ខ្ទឹមសរជាផលិតផលកម្ពុជាដំបូង បានដាំសាកល្បង ដោយជោគជ័យ នៅខេត្តមណ្ឌលគីរី

ខេត្តមណ្ឌលគីរី៖ ឯកឧត្តមវេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ បានថ្លែងសារនៅលើហ្វេសប៊ុកផ្លូវការនាថ្ងៃទី ១០ ខែមេសាឆ្នាំ ២០២១ នេះថា ខ្ទឹមសរដែលជាផលិតផលកម្ពុជាដំបូង បានដាំសាកល្បងដោយជោគជ័យ នៅក្នុងឆ្នាំនេះ នៅខេត្តមណ្ឌលគីរី ។

ឯកឧត្តមវេង សាខុន សង្ឃឹមថា ឯកឧត្តម លោកជំទាវ លោក លោកស្រី និងនាងកញ្ញា នឹងពេញចិត្ត ហើយជួយទិញមកបរិភោគ នាពេលខាងមុខ ជាមិនខាន ដើម្បីចូលរួមចំណែកលើស្ទួយផលិតផលកម្ពុជា ជាពិសេសលើកទឹកចិត្តដល់កសិកររបស់យើងក្នុងការពង្រីកដាំដុះនាពេលខាងមុខ ។

ក្នុងនាមថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ ឯកឧត្តមវេង សាខុន រដ្ឋមន្ត្រីក្រសួងកសិកម្ម សូមចូលរួមអបអរសាទរ ជាមួយកសិករនៅខេត្តមណ្ឌលគីរី ចំពោះលទ្ធផលសម្រេចបានគួរជាទីពេញចិត្ត លើការដាំខ្ទឹមសរសាកល្បង នៅលើទឹកដីខ្ពង់រាបឥសានមួយនេះ។

សូមបញ្ជាក់ថា៖ កាលពីថ្ងៃចន្ទ ទី ១៤ ខែ ធ្នូ ឆ្នាំ២០២០ ដោយមានការណែនាំពីខ្ញុំផ្ទាល់ លោក សុង ឃាង ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តមណ្ឌលគិរី បាននាំយកពូជខ្ទឹមសរ ទៅចែកជូនបងប្អូនកសិករ ចំនួន ០៥ គ្រួសារ ដើម្បីធ្វើការដាំដុះសាកល្បង បន្ទាប់ការដាំដុះដំឡូងបារាំង និងដំណាំមួយចំនួនទៀតទទួលបានជោគជ័យកន្លងមក ។ ក្នុងករណី ការដាំដុះប្រព្រឹត្តទៅបានល្អប្រសើរនោះ ក្រសួងនឹងមានផែនការពង្រីកដំណាំនេះឲ្យបានច្រើន ដើម្បីឈានទៅកាត់បន្ថយការនាំចូលដ៏ច្រើនសន្ធឹកសន្ធាប់ក្នុងមួយឆ្នាំៗពីប្រទេសជិតខាង នាពេលអនាគត ។

អស់រយៈបីខែកន្លងផុតទៅ នៅ ថ្ងៃទី១៦ ខែមីនា ឆ្នាំ២០២១ លោកប្រធាន រួមដំណើរជាមួយសហការី បានចូលរួមប្រមូលផលដំណាំខ្ទឹមស របស់កសិករ ភិន ផន ស្ថិតនៅភូមិដោះក្រមុំ សង្កាត់សុខដុម ក្រុងសែនមនោរម្យ ដែលបានដាំដុះក្នុងរយៈពេលបីខែកន្លងទៅ ទទួលបានជោគជ័យល្អប្រសើរ មានទិន្នផលខ្ពស់ ហើយឆ្លើយតបទៅនឹងតម្រូវការទីផ្សារ និងប្រកបដោយគុណភាព សុវត្តិភាពដល់អ្នកប្រើប្រាស់ ហើយទន្ទឹមនឹងនេះក៏ទទួលបានតម្លៃល្អប្រសើផងដែរ បើប្រៀបធៀបទៅនឹងមុខដំណាំផ្សេងទៀត ។ តាមរយៈលទ្ធផលដែលទទួលបាននៅឆ្នាំនេះ កសិករដែលប្រកបរបរដាំដុះដំណាំកសិកម្ម នៅក្នុងខេត្តមណ្ឌលគីរី មានផែនការក្នុងការពង្រីកផ្ទៃដីបន្ថែមទៀតលើការដាំដុះដំណាំខ្ទឹមស ដែលជាដំណាំមានសក្កានុពល និងជាសមិទ្ធិផលថ្មីមួយទៀតសម្រាប់ខេត្ត មួយនេះ៕