ប្រជាពលរដ្ឋខណ្ឌដង្កោបោះឆ្នោតជូនគណបក្សប្រជាជន,គឺត្រូវការសម្តេចតេជោ ហ៊ុន សែន ធ្វើជានាយករដ្ឋមន្ត្រី ត្រូវការសន្តិភាព

ភ្នំពេញ៖លោកអភិបាលខណ្ឌដង្កោបានអះអាងថា៖ ពលរដ្ឋក្នុងខណ្ឌបានបោះឆ្នោតគាំទ្រគណបក្សប្រជាជន ឲ្យបានទទួលជោគជ័យគួរជាទីមោទនៈនេះ បានបង្ហាញយ៉ាងច្បាស់ថា បងប្អូនត្រូវការសម្តេចតេជោ ហ៊ុន សែន ធ្វើជានាយករដ្ឋមន្ត្រី ត្រូវការសន្តិភាព និងការអភិវឌ្ឍបន្តទៀត។ឆ្លៀតក្នុងឱកាសនោះលោក នុត ពុធដារ៉ា បានធ្វើការថ្លែងអំណរគុណយ៉ាងជ្រាលជ្រៅ ចំពោះប្រជាពលរដ្ឋទាំងអស់ ដែលបានផ្តល់ទំនុកចិត្ត និងបោះឆ្នោតគាំទ្រគណបក្សប្រជាជនកម្ពុជា ក្នុងការបោះឆ្នោតជ្រើសតាំងតំណាងរាស្ត្រកន្លងទៅ ដើម្បីសម្តេចតេជោ ហ៊ុន សែន បន្តធ្វើជានាយករដ្ឋមន្ត្រី និងបន្តដឹកនាំប្រទេសជាតិ រីកចម្រើនបន្តទៀត។
លោក នុត ពុធដារ៉ា ជំនួយការសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា និងជាអភិបាលខណ្ឌដង្កោបានអះអាងបែបនេះកាលពី ថ្ងៃទី២៨ ខែសីហា ឆ្នាំ២០១៨នេះ រួមជាមួយអភិបាលរង មន្ត្រីរាជការខណ្ឌ សង្កាត់ បានចុះថ្លែងអំណរគុណប្រជាពលរដ្ឋ ក្នុងសង្កាត់ក្រាំងពង្រ ដែលបានបោះឆ្នោតគាំទ្រ គណបក្សប្រជាជនកម្ពុជា ក្នុងការបោះឆ្នោតកន្លងមក ព្រមទាំងសំណេះសំណាលសួរសុខទុក្ខ និងស្វែងយល់ពីតម្រូវការ សំណើ សំណូមពរនានា របស់ប្រជាពលរដ្ឋ មកដោះស្រាយឲ្យបានទាន់ពេលវេលា។

ក្នុងនោះលោកអភិបាលខណ្ឌបានបញ្ជាក់ថា៖ប្រជាពលរដ្ឋនៅក្នុងមូលដ្ឋានខណ្ឌដង្កោទាំងមូល បានបន្តស្រលាញ់គាំទ្រ គណបក្សប្រជាជនកម្ពុជា និងគាំទ្រចំពោះការដឹកនាំរបស់សម្តេចតេជោ ហ៊ុន សែន ដោយបានបោះឆ្នោតគាំទ្រគណបក្សប្រជាជនកម្ពុជា ឲ្យបានទទួលជ័យជម្នះយ៉ាងភ្លូកទឹកភ្លូកដី ដែលពុំធ្លាប់មាន ដោយសម្លេងគាំទ្ររហូតដល់៧១,២១ភាគរយ ប្រៀបជាមួយចំនួនអ្នកបោះឆ្នោតសរុប។
ជាមួយគ្នានោះដែរ លោកអភិបាលខណ្ឌ ក៏បានផ្តាំផ្ញើការសាកសួរសុខទុក្ខប្រជាពលរដ្ឋ ពីសំណាកសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ជូនដល់បងប្អូនប្រជាពលរដ្ឋទាំងអស់ ដែលជានិច្ចកាលសម្តេចទាំងទ្វេរតែងបានគិតគូរពីការលំបាក បញ្ហាកង្វល់ និងតម្រូវការនានារបស់បងប្អូននៅមូលដ្ឋាន៕