ឆេះទូកកណ្តាលសមុទ្រ នៅក្រុងកោះរ៉ុង បណ្តាលឲ្យមនុស្សម្នាក់ស្លាប់ ចំណែក១០នាក់ផ្សេងទៀត ត្រូវបានជួយសង្រ្គោះ

ខេត្តព្រះសីហនុ ÷ សមត្ថកិច្ច បានឲ្យដឹងថា ទូកមួយគ្រឿង បានឆាបឆេះពេលកំពុងបើកបរក្នុងសមុទ្រកោះរ៉ុង វេលាចម៉ោង១០និង៣០នាទីព្រឹក ថ្ងៃទី២១ ខែកក្តដាឆ្នាំ២០២១ ស្ថិតនៅចំណុចចន្លោះផែសហគមន៍ភូមិដេីមថ្កូវ សង្កាត់កោះរ៉ុង ក្រុងកោះរ៉ុង ខេត្តព្រះសីហនុ ។

ទូកដែលឆេះនេះជាទូកដឹកបន្លែ ទំហំទទឹង៣,៤ម៉ែត្រ បណ្តោយ១៣ម៉ែត្រ ម៉ាស៊ីន១៣០សេស ម្ចាស់ទូកឈ្មោះ រ័ត្ន ឧត្តម ភេទប្រុស អាយុ២៦ ឆ្នាំ ទីលំនៅបច្ចុប្ប ន្នភូមិកោះរ៉ុងសន្លឹម សង្កាត់កោះរ៉ុងសន្លឹម ក្រុងកោះរ៉ុង ខេត្តព្រះសីហនុ ។

អ្នកបើកទូក បានឲ្យដឹងថា នៅលេីទូកមានមនុស្សចំនួន១១នាក់ ស្រី៥នាក់ មានទាំងមនុស្សចាស់និងក្មេងតូចផង បានចេញដំណេីពីផែសហគមន៍ភូមិដេីមថ្កូវ សង្កាត់កោះរ៉ុង ក្រុងកោះរ៉ុង ឆ្ពោះទៅផែ៥២ ក្នុងសង្កាត់១ ក្រុងព្រះសីហនុ លុះដល់កន្លែងកេីតហេតុ ម៉ាស៊ីនបានធ្លាយទុយោេប្រង ប៉ះនឹងបំពង់ស៊ីម៊ាំងម៉ាស៊ីនទូក បណ្តាលឲ្យមានភ្លេីងឆាបឆេះ ជាអគ្គិភ័យ ក្រោយមកទូកក៏បានចូលក្នុងសមុទ្រ។

ហេតុការណ៍នេះ បានបណ្តាលឲ្យមនុស្សម្នាក់ស្លាប់ ឈ្មោះហ៊ីង ស្រស់ ភេទស្រី អាយុ៥០ឆ្នាំ រស់នៅភូមិដេីមថ្កូវ សង្កាត់កោះរ៉ុង ក្រុងកោះរ៉ុង និងរងបួសចំនួន៦នាក់ ក្នុងនោះរបួសធ្ងន់ម្នាក់ជាអ្នកបើកបរទូក ។

ពេលកើតហេតុភ្លាមៗ ក៏មានការជួយសង្គ្រោះពីអូបរ័ល្បឿនលឿន ដែលនៅជិតដឹកជញ្ជូនជនរងគ្រោះ មកកាន់ដីគោក និងការជួយសង្គ្រោះពីសមត្ថកិច្ច និងប្រជាពលរដ្ឋបន្ថែមទៀត នាំយកអ្នករងបួសមកមន្ទីរពេទ្យ៕