ចាប់បុរសម្នាក់ដែលដុតផ្ទះប្រជាពលរដ្ឋ ឆេះអស់៦ខ្នង នៅខណ្ឌចំការមន

ភ្នំពេញ ៖ លោកវរសេនីយ៏ឯក យិន សានអធិការខណ្ឌចំការមនបានឲ្យដឹងថា បុរសម្នាក់ឈ្មោះ ម៉ៅដូង ហៅអាខ្មៅ ត្រូវបានសមត្ថកិច្ចចាប់ឃាត់ខ្លួនបានហើយ បន្ទាប់ផ្ទះបងប្អូនប្រជាពលរដ្ឋឆេះអស់៦បន្ទប់ផ្អើល រួចក៏រត់ចូលព្រៃ  កាលពីវេលាម៉ោង ៥ និង១០នាទី ល្ងាច ថ្ងៃទី៣០ ខែមិថុនា ឆ្នាំ២០២១ នៅចំណុចផ្លូវលេខ៥០៨ ក្រុម២៥ ភូមិ៤ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ។

សមត្ថកិច្ចបានបញ្ជាក់ថា អគ្គិភ័យនេះបានឆាបឆេះផ្ទះដែលមានម្ចាស់ឈ្មោះ ញ៉ែម ផន អាយុ៦៩ឆ្នាំ ជាប្រភេទសំណង់ផ្ទាល់ដី ជញ្ជាំងឈើ ប្រក់សង្ក័សី មួយខ្នង បណ្តាលឲ្យខូចខាត ៦បន្ទប់ ដែលមានទំហំ ៤គុណ ៦ម៉ែត្រ ខូចខាតកង្ហារ២គ្រឿង សម្ភារ:មួយចំនួន និងខ្សែកផ្លាទីន ១ខ្សែ តែគ្មានអ្នករងរបួសនោះទេ។
ក្នុងនោះសមត្ថកិច្ចប្រើប្រាស់រថយន្ដការិយាល័យបង្ការ និងពន្លត់អគ្គិភ័យ ចំនួន ៥គ្រឿង ប្រើប្រាស់ទឹកអស់ ៣ឡាន និងរថយន្តក្រសួងមហាផ្ទៃ ចំនួន មួយគ្រឿង ពុំបានប្រើប្រាស់ទឹក ទើបរលត់ទាំងស្រុង នៅវេលាម៉ោង ៥និង៣០នាទីល្ងាច ថ្ងៃដដែល។

ចំណែកមូលហេតុ សមត្ថកិច្ចបញ្ជាក់ថា បណ្តាលមកពីឈ្មោះ ម៉ៅដូង ហៅអាខ្មៅ ដែលមានសតិមិនគ្រប់ជាអ្នកដុត ហើយក៏រត់ចូលព្រៃក្នុងបឹង តែក៏ត្រូវសមត្ថកិច្ចឃាត់ខ្លួនបានវិញ កាលពីព្រឹកថ្ងៃទី១ខែកក្កដា ឆ្នាំ២០២១
បច្ចុប្បន្នជនសង្ស័យខាងលើ ត្រូវបានបញ្ជូនទៅសាកសួនិងឃុំខ្លួនបណ្តោះអាសន្ន នៅអធិការដ្ឋាននគរបាលខណ្ឌចំការមននិងកសាងសំណុំរឿង បញ្ជូនទៅតុលាការចាត់ការតាមផ្លូវច្បាប់៕