ក្រសួងអប់រំ៖ បេក្ខជនមួយចំនួនបញ្ហាសុខភាព អំឡុងពេលដំណើរសំណេរប្រឡងបាក់ឌុប ខណៈការប្រឡងក្នុងព្រឹកថ្ងៃទី១បានបញ្ចប់
ភ្នំពេញ៖ ក្រសួងអប់រំ យុវជន និងកីឡា បានបញ្ជាក់ថា នៅក្នុងដំណើការប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជា សម្រាប់ថ្ងៃទី១ ថ្ងៃទី២០ ខែសីហា ២០១៨នេះ មានបេក្ខជនប្រឡង នៅតាមមណ្ឌលមួយចំនួន មានបញ្ហាសុខភាព ក្នុងអំឡុងពេល នៃដំណើរការសំណេរប្រឡង។ ក្រសួងអប់រំ បានស្នើឲ្យបេក្ខជនទាំងអស់ ដែលមានសុខភាពមិនល្អ សូមធ្វើអារម្មណ៍ឲ្យស្រួល កុំភ័យ តែពីរថ្ងៃទេ ចប់ហើយ ប្អូនៗប្រឡងបាក់ឌុបឲ្យចប់។
ក្រសួងអប់រំ យុវជន និងកីឡា បញ្ជាក់ថា ភាគច្រើននៃសិស្ស ដែលមានបញ្ហាសុខភាព គឺមានអាការៈវិលមុខ ខ្យល់គរ ក្អួត ជាដើម ហើយក្នុងនោះ បេក្ខជនខ្លះ បានបន្តការប្រឡងឡើងវិញ បន្ទាប់ពីមានអាការៈធូរស្រាល ក្រោយទទួលបានជំនួយ សង្គ្រោះបឋម ពីក្រុមគ្រូពេទ្យប្រចាំការ នៅតាមមណ្ឌលនោះ។
បេក្ខនារី១រូប មណ្ឌលវិទ្យាល័យកោះកុង មានអាការៈក្អួត វិលមុខឥឡូវ ក្រុមគ្រូពេទ្យប្រចាំការកំពុងសង្គ្រោះបឋម។
ក្រសួង ក៏បានថ្លែងអំណរគុណ ដែលបានជួយរៀបចំថែរក្សា និងមើលការខុសត្រូវ នៅកន្លែងផ្ញើកង់ និងម៉ូតូ ជូនបេក្ខជនដោយឥតគិតថ្លៃ ក្នុងការប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជា សម័យប្រឡង ៖ ២០ សីហា ២០១៨ ។
ក្រសួងអប់រំ យុវជន និងកីឡា សូមថ្លែងអំណរគុណចំពោះសប្បុរសជន ដែលបានជួយផ្ដល់អាហារ ទឹក ព្រមទាំងជួយបញ្ចុះតម្លៃបន្ទប់ និងអាហារ ដល់បេក្ខជន ក្នុងឱកាសនៃការប្រឡងសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជា ។
សកម្មភាពនៃការរៀបចំវេចខ្ចប់សន្លឹកកិច្ចការនៅតាមមណ្ឌលប្រឡង បន្ទាប់ពីបានបញ្ចប់ដំណើរការសំណេរនាព្រឹកថ្ងៃទី១ នៃការប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជា សម័យប្រឡង៖ ២០ សីហា ២០១៨ ដោយគណៈមេប្រយោគទូទាំងប្រទេស គណៈកម្មការអប្បមាទ ប្រធាន អនុប្រធានមណ្ឌល រួមជាមួយនឹងមន្ត្រី អ្នកសង្កេតការណ៍ ពីអង្គភាពប្រឆាំងអំពើពុករលួយ និងសហភាពសហព័ន្ធយុវជនកម្ពុជា៕
