជាខ្មែរផ្សេងៗទៀតរស់នៅក្រៅប្រទេសស្រាប់ ដូចជាខេស៊ី កីឡាការិនីជឺជីតស៊ូ ខាន់ ជេសា ដែលជាម្ចាស់មេដាយមាសអាស៊ី (ASIAN Games) ឆ្នាំ២០១៨ និងជាម្ចាស់មេដាយមាស កីឡាស៊ីហ្គេម (SEA Games) លើកទី៣០ នៅប្រទេសហ្វីលីពីន ឆ្នាំ២០១៩ ក៏ត្រូវបានជំរុញលើកទឹកចិត្តឲ្យបន្តការហ្វឹកហាត់ ក្នុងពេលដំណាលគ្នាផងដែរ៕