កម្លាំងនគរបាល ឃាត់ខ្លួនជនសង្ស័យម្នាក់លួចកាច់ ក ម៉ូតូ
ភ្នំពេញ÷ជនសង្ស័យម្នាក់ត្រូវបាន កម្លាំងនគរបាលប៉ុស្តិចោមចៅទី៣ ឃាត់ខ្លួនបាននៅយប់ថ្ងៃទី ២៧ ឈានចូលថ្ងៃទី២៨ ខែ មិថុនា ឆ្នាំ២០២១ ស្ថិតនៅតាមបណ្ដោយផ្លូវបេតុង ក្នុងភូមិត្រពាំងពោធិ៍សង្កាត់ចោមចៅទី៣ខណ្ឌពោធិ៍សែនជ័យរាជធានីភ្នំពេញ។
លោកវរសេនីយ៍ត្រី ថេង កុសល នាយប៉ុស្តិ៍រដ្ឋបាលសង្កាត់ចោមចៅទី៣ បានដឹកនាំមន្ត្រីនៅក្រោមឱវាទ ក្រោមការបញ្ជាផ្ទាល់ពីលោកវរសេនីយ៍ឯក ម៉ន វុធី អធិការនៃអធិការដ្ឋាននគរបាលខណ្ឌពោធិ៍សែនជ័យ ចុះល្បាតពួនស្ទះក្នុងមូលដ្ឋាន ដេីម្បីការពារសន្តិសុខ សុវត្ថិភាព ជូនប្រជាពលរដ្ឋ ស្រាប់តែប្រទះឃើញជនសង្ស័យធ្វើសកម្មភាពលួច កាច់កម៉ូតូចំនួន១នាក់។
ខណៈនោះកម្លាំងនគរបាលក៏ឃាត់ខ្លួនជនសង្ស័យ រួមនឹងវត្ថុតាង ម៉ូតូមួយគ្រឿងម៉ាក ស៊ុយសុគីនិច សេរី២០២០ ពណ៌ទឹកក្រូចលាយសពាក់ស្លាកលេខភ្នំពេញ 1 IA 0375 យកមកសួរនាំនៅប៉ុស្តិ៍នគរបាលចោមចៅទី៣។
តាមចំលើយសារភាពរបស់ជនសង្ស័យឈ្មោះ ឈិន ដារិទ្ធ ភេទប្រុស អាយុ២៥ឆ្នំា មុខរបរ មិនពិតប្រាកដ ស្នាក់នៅភូមិព្រៃទា សង្កាត់ចោមចៅទី៣ខណ្ឌពោធិ៍សែនជ័យ រាជធានីភ្នំពេញ បានប្រាប់ថា រូបគេធ្លាប់ធ្វើសកម្មភាពលួចកាច់កម៉ូតូចំនួន៥ដង បានសម្រេចចំនួន៣ដង រហូតមកដល់យប់ថ្ងៃកេីតហេតុខាងលើ ទេីបកម្លាំងនគរបាលប៉ុស្តិ៍ឃាត់ខ្លួនបានតែម្ដង។ បច្ចុប្បន្នជនសង្ស័យត្រូវបានបញ្ជូនទៅឃុំខ្លួនបណ្តោះអាសន្ននៅ អធិការដ្ឋាននគរបាលខណ្ឌពោធិសែនជ័យ និងកសាងសុំនុំរឿងបញ្ជូនទៅកាន់ តុលាការចាត់ការតាមនីតិវិធី៕
