ឆក់ខ្សែក ដាច់ជាច្រើនកំណាត់មិនបានសម្រេច មិនខ្ចីប្តឹងប៉ូលីស ព្រោះមិនឃើញមុខប៉ូលីសមកជួយអន្តរាគមន៍

ភ្នំពេញ៖ ជនសង្ស័យ២នាក់បានធ្វើសកម្មភាពឆក់ខ្សែ.កស្ដ្រីម្នាក់ ដែលកំពុងដើរមកពីផ្សារទិញម្ហូប ប៉ុន្ដែឆក់មិនបានសម្រេចនោះទេ ដោយបានដាច់ខ្សែកជាច្រើនកំណាត់ ហើយជនរងគ្រោះក៏មិនខ្ចីប្តឹងប៉ូលីសដែរ ព្រោះមិនឃើញមុខប៉ូលីសមកជួយអន្តរាគមន៍។

  ហេតុការណ៍នេះបានកើតឡើងកាលពីវេលាម៉ោង១០និង៣០នាទីព្រឹកថ្ងៃទី២៥ ខែសីហា ឆ្នាំ២០១៨ នៅចំណុចផ្លូវ២៧១ ក្បែរប៉ុស្ដិ៍នគរបាលផ្សារដើមថ្កូវ ក្នុងសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។ 

   ស្ដ្រីរងគ្រោះមិនបានស្គាល់អត្ដសញ្ញាណនោះទេ គាត់ក៏មិនបានទៅប្ដឹងប៉ូលីសដែរ។

   យោងតាមសម្ដីរបស់ស្ដ្រីរងគ្រោះបានប្រាប់ឱ្យដឹងថា មុនពេលកើតហេតុគាត់បានដើរចេញពីផ្ទះទៅផ្សារបឹងទំពន់ដើម្បីទិញម្ហូប ពេលត្រលប់មកវិញគាត់បានដើរឆ្លងផ្លូវ២៧១ ក្នុងគោលបំណងត្រលប់ទៅផ្ទះវិញ ក៏ត្រូវជនសង្ស័យ២នាក់ ជិះម៉ូតូមួយគ្រឿងម៉ាក់ Nex មិនចាំស្លាកលេខ ដោយបានជិះមកអែបក្បែរ ហើយធ្វើសកម្មភាពឆក់ខ្សែ.ករបស់គាត់តែមិនបានសម្រេចទេ បណ្ដាលឱ្យខ្សែ.កគាត់ដាច់ធ្លាក់លើផ្លូវ។ ស្ដ្រីរងគ្រោះបានបញ្ជាក់ថា ខ្សែករបស់គាត់ទិញក្នុងតម្លៃ ៦០០ដុល្លារ។

ក្រោយពេលកើតហេតុគ្មានឃើញកម្លាំងសមត្ថកិច្ចចុះមកជួយអន្ដរាគមន៍នៅកន្លែងកើតុហេតុ និងនាំស្ដ្រីរងគ្រោះទៅដាក់ពាក់បណ្ដឹងនោះទេ ដោយស្ដ្រីរងគ្រោះបានដើរបន្ដទៅផ្ទះទាំងទឹកមុខអស់សង្ឃឹមបំផុត ពេលដែលគាត់ត្រូវចោរឆក់ហើយគ្មានឃើញសមត្ថកិច្ចសូម្បីតែម្នាក់ មកសួរនាំដល់រូបគាត់ ទើបគាត់សម្រេចចិត្ដដើរទៅផ្ទះតែម្ដង៕