នគរបាលខេត្តកំពង់ស្ពឺ ជួបការលំបាក ក្នុងការចូលទៅបង្រ្កាបសង្វៀនបញ្ជល់មាន់ ដែលស្ថិតក្នុងបន្ទាយយោធា
ខេត្តកំពង់ស្ពឺ ៖ ក្រុមកាងារប្រតិកម្មរហ័ស ស្នងការដ្ឋាននគរបាលខេត្តកំពង់ស្ពឺ បានឲ្យដឹងថា ការចូលទៅបង្រ្កាបសង្វៀនបញ្ជល់មាន់ គឺជួបការលំបាកដោយថាទីតាំងនោះ ស្ថិតក្នុងបន្ទាយយោធា មានបារ៉ាស់យាមកាមរឹងមាំ មុនចូលទៅត្រូវឆ្លងកាត់ការត្រួតពិនិត្យសាកសួរ និងការអនុញ្ញាត ពីប្រធានកងការពារជាមុន ជាក់ស្ដែងនគរបាលចូលទៅ គឺយឺតយូរធ្វេីឱ្យក្រុមអ្នកលេងល្បែងគេចខ្លួនអស់បន្សល់តែសម្ភារៈមួយចំនួននៅទីតាំងនោះ។
ក្រុមកាងារប្រតិកម្មរហ័ស ស្នងការដ្ឋាននគរបាលខេត្តកំពង់ស្ពឺ បានលើកឡើងថាមាន អ្នកសារព័ត៌មាន ពាក់ព័ន្ធទីតាំងលេងល្បែងមួយកន្លែង ចុះផ្សាយកាលពីថ្ងៃទី១៦ ខែសីហា ឆ្នាំ២០២១ មានចំណងជើង “ ពិតជាគឃ្លេីនមែន! ក្រោយពីរការបង្រ្កាបបានប៉ុន្មានថៃ្ងម្ចាស់សង្វៀនបញ្ជល់មាន់ ស្ថិតនៅចំណុចតំបន់អភិវឌ្ឍន៍យោធភូមិភាគទី៣ ក្នុងឃុំតាសាល ស្រុកឱរ៉ាល់ ខេត្តកំពង់ស្ពឺ បេីកលេងល្បែងក្នុងបន្ទាយយ៉ាងសប្បាយដដែល ដោយមិនខ្វល់នឹងអនុសាសន៍ របស់សម្ដេចតេជោហ៊ុន សែន ជាពិសេសបម្រាមរបស់រដ្ឋបាលខេត្ដកំពង់ស្ពឺផងដែរ”។
ក្រុមកាងារប្រតិកម្មរហ័ស ក្រោយទទួលបានព័ត៌មាន បានគោរពរាយការណ៍ជូនថ្នាក់ដឹកនាំស្នងការ ដេីម្បីសុំគោលការណ៍ដឹកនាំកិច្ចការស្រាវជ្រាវបន្ទាន់ពាក់ព័ន្ធករណីខាងលេី និងបានសហការជាមួយអធិការដ្ឋាននគរបាលស្រុកឱរ៉ាល់ សាមុីមូលដ្ឋាន ដេីម្បីបញ្ជាក់មូលហេតុរកព័ត៌មានពិតឈានទៅបង្រ្កាបចាត់ការតាមនីតិវិធី។
ពាក់ព័ន្ធទីតាំងបញ្ជល់មាន់ខាងលេី គឺស្ថិតក្នុងបន្ទាយយោធា ដែលមានឈ្មោះថា តំបន់អភិវឌ្ឍន៍យោធភូមិភាគទី៣ គ្រប់គ្រងដោយឧត្ដមសេនីយ៍ត្រី ឈុន នាង កន្លងមកទីតាំងខាងលេីពិតជាធ្លាប់បេីកលួចលាក់លេងល្បែងបញ្ជល់មាន់និងត្រូវបានសមត្ថកិច្ចនគរបាលអធិការដ្ឋាននគរបាលស្រុកឱរ៉ាល់ សហការដឹកនាំពីគណៈបញ្ជាការឯកភាពស្រុក បានចុះបង្រ្កាបកាលពីថ្ងៃទី២៤ ខែកក្តដា ឆ្នាំ២០២១ ដកហូតវត្ថុតាងសម្ភារៈមួយចំនួន យកមករក្សាទុកបណ្ដោះអាសន្ន នៅអធិការដ្ឋាននគរបាលស្រុក ដេីម្បីចំណាត់ការនីតិវិធីបន្ដ ។ លទ្ធផលចូលទៅបង្រ្កាបគឺជួបការលំបាកដោយថាទីតាំងនោះស្ថិតក្នុងបន្ទាយយោធា មានបារ៉ាស់យាមកាមរឹងមាំ មុនចូលទៅត្រូវឆ្លងកាត់ ការត្រួតពិនិត្យសាកសួរនិងការអនុញ្ញាតពីប្រធានកងការពារជាមុន ជាក់ស្ដែងនគរបាលចូលទៅ គឺយឺតយូរធ្វេីឱ្យក្រុមអ្នកលេងល្បែងគេចខ្លួនអស់ បន្សល់តែសម្ភារៈមួយចំនួននៅទីតាំងនោះ។
ចំពោះហេតុការណ៍នៅថៃ្ងទី១៦ ខែសីហា ឆ្នាំ២០២១ នេះបណ្ដាញសារព័ត៌មានបានចុះផ្សាយថាទីតាំងបន្ទាយខាងលេីនៅបន្ដបេីកឱ្យលេងល្បែងនោះ គឺលោកវរសេនីយ៍ឯក ប៊ុត ប៊ុនធឿន អធិការនគរបាលស្រុកឱរ៉ាល់ បានបញ្ជាឲ្យលោកអនុសេនីយ៍ឯក អន យុទ្ធហុង អធិការរង ទទួលបន្ទុកការងារយុត្តិធម៌ និងលោកវរសេនីយ៍ត្រី អ៊ុំ លីប៉េង អធិការរងទទួលបន្ទុកការងារប្រឆាំងបទល្មើសគ្រឿងញៀន ដឹកនាំកម្លាំងទៅពិនិត្យទីតាំងខាងលើជាថ្មី កំលាំងសមត្ថកិច្ចនគរបាលបានព្យាយាមចុះទៅកាន់ទីតាំងដេីម្បីស្នេីសុំកិច្ចសហការប៉ុន្តែមិនទទួលបានការឆ្លេីយតបទេ ព្រោះលេខទូរស័ព្ទទំនាក់ទំនងមិនបាន រីឯកងការពារយាមក្លោងទ្វាថានៅខាងក្នុងគ្មានមនុស្សក្រៅពីកងកំលាំងយោធាដែរ។
ដោយបានការណែនាំដ៏ខ្ពង់ខ្ពស់ពីលោកឧត្ដមសេនីយ៍ទោ សម សាមួន ស្នងការនគរបាលខេត្ដកំពង់ស្ពឺ បានដាក់បទបញ្ជាឱ្យកម្លាំងនគរបាលបន្ដក្ដាប់ និងស្រាវជ្រាវតាមវិធានការជំនាញ ពិនិត្យគ្រប់មធ្យោបាយរថយន្តដែលចរាចរណ៍ឆ្លងកាត់ ដោយមានការដឹកជញ្ជូនសត្វមាន់ប្រភេទមាន់ជល់ ម៉ូតូដឹកមាន់ជល់ច្រកការ៉ុងសំដៅចូលទៅកាន់បន្ទាយនោះ និងសុំគោលការណ៍ឃាត់ណែនាំឱ្យវិលត្រឡប់និងមិនអនុញ្ញាតបន្ដទៅកាន់ទីនោះ ក្នុងករណីរឹងទន្ទឹងនិងអនុវត្ដវិធានការរដ្ឋបាល ឈានទៅអនុវត្ដវិធានការច្បាប់។
ក្រុមការងារប្រតិកម្មរហ័សនៃស្នងការដ្ឋាននគរបាលខេត្ដកំពង់ស្ពឺ រង់ចាំកិច្ចសហការពីគ្រប់ស្ថាប័នអង្គភាពពាក់ព័ន្ធទាំងអស់ ដេីម្បីចូលរួមសហការ បង្រ្កាបលុបបំបាត់ភាពអសកម្មបុគ្គលដែលកំពុងឃុបឃិតកេងចំណេញយកប្រយោជន៍ ធ្វេីឱ្យប៉ះពាល់ដល់កិត្ដិយសស្ថាប័ន-អង្គភាព៕
