កីឡាជឺជិតស៊ូ កូនកាត់ខ្មែរ-អាមេរិក ខាន់ ចេសា រកបានមេដាយមាស ដោយប្រកួត៥លើក បំបាក់គូរប្រកួត ក្នុងលទ្ធផល ១០០-០
ហ្សាការតា៖គណៈកម្មាធិការជាតិអូឡាំពិកកម្ពុជា នៅថ្ងៃទី២៤សីហានេះ បានប្រកាសថា កីឡាការិនី ខាន់ ចេសា ឈ្នះមេដាយមាសហើយ ក្រោយផ្ដួលកីឡាការនី អារ៉ាប់រួម Mahra ក្នុងលទ្ធផលពិន្ទុខ្ពស់បំផុត ឬ ឈ្នះដាច់ ១០០-០ លើវិញ្ញសាចំបាប់ជីជិតស៊ូ។ ក្នុងការប្រកួតចំនួន៥លើក ខាន់ ចេសា បានផ្តួលគូរប្រកួត ក្នុងលទ្ធផល ឈ្នះដាច់ ១០០-០ ។
ទីបំផុត ! កីឡាការិនី ខាន់ ចេសា ឈ្នះមេដាយមាសហើយ ក្រោយផ្ដួលកីឡាការនី អារ៉ាប់រួម Alhinaai Mahra ក្នុងលទ្ធផលពិន្ទុឈ្នះដាច់ ១០០-០ លើវិញ្ញសាចំបាប់ជីជិតស៊ូ នាព្រឹត្តិការណ៍កីឡាទ្វីបអាស៊ីលើកទី ១៨ នៅប្រទេសឥណ្ឌូណេស៊ី។
ក្រោយទទួលបានជ័យជម្នះនេះ ខាន់ ចេសា ដែលមានវ័យ ទើប ១៩ ឆ្នាំ នឹងទទួលបានប្រាក់រង្វាន់ ៨០ លានរៀលពីរាជរដ្ឋាភិបាល ចេញដោយអនុក្រឹត្រ ហើយក្នុងនោះ សម្ដេចតេជោ ហ៊ុន សែន ក៏សន្យាឧបត្ថម្ភដែរបើសិនឈ្នះមេដាយកម្រិតទ្វីបនេះ។ កន្លងមកសម្ដេច នាយករដ្ឋមន្ត្រី ក៏បានឧបត្ថម្ភលុយផ្ទាល់ខ្លួន ១ ម៉ឺនដុល្លារ ដល់ ស៊ន សៀវ ម៉ី ក្រោយឈ្នះមេដាយមាសកីឡាតេក្វាន់ដូកាលឆ្នាំ ២០១៤ ហើយនៅមានឧបត្ថម្ភការរៀនសូត្ររបស់ សៀវម៉ី ទៀតផង។
នេះជាមេដាយមាសទី២ ក្នុងរយៈពេល ៤ ឆ្នាំ ក្រោយ សៀវម៉ី ឈ្នះមេដាយមាសកាលឆ្នាំ ២០១៤ នៅកូរ៉េខាងត្បូង ហើយ មេដាយនេះត្រូវចារក្នុងប្រវត្តិសាស្ត្រថ្មីសម្រាប់កម្ពុជា ក្នុងការប្រកួតកីឡាកម្រិតទ្វីបដែលមាន ៤៥ ប្រទេសចូលរួម។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងជានាយបេសកកម្ម បានឲ្យដឹងពីប្រទេសឥណ្ឌូណេស៊ីថា នេះគឺជាមោទនភាពថ្មីមួយទៀត សម្រាប់គ្រួសារកីឡាជាតិកម្ពុជា ដែលដណ្ដើមបានមេដាយមាស នៅក្នុងព្រឹត្តិការណ៍កីឡាប្រចាំទ្វីបអាស៊ី ៤ឆ្នាំម្ដងនេះ។ នេះជាមេដាយមាសទី២ ក្នុងប្រវត្តិសាស្ដ្រ បន្ទាប់ពីវីរកីឡាការិនី ស៊ន សៀវម៉ី ដែលដណ្ដើមបានមេដាយមាសលើកដំបូង ក្នុងការប្រកួតកីឡា Asian Games លើកទី១៧ នៅសាធារណរដ្ឋកូរ៉េខាងត្បូង កាលពីឆ្នាំ២០១៤។ ប៉ុន្តែលើកនេះ សៀវម៉ី បានធ្លាក់ហើយ។
កីឡាការិនី ខាន់ ចេសា បានឆ្លងកាត់ការប្រកួត ៦លើក ក្នុងនោះប្រកួតទី១ ឈ្នះកីឡាការិនីថៃ ១០០-០ពិន្ទុ។ ប្រកួតទី២ ឈ្នះកីឡាការិនីចិន ដោយស្វ័យប្រវត្តិ បន្ទាប់ពីកីឡាការិនីចិន បោះបង់ការប្រកួត។ ប្រកួតទី៣ ឈ្នះពិន្ទុដាច់លើកីឡាការិនីអីរ៉ង់។ ប្រកួតទី៤ ឈ្នះកីឡាការិនីហ្វីលីពីន ក្នុងវគ្គពាក់កណ្ដាលផ្ដាច់ព្រ័ត្រក្នុងពិន្ទុ ១០០-០ និងចុងក្រោយផ្ដួលកីឡាការិនី អារ៉ាប់រួម ក្នុងពិន្ទុ ១០០-០ ដោយដណ្ដើមបានមេដាយមាស៕
