ឃាត់ខ្លួនតាចាស់វ័យ៦៩ឆ្នាំម្នាក់ ក្រោយកាប់ស្ត្រីម្នាក់៤ពូថៅស្លាប់នៅស្រុកព្រះនេត្រព្រះ ព្រោះទំនាស់ព្រំដីស្រែ

បន្ទាយមានជ័យ ៖ ករណីទំនាស់ព្រំដីស្រែ បុរសវ័យ៦៩ឆ្នាំ កាប់ទៅលើស្ត្រីគូរទំនាស់៤ពូថៅ បណ្តាលឲ្យស្លាប់, ក្រោយពីធ្វើសកម្មភាពជនសង្ស័យរត់គេចខ្លួន តែត្រូវសមត្ថកិច្ចបាន ស្រាវជ្រាវចាប់ខ្លួន និងបញ្ជូនទៅតុលាការ ចាត់ការតាមច្បាប់ ។

ករណីនេះបានកើតឡើងនៅក្នុងភូមិឃូស្វាយ ឃុំបុស្បូវ ស្រុកព្រះនេត្រព្រះ ខេត្តបន្ទាយមានជ័យ កាលពីថ្ងៃទី២៨ ខែមិថុនា ឆ្នាំ២០២១ ។

តាចាស់វ័យ៦៩ឆ្នាំម្នាក់ ត្រូវបានកម្លាំងនគរបាលខេត្តបន្ទាយមានជ័យ ចាប់ខ្លួនបន្ទាប់ពីបានធ្វើសកម្មភាពយកពូថៅដៃ កាប់សម្លាប់ស្រី្តម្នាក់វ័យ៧៤ឆ្នាំ នៅភូមិឃូស្វាយ ឃុំបុស្បូវ ស្រុកព្រះនេត្រព្រះ ខេត្តបន្ទាយមានជ័យ ព្រោះទំនាស់រឿងព្រំដី ហើយបានរត់គេចខ្លួន ក្រោយមកសមត្ថកិច្ចបាន ស្រាវជ្រាវចាប់ខ្លួន និងបញ្ជូនទៅតុលាការ ចាត់ការតាមច្បាប់ កាលពីថ្ងៃទី២៨ ខែមិថុនា ឆ្នាំ២០២១។

លោកឧត្តមសេនីយ៍ត្រី នូ ជីវ័ន្ត ស្នងការរងទទួលផែនការងារនគរបាលព្រហ្មទ័ណ្ឌ បានឲ្យដឹងថា ជនសង្ស័យត្រូវបានឃាត់ខ្លួន ដោយកម្លាំងការិល័យកម្រិតធ្ងន់/ស្រាល សហការជាមួយកម្លាំងអធិការដ្ឋាននគរបាលស្រុកព្រះនេត្រព្រះ ក្រោមការដឹកនាំបញ្ជាផ្ទាល់ដោយលោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ ។ ជនសង្ស័យមានឈ្មោះ ចយ សឺន ភេទប្រុស អាយុ៦៩ឆ្នាំ រស់នៅភូមិឃូស្វាយ ឃុំបុស្បូវ ស្រុកព្រះនេត្រព្រះ ខេត្តបន្ទាយមានជ័យ រីឯជនរងគ្រោះមានឈ្មោះ ស៊ូ សូង ភេទស្រី អាយុ៧៤ឆ្នាំ រស់នៅភូមិជាមួយគ្នា។

លោកឧត្តមសេនីយ៍ទោ សិទ្ធិ ឡោះ បានមានប្រសាសន៍ថា មុនចាប់ខ្លួនកាលពីវេលាម៉ោង១២និង០៥នាទី ថ្ងៃទី២៦ ខែមិថុនា ឆ្នាំ២០២១កន្លងទៅ ជនសង្ស័យបាន យកពូថៅដៃកាប់ទៅលើក្បាល ស្រ្តីជនរងគ្រោះ ចំនួន០៤ពូថៅ បណ្តាលឲ្យស្លាប់បាត់បង់ជីវិតភ្លាមៗ រួចជនសង្ស័យបានរត់គេចខ្លួន លុះថ្ងៃទី២៧ ខែមិថុនា ឆ្នាំ២០២១ ក្រោយស្រាវជ្រាវជនសង្ស័យត្រូវ បានចាប់ខ្លួនយកមកសួរនាំ និងចាត់ការតាមនិតី។ យោងចម្លើយសារភាព ជនសង្ស័យបានឲ្យដឹងថា កន្លងមករវាងខ្លួន និងជនរងគ្រោះធ្លាប់មានទំនាស់រឿងព្រំដីស្រែ៕