ត្រួតពិនិត្យទៅលើ អ្នកបើកបររថយន្តដឹកខ្សាច់ ថ្មបានចំនួន ៣៥គ្រឿង និងបានធ្វើការអប់រំ ណែនាំ ដែលឡានដឹកដីបើកយ៉ាងអាណាធិបតេយ្យ វ៉ា ជែងគ្មានគិតពីសុវត្ថិភាពប្រជាពលរដ្ឋ

កណ្ដាល ៖ ដោយមានការបញ្ជាដឹកនាំផ្ទាល់ពីលោកឧត្ដមសេនីយ៍ទោឈឿនសុចិត្តស្នងការនគរបាលខេត្តកណ្ដាល ក្រុមការងារ និងប្រតិកម្មហ័ស ធ្វើការស៊ើបបញ្ជក់ព៌ត័មាន។

យោងតាមរបាយការណ៍របស់អធិការដ្ឋាននគរបាលស្រុកកណ្ដាលស្ទឹង សូមឆ្លើយតបគណនីហ្វេសបុក(facebook) សុំមិនបញ្ចេញឈ្មោះ ដែលបានរាយការណ៍ក្នុងប្រអប់សារផេក(page)ស្នងការដ្ឋាននគរបាលខេត្តកណ្តាល ដែលមានខ្លឹមសារថា ៖ ខ្ញុំបាទសូមគោរពដល់ឯកឧត្តមឧត្តមសេនីយ៍ទោឈឿន សុចិត្តស្នងការនគរបាលខេត្តកណ្ដាលនិងមន្ត្រីក្រោមឱវាទ សូមមេត្តាជួយពិនិត្យនៅឃុំ ដើមឫសស្រុកកណ្ដាលស្ទឹងខេត្តកណ្ដាល ផងចុះព្រោះឡានដឹកដីបើកយ៉ាងអាណាធិបតេយ្យ វ៉ា ជែងគ្មានគិតពីសុវត្ថិភាពប្រជាពលរដ្ឋដែលធ្វើដំណើរលើដងផ្លូវ ម្យ៉ាងវិញទៀត ដឹកដីជ្រុះពេញផ្លូវថ្នល់បណ្ដាលឱ្យហុយ ប៉ះពាល់ដល់សុខភាព និង អ្នកជិះម៉ូតូតាមដងផ្លូវ ហើយពេលខ្លះស៊ីផ្លេដេញគ្នាដូចប្រណាំងឡានស្ទើរតែគាំងបេះដូង។ ចាប់តំាងពីផ្សារដើមត្រាំងរហូតដល់ខាងលិចភូមិព្រៃប្រសាទ ឡានដីបើកលឿនៗខ្លាំងណាស់។ សូមឯកឧត្តមជួយមានវិធានការផង ផ្លូវខូចអស់ហើយ។

ក្រោយពីទទួលបានព័ត៌មាននេះភ្លាម ក្រុមការងារប្រតិកម្មរហ័សនៃស្នងការដ្ឋាននគរបាលខេត្តកណ្តាល ចាត់អោយលោកអធិការស្រុកកណ្តាលស្ទឹង វរសេនីយ៍ទោ ឡេង សុខរុន ធ្វើការស្រាវជ្រាវករណីខាងលើ។

ជាលទ្ធផល នៅថ្ងៃទី២៣ ខែមិថុនា ឆ្នាំ២០២១ វេលាម៉ោង ៨និង៣០នាទី កម្លាំងផ្នែកជំនាញ សណ្ដាប់ធ្នាប់ចរាចរណ៍ផ្លូវគោក សហការជាមួយកម្លាំងសាធារណៈការស្រុក លោកមេឃុំ កម្លាំងប៉ុស្តិ៍នគរបាលរដ្ឋបាលដើមឫស បានចុះដល់ទីតាំងខាងលើផ្លូវលេខ៣៤ ស្ថិតក្នុងភូមិសាស្រ្តឃុំដើមឫស ស្រុកកណ្ដាលស្ទឹងខេត្តកណ្ដាល បានធ្វើការត្រួតពិនិត្យទៅលើ អ្នកបើកបររថយន្តដឹកខ្សាច់ ថ្មបានចំនួន ៣៥គ្រឿង និងបានធ្វើការអប់រំ ណែនាំ និង ធ្វើកិច្ចសន្យាដល់អ្នកបើកបររថយន្តទាំងអស់គឺមិនត្រូវដឹកខ្សាច់ ដឹកថ្មដែលហូរទឹក ត្រូវគ្របអោយបានត្រឹមត្រូវទៅតាមច្បាប់ដែលបានកំណត់ ការបើកបរលឿន វ៉ា ជែងកម្លាំងបានធ្វើការដកហូតស៊ីផ្លេខ្យល់ ដែលមិនត្រឹមត្រូវតាមលក្ខណៈបច្ចេកទេស ជាហេតុបង្ករអោយលឺសំឡេងខ្លាំង និងរំខានដល់ប្រជាពលរដ្ឋ ដែលធ្វើដំណើរតាមដងផ្លូវក៏ដូចជាប្រជាពលរដ្ឋ ដែលមានទីលំនៅតាមដងផ្លូវ កន្លែងជាទីប្រជុំជន និងតម្រូវឲ្យអ្នកបើកបររថយន្ត ទាំងអស់បង្កើនការប្រុងប្រយ័ត្នឲ្យបានខ្ពស់ ត្រូវគោរពជាដាច់ខាត ទៅតាមគោលការណ៍នៃច្បាប់ចរាចរណ៍ផ្លូវគោក ត្រូវបើកបររក្សាល្បឿនឲ្យបានត្រឹមត្រូវទៅតាមច្បាប់ដែលបានកំណត់។
អាស្រ័យហេតុនេះសូមសាធារណជន ដែលប្រើប្រាស់បណ្តាញសង្គមមេត្តាជ្រាប៕