រៀបចំពិធីដាក់ឱ្យដំណើរការ នូវប្រព័ន្ធទិន្នន័យ ស្ដីពីសន្ធានកម្មខ្សែសង្វាក់ ផ្គត់ផ្គង់សំដៅផ្តល់ កិច្ចសម្រួលវិនិយោគ សម្រាប់អភិវឌ្ឍន៍ចីរភាព
ភ្នំពេញ៖ បើតាមសេចក្ដីប្រកាសព័ត៌មាន នៅរសៀលថ្ងៃពុធ ទី១២ ខែឧសភា ឆ្នាំ ២០២១ ក្រុមប្រឹក្សាអភិវឌ្ឍន៍កម្ពុជា សហការជាមួយវេទិកាសេដ្ឋកិច្ចពិភពលោក (World Economic Forum) បានរៀបចំពិធីដាក់ឱ្យដំណើរការនូវប្រព័ន្ធទិន្នន័យស្ដីពីសន្ធានកម្មខ្សែសង្វាក់ផ្គត់ផ្គង់សំដៅផ្តល់ កិច្ចសម្រួលវិនិយោគសម្រាប់អភិវឌ្ឍន៍ចីរភាព តាមប្រព័ន្ធវិដេអូ ក្រោមអធិបតីភាពដ៏ខ្ពង់ខ្ពស់ ឯកឧត្តម សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការក្រុមប្រឹក្សាអភិវឌ្ឍន៍កម្ពុជា និង លោកបណ្ឌិត ម៉ាធូ ស្តេហ្វិនសុន (Matthew Stephenson) នាយកតោលនយោបាយ និងសហគមន៍ នៃនាយកដ្ឋានវិនិ-យោត និងពាណិជ្ជកម្មអន្តរជាតិ នៃវេទិកាសេដ្ឋកិច្ចពិភពលោក ដោយមានការចូលរួម ពីតួអង្គពាក់ព័ន្ធ រួមមាន តំណាងពីក្រសួង – ស្ថាប័នរដ្ឋ និងផ្នែកឯកជន ព្រមទាំងដៃគូអភិវឌ្ឍន៍។
ឯកឧត្តម សុខ ចិន្តាសោភា បានសម្តែងនូវកិច្ចស្វាគមន៍យ៉ាងកក់ក្តៅ និងវាយតម្លៃខ្ពស់ចំពោះ ការចូលរួមរបស់តួអង្គពាក់ព័ន្ធក្នុងព្រឹត្តិការណ៍ដ៍មានសារៈសំខាន់នាពេលនេះ។ ឯកឧត្តមរដ្ឋមន្ត្រីប្រតិភូ បានថ្លែងអំណរគុណចំពោះវេទិកាសេដ្ឋកិច្ចពិភពលោក ជាពិសេស លោកបណ្ឌិត ម៉ាធូ ស្តេហ្វិនសុន ដែលបានសហការរៀបចំប្រព័ន្ធទិន្នន័យនេះ ដើម្បីផ្តល់នូវថ្នាលបច្ចេកវិទ្យាព័ត៌មានសម្រាប់សម្រួលដល់ ការធ្វើសន្ធានកម្ម ខ្សែច្រវាក់ផ្គត់ផ្គង់រវាងអ្នកផ្គត់ផ្គង់ក្នុងស្រុក និងអ្នកវិនិយោគ ដោយផ្តោតលើការផ្តល់ កិច្ចសម្រួលវិនិយោគសម្រាប់អភិវឌ្ឍន៍ចីរភាព។ ឯកឧត្តមរដ្ឋមន្ត្រីប្រតិភូ បានស្នើសុំឱ្យតួអង្គពាក់ព័ន្ធទាំង អស់ចូលរួមប្រើប្រាស់ប្រព័ន្ធទិន្នន័យនេះឱ្យបានទូលំទូលាយ ដោយសង្ឃឹមយ៉ាងមុតមាំថា អ្នកវិនិយោគ និងក្រុមហ៊ុនបរទេសនឹងមើលឃើញថា កម្ពុជាកំពុងបង្កើតនូវបរិស្ថានវិនិយោតដែលស្វាគមន៍វត្តមាន របស់ពួកគេ ខណៈខិតខំជំរុញការវិនិយោគដែលមានទង្វើរធុរកិច្ចប្រកបដោយការទទួលខុសត្រូវ និងមាន ចីរភាព។
លោកបណ្ឌិត ម៉ាធូ ស្តេហ្វិនសុន បានសម្តែងនូវសេចក្តីសោមនស្សដោយបានធ្វើការជាមួយ ក្រុមប្រឹក្សាអភិវឌ្ឍន៍កម្ពុជា និងតួអង្គពាក់ព័ន្ធនានា ដើម្បីរៀបចំប្រព័ន្ធទិន្នន័យដ៏មានសារៈសំខាន់នេះ។ លោកបណ្ឌិត បានបញ្ជាក់ថា ក្រុមហ៊ុនបរទេសដែលស្វែងរកការវិនិយោតអនុលោមតាមគោលការណ៍ , សង្គម បរិស្ថាន , និងអភិបាលកិច្ច (ESG) អាចដាក់ការវិនិយោតនៅកម្ពុជា ជាមួយក្រុមហ៊ុនក្នុងស្រុក ដែលកំពុងប្រតិបត្តិការប្រកបដោយចីរភាព ហើយក្រុមហ៊ុនកម្ពុជាដទៃទៀតអាចបង្វែរការតម្រង់ទិស ប្រតិបត្តិការធុរកិច្ចរបស់ខ្លួនទៅរកការអភិវឌ្ឍប្រកបដោយចីរភាពកាន់តែច្រើនថែមទៀត ដើម្បីទាក់ទាញការធ្វើធុរកិច្ចរួមគ្នាជាមួយនឹងក្រុមហ៊ុនបរទេស សំដៅលើកកម្ពស់ការធ្វើសន្ធានកម្មខ្សែច្រវាក់ផ្គត់ផ្គង់ តំបន់ និងសកលលោក។
សូមបញ្ជាក់ថា ការជ្រើសរើសកម្ពុជា ជាដៃគូពិភាក្សារបស់វេទិកាសេដ្ឋកិច្ចពិភពលោក លើការផ្តល់ កិច្ចសម្រួលវិនិយោគសម្រាប់ការអភិវឌ្ឍប្រកបដោយចីរភាព គឺឈរលើមូលដ្ឋានរឹងមាំរបស់កម្ពុជាដែល មានគោលនយោបាយបើកចំហរដ៏ប្រសើរចំពោះការវិនិយោគ។ បន្ថែមពីលើនេះ មានមូលហេតុសំខាន់ៗ ចំនួនបី ដែលវេទិកាសេដ្ឋកិច្ចពិភពលោកសម្រេចជ្រើសយកកម្ពុជា ជាដៃគូក្នុងដំណើរការនេះគឺ(១ ) កម្ពុជា សម្រេចបាននូវភាពជោគជ័យដ៍ធំធេងក្នុងការទាក់ទាញវិនិយោគផ្ទាល់ពីបរទេស ក្នុងកំណើនគួរឱ្យ មោទនៈជាមធ្យមប្រមាណជាង ៥០% ចាប់ពីឆ្នាំ២០០៥ មកដល់បច្ចុប្បន្ន ហើយវិធានការផ្តល់កិច្ច សម្រួលវិនិយោគបានដើរតួនាទីយ៉ាងសំខាន់ក្នុងការសម្រេចបាននូវជោគជ័យនេះ។ (២) ខណៈពេល ដែលកម្ពុជាត្រូវការការអភិវឌ្ឍស្របពេលដែលកំណើនសេដ្ឋកិច្ចជាមធ្យមប្រមាណ ៧% តាំងពីឆ្នាំ ២០១១មក បទពិសោធន៍របស់កម្ពុជា ក្នុងការធ្វើអានុភាវូបនីយកម្មការវិនិយោគសម្រាប់ការអភិវឌ្ឍអាច ជួយប្រទេសផ្សេងទៀតក្នុងការរៀនសូត្រពីជ្រុងសំខាន់ៗនៃការអភិវឌ្ឍពាក់ព័ន្ធនឹងកិច្ចសម្រួលវិនិយោគ នៅកម្ពុជា។ (៣) កម្ពុជា បានក្រសោបយកនូវកិច្ចសហការធ្វើការរួមគ្នារវាងរាជរដ្ឋាភិបាលនិងផ្នែកឯកជន តាមរយៈវេទិការាជរដ្ឋាភិបាល-ផ្នែកឯកជន។ វេទិការាជរដ្ឋាភិបាល-ផ្នែកឯកជន លើកទី១៨ កាលពី ខែមីនា ឆ្នាំ២០១៩ កន្លងទៅនេះ បានបង្ហាញនូវការគាំទ្រយ៉ាងសកម្មពីរាជរដ្ឋាភិបាលសម្រាប់កិច្ចសហការ គ្នារវាងរដ្ឋនិងឯកជន ក្នុងការផ្តល់កិច្ចសម្រួលវិនិយោគបន្ថែមទៀតដែលប្រការនេះគឺស្របគ្នានឹង បេសកកម្មរបស់វេទិកាសេដ្ឋកិច្ចពិភពលោក។ ឈរលើមូលដ្ឋានខាងលើនេះ វេទិកាសេដ្ឋកិច្ចពិភពលោក និងកម្ពុជា បានធ្វើការរួមគ្នាដើម្បីចែករំលែកនូវរបកគំហើញនិងឧត្តមានុវត្តស្តីពីការផ្តល់កិច្ចសម្រួល វិនិយោគ ជាពិសេស ដំណើរការនៃការរៀបចំប្រព័ន្ធទិន្នន័យស្តីពីសន្ធានកម្មខ្សែច្រវាក់ផ្គត់ផ្គង់សំដៅផ្តល់ កិច្ចសម្រួលវិនិយោគសម្រាប់អភិវឌ្ឍន៍ចីរភាពជាមួយប្រទេសដទៃទៀតក្នុងក្របខណ្ឌអង្គការពាណិជ្ជកម្ម ពិភពលោក និងក្របខណ្ឌតំបន់ដទៃទៀត៕